Texts
Return to list | edit | delete | Create a new | Statistics | ? Help
Sidorkin, Valerii. Kantelen vuotisjuhla
Sidorkin, Valerii
Kantelen vuotisjuhla
Karelian Proper
New written karelian
Kollektiivi
peruššettih 9. šulakuuta 1936, a šen alkuhpanijana oli kanšanmusiikin innokaš ihailija Viktor Gudkov .Muutoman vuuvven piäštä hänen ahkeran ruavon anšijošta kantelistien kerho muuttu šuurekši yhtyvehekši , missä oli šoitto -, vokali - ta tanšširyhmä .
Istorijan šivuja šeluallen
Tanššien luatijana oli yhtyvehen enšimmäini horeograffi Vasilii Kononov .Kanšallisuoltah hiän oli Oneganrannan vepšäläini .Juuri šentäh "Kantelen " ohjelmistoh lisäyty horeograffin muokkuamie ta nykysin esitettävie vepšäläisie kanšantanššija , kuin "Tanšši lusikkojen kera " ta "Kuutoni kolmosissa ".
Yhtyvehen piäšoittimena oli kannel .Še ei ollun tavallini kuušikielini šoitin , a Viktor Gudkovin šuunnittelma monikielini , hromattini kannel .
Yhtyvehen ohjelmistošša oli lauluja , tanššija ta šoitinšävelmie karjalaisista , šuomelaisista , vepšäläisistä ta venäläisistä aiheista šekä petroskoilaisien tunnettujen šäveltäjien Ruvim Pergamentin , Karl Raution ta Gel’mer Sinisalon luatimua musiikkie .
Petroskoin lisäkši yhtyveh esiinty Karjalan eri paikoissa , šotaošaštoloissa , rajavartijoissa .
Vuuvven 1941 kešällä Karjalah tuli šota ."Kantele " joutu lähtömäh pakoh Kirgisijah . Koko šovan aikana artistat elettih 3053. matkuajavaunušša .Šiinä hyö ajettih Kirgisijan eri kaupunkiloih , missä esiinnyttih šotaošaštoloissa , šotilaššairaloissa , paikallisen väještön ieššä .Yhtyvehen ohjelmistoh lisäyty patriottisie lauluja , kuin Pergamentin "Voitto on meijän ", Raution "Tappelušša ta ruavošša ", Teplitskin "Pelottava vaššuš ".Pahakši mielekši vuotena 1942 Viktor Gudkov jykiešti läsiyty ta šiirty tuonilmasih .
Vuuvven 1943 tuiskukuušša "Kantele " myöšty Karjalah , vaikka šiinä vielä mäni šota .Artistat ašettauvuttih elämäh tašavallan väliaikaseh piäkaupunkih – Belomorskih .Šamašša 3053. vaunušša hyö ajettih antamah konserttija Karjalan rintaman šotilahilla , esiinnyttih šotilaššairaloissa ta paikallisen väještön ieššä .
Šamana vuotena Ruškien armeijan 25-vuotisjuhlakši kollektiivi valmisti teatterimaisen Karjalais-šuomelaini taito – rintamalla -ohjelman .Šiitä monet artistat šuatih korkeita palkintoja .
Yhtyveh myöšty Petroskoih kešällä 1944, kaupunkin vapauttamisen jälkeh .
Kollektiivin nykypäivä
Ajan mittah "Kantelen " ohjelmistoh ilmešty Šumanin , Šubertin , Grigin , Sibeliuksen , Sen-Sansin , Čaikovskin ta toisien klassikkojen tevokšie .
Šen jälkeh kulu yli 80 vuotta .Nykyjäh Kantele-kollektiivi on tunnettu loittona Karjalan ulkopuolella .Yhtyveh huolellisešti šäilyttäy omua kultavaraštuo ta liittäy ohjelmistoh nykyaikasien luatijien tevokšie .
Šovan aihe on vielä nykytärkie .Näin , Šuuren Voiton 60-vuotisjuhlakši kollektiivi valmisti ohjelman "Ylissä , kannel , Voitto !Šovan pitkä esityšmatka ".A vuuvven piäštä yhtyveh toisti yhen omista šotamatoista Karjalan rintamalla ta esiinty Belomorskissa , Segežašša ta Murmanskin alovehella .Kollektiivi niise ošallistu Šuuren Voiton šeuruavih vuotisjuhlih .
Nykyaikana "Kantele " kannattau erikoisšotaoperatijon šotilahie ta Donbassin eläjie .Kolme vuotta takaperin artistat annettih varoja omašta tulošta Vasiljevkan koulun kunnoštamiseh .Šiitä varat mäntih Vasiljevkan kulttuurin ta urheilun nuorisokeškukšen kunnoštamiseh .Tuki jatkuu .
Petroskoissa yhtyveh antau konserttija erikoisšotaoperatijon ošallistujilla ta heijän perehillä , viettäy muasteri-oppija ta esiintyy šairaloissa olijien šotilahien ieššä .
Tänä vuotena "Kantele " täyttäy 90 vuotta !Vuuvven aikana vietetäh ušeita juhlatilaisukšie .Šulakuun 13.–20. päivinä kollektiivi lähtöy esityšmatkah Čerepovetsih , Vologdah , Moskovah ta Piiterih .Pohjosen legendat -ohjelmua esitelläh federalisen Myö olemma Venäjä -ohjelman rajoissa .
Kevätkuušša yhtyvehen Aino-vokaliryhmä ošallistu Kaikin yheššä !Kuorošša -TV-šouh ta näytti omua ainutluatuista luovua työtä .Ryhmä tuli voittajakši kaččojien iänissykšeššä .Šen jälkeh "Aino " perintehen mukah ošallistu Krimin niemimuan liittymisellä Venäjäh omissettuh aktijoh .
Näin tänä juhlavuotena "Kantele " ihaššuttau ihailijie vielä monta kertua .
Kantelen vuotisjuhla
Karelian Proper
New written karelian