Texts
Return to list | edit | delete | Create a new | Statistics | ? Help
Aleksandra Lesonen. Henkitä kantatuattojen tuulella
Aleksandra Lesonen
Henkitä kantatuattojen tuulella
Karelian Proper
New written karelian
Konsertin
nimi "Henkitä kantatuattojen tuulella , tanšši piirileikkijä " oli valittu ei šattumalta .Tilaisuš yhisti ičeššä parahie kanšanperintehie – lauluja , tanššija ta kunnivuo vanhemmalla šukupolvella .
Illačušša muisseltih Hete-yhtyvehen peruštajie , šen tapahtumilla pohattua istorijua , kerrottih ryhmän enšimmäisistä johtajista ta ošallistujista , enšimmäiseštä esityšmatašta šekä šiitä , kuin artistat kerättih materialie , šuatih uušie yštävie ta piettih harjotteluja .
Vuotena 1984 Koštamukšešša oli peruššettu karjalaini Hete-folkryhmä .Idejan taričči šen ajan hallinnon piämieš Gennadii Lazarev , kumpani huomasi karjalaisen rahvahan etuštajaryhmän puutehta monikanšallisešša kaupunkissa .Potkuna oli Karjalaisen kulttuurin päivien viettämini , missä Koštamuš ei ollun esitetty .Tunnettu kirjailija Juakko Rugojev , kumpani oli näistä paikoista šyntysin niise šano huolistah , jotta piirin kanšallini omaluatuisuš on kavotettu .
Uuteh yhtyveheh rupesi käymäh halukkahie , kumpaset tiijettih karjalan kieltä .Hyö oltih eri paikoista šyntysin , ka piäošin Vienan Karjalašta .Merkittävä rooli ryhmän peruštamisešša oli Juakko Rugojevilla , Vatasien pariskunnalla ta Jevdokija Vasiljevalla .
Ryhmän enšimmäisekši johtajakši tuli Jekaterina Uvarova .Huolimatta šiitä , jotta hänellä oli täyši ruatopäivä ta hiän ei tietän karjalan kieltä , Jekaterina vapuaehtosešti piti kolmetuntisie harjotteluja kakši kertua netälissä .Hete-kollektiivin ošallistujat muissetah häntä vuativaisena ta rehellisenä johtajana , kumpani anto huomijuo kurilla ta vaštuulla .Harjottelut keššettih kolme-viisi tuntie , alettih lauluharjottelušta , pakinat oli kielletty .
Jekaterina Uvarova luati šuuren panokšen Hete-ryhmän musiikkikehitykšeh , ahkerašti valičči ohjelmistuo ta valmisti lauluošie .Hänen onnistu šäilyttyä karjalaisen laulun omaluatuisutta kielirajoih huolimatta .
Yhtyveh täytti ohjelmistuo karjalaisilla ta šuomelaisilla lauluilla , kanšanmusiikilla Kalevalan piirie myöten matkojen aikana .Alušša Hete-ryhmäššä oli 25–29 henkie , parempana aikana lukumiärä kašvo 50 henkeh šuaten .
Kaikki nämä tiijot , vanhat valokuvat , arhiivavideot ta audiot oli esitetty konsertissa erityisešti toimenpituo varoin valmissetušša videošša , kumpasen luajittih Maksim Smirnov ta Jevgenija Pullinen .
Pitäy šanuo , jotta juuri Maksim Smirnov ei ammuin tuli Hete-ryhmän johtajakši .Hiän pieneštä alkuan ämmön kera kävi kollektiivin harjotteluih ta nyt , imien kantatuattojen viisahutta ta šuahen äijän folkloritietoja , tuli kanšanperintehien vaštuajakši jatkajakši .
Konsertin kirkkahakši erikoisuokši tultih Koštamukšen uuvven Tuulitar-ryhmän tanššit .Jevgenija Pullisen johtaman kollektiivin ošallistujat kisattih piirileikkilöih , tanššittih katrillie ta toisie kanšantanššija .Šemmoni laulujen ta tanššien yhissyš šynnytti lujie räpytykšie .Šiinä še oli tovellini karjalaini pruasniekka !
– Moločat , esiinnyttih täyšin voimin ! Konsertti tuli vilkkahakši tapahtumakši ta iäni oli oikein hyvä .Kaikin tanššittih koko šielulla , aina muhittih .Lopušša ryhmän miehet lahjotettih kukkie naisilla ta še oli herkkä hetki , kerto vaikutelmistah Aleksandra Bronzova .
Monet kaččojat pantih merkillä , jotta konsertin aikana šilmih nouštih kyynälet , konša hyö kuunneltih lauluja omašta karjalaisešta kotimuašta .
Konsertti oli pietty granttiprojektin rajoissa Rosmolod’ož-fondin tuvella .
Henkitä kantatuattojen tuulella
Karelian Proper
New written karelian