Texts

Karjalan kanšallini musejo toteuttau Karjalan kielen musejokirjaimet -projektie. Šen tehtävä on tutuššuttua Karjalan eläjie musejokokoelmah ta karjalan kieleh.
– Karjalan kielen kirjaimikošša on 29 kirjainta. Karjalan kielen musejokirjaimet -projektie varoin valiččima kanšallisen musejon kokoelmašta 29 esinehtä. Projektin aikana kaikki halukkahat šuahah tietyä, mitein nämä esinehet nimitetäh vienankarjalakši, livviksi ta lyydiksi, kertou kanšallisen musejon ruataja ta projektin koordinattori Sofja Nikitina.
Musejokirjaimet ilmeššytäh verkošša šulakuun alušta lähtien. Projektin VK-ryhmäššä julkaissah postaukšet, kumpasista löytyy esinehien istorijoja, kuvie ta karjalankielisie nimija šekä karjalankielisen nimitykšen käyttöesimerkki.
– Postaukšet šisälletäh ainehistuo venäjäkši ta karjalakši. Enšimmäini postauš ilmešty 3.^ šulakuuta. Še kertou kirjaimikoista ta aapisista. Piättimä alottua šiitä, šentäh kun projektin nimi on “Musejokirjaimet”, jatkau Sofja Nikitina.
– Postaukšet julkaissah kakši kertua kuukauvešša. Šuunnitelmien mukah toini ilmeštyy 17.^ šulakuuta, šelittäy miun pakinakaveri.
Sofja Nikitinan mukah informatijuo musejoesinehistä julkaissah VK-sosialiverkošša, jotta projektista šais tietyä mahollisimman moni verkon käyttäjä.
– Šuunnitelmissa on kerätä nämä postaukšet yksih kanših ta julkaissa kirja, min avulla lukijat voitais tutuštuo kanšallisen musejon perušnäyttelyh, kertou projektin koordinattori.
– Kirjašta löytyy niise tietuo karjalan kieleštä ta šen istorijašta.
Šuunnitelmien mukah kirjan painošmiärä on 300 kappalehta.
– Kirja juatah ilmasešti, lupuau Sofja Nikitina.
Kanšallisen musejon perušnäyttely on esillä Petroskoissa, ka projektin avulla šiih voipi tutuštuo Karjalan piirilöissäki.
– Valmistima näyttelyn, mi toimiu karjalaisien elinkeškukšissa: Aunukšešša ta Kalevalašša, pal’l’aštau šaloja koordinattori.
Näyttelyh kuuluu Karjalan kanšallisen musejon kokoelmah kuulujien esinehien kopijoja.
– Emmä šua lähettyä piirilöih iče musejoesinehet, šentäh kun ne pitäy vakuuttua. Tämä on monimutkani ta kallis prosessi. Kopijoitaki riittäy, jotta tuttavuštuo karjalaiseh kulttuurih, šelittäy projektin ruataja.
– Piirimusejoissa on omie kokoelmie. Tarvittuas’s’a musejojen henkilökunta voit täyventyä meijän näyttelyö piirimusejojen kokoelmih kuulujilla esinehillä, huomauttau Sofja Nikitina.
Kalevalan musejošša näyttely rupieu toimimah šyyškuušša. Pimiekuušša še lähtöy Aunukšeh.
– Aunukšen piirissä karjalan kieli on elošša. Šitä paissah ta šen peruštehie luvetah päiväkotiloissa ta kouluissa. Miušta Karjalan kanšallisen musejon spesialistien valmistama näyttely kiinnoštau eri-ikäsie ihmisie, kommentoi Aunukšen kanšallisen musejon johtaja Natalja Nikolajeva.
Aunukšešša näyttely on esillä kuukauven aikana.
– Olemma valmehet tariččomah näyttelyššä kävijillä muitaki interaktiivisie toimenpitoja, esimerkiksi, muasteri-oppija, kertou Natalja Nikolajeva.
Projektin toteuttajat kerrotah, jotta meinatah lähettyä näyttely Karjalan toisihki piirilöih ta äšen tašavallan ulkopuolella.