Texts
Return to list | edit | delete | Create a new | Statistics | ? Help
Popova Irina . Vepsän literatur: abekirjaspäi al’manahazesai
Popova Irina
Vepsän literatur: abekirjaspäi al’manahazesai
Veps
New written Veps
Keväz’kun
26. päiväl "Vepsläine "-studijas mäni čoma sädandeht .Päadivon oli tetab vepsläine tedomez’ , filolog , kändai , kirjutai da runoilii Nina Zaiceva .Hänen nimi om vahvas sidotud vepsän kelen da kul’turan udessündutamiženke da kaičendanke .
Vastusele kerazihe Vepsän kul’tursebran da "Vepsläižed besedad " - paginkluban aktivižed ezitajad , Petroskoin universitetan Baltianmeren suomalaižen filologijan kafedran üläopenikad da mugažo ristitud , kudambile oma mel’he rahvahan tradicijad da kel’ .Kaikile oli melentartušt kundelta ristitud , kudamb omišti ičeze elon vepsän kelen oppindale da kaičendale .
Ičeze ezitusele Nina Zaiceva andoi "Vepsän literatur : abekirjaspäi al’manahazesai " -nimen .Hän zavodi paginan vepsän kirjutuzkelen sündundas , XIX voz’sadan , XX voz’sadan augotišen ezmäižiš töiš , miččed oma vepsän kirjutuzkelen muštpachad .Nina Grigorjevna starinoiči äjan melentartušt maman kelen kaičendan jügedas , no melentartuižes matkas : vepsän kirjutuzkelen tegemižes männuden voz’sadan 1930.- da 80.-vozil , openduzkirjoiden da vajehnikoiden tegemižes , vepsän kelen paginoiš , niiden kävutandas da nügüdläižen vepsän kelen vaihišton täutamižes .
– Miše kel’ eläiži , pidab olda kirj kädes . Kirj vahvištoitab kel’t , tegeb sidä rohktambaks , vahvištoitab oigedkirjutamižen sändoid .Üks’ Vepsän kul’tursebran pätegendoišpäi , konz se oli sätud , oli tehta vepsänkelišt literaturad .Se om kelen kehitoitusen jatktandan alanduz , – sanui Nina Zaiceva .
Kut starinoiči tedomez’ , vepsän kelen kehitoitusen augotižetapal oli tärged tehta Uden Zavetan , Biblijan prozatekstoiden kändandad .Se abuti ližata vepsän kel’he äi uzid da amu unohtadud sanoid .Ozutihe ezmäižed - ki vepsläižed runoilijad Nikolai Abramov da Alevtina Andrejeva , mi abuti völ enamba kehitoitta vepsän literaturad .
Vastusel Nina Zaiceva jagoihe , kut hän iče zavodi kirjutada runoid , starinoiči "Kodima "-lehtesen da "Verez tullei " -al’manahan tegemižen polhe , karjalaiž-suomalaižen "Kalevala "-eposan kändmižen polhe vepsän kel’he da mugažo vepsläižen "Virantanaz "-eposan tegemižen polhe .Vastusen lopus Nina Zaiceva starinoiči "Minun vepsläine oza " -kirjas , mitte läksi eloho vepsän da venän kelil männudel vodel .
Avtoran sanoiden mödhe , "Virantanaz "-eposas da "Minun vepsläine oza " -starinas hän tahtoi ozutada , kut vepsläižed eliba kožmuses londusenke , kut arvostiba mecad , vet .Kirjutusiden pohjaze om pandud personaližed muštlotesed da meletused , miččed oma vahvas sidotud vepsläižidenke tradicijoidenke da filosofijanke .
Vastuz oli lujas melentartuine da südäimeline .Mugoižed paginad abutaba ristituile paremba el’geta toine tošt da arvostada ičeze istorijad .Kundlijad spasiboičiba Nina Zaicevad hänen rados da eläbas paginas .Mugoižed vastused ozutaba , miše melentartuz’ vepsän kul’turaha kazvab .A sido tedomehiden , vanhemban sugupol’ven da norišton keskes om parahim maht kaita unikališt jäl’gestust tulijoile jäl’genikoile .
Vepsän literatur: abekirjaspäi al’manahazesai
Veps
New written Veps