Texts
Return to list | edit | delete | Create a new | Statistics | ? Help
Elina Potapova. Paja on nossuh tuhkaspäi
Elina Potapova
Paja on nossuh tuhkaspäi
Livvi
New written Livvic
Pyhäjärves jo
piäl kaheksua vuottu ruadau L’oka da Kirill Čurakovien paja .Mondu vuottu pajas luajittih saviastieloi da valettih juveliiručomenduksii .Mulloi elokuus rodih hädä – paja paloi tuhkakse .Tänävuon paja rubei ruadamah uvves tilas Pyhäjärven kul’tuurutalois .
Molodoit L’oka da Kirill Čurakovat avattih paja Pyhäjärveh vuvvennu 2014.Kirill on rodužin Udmurtien Votkins-linnaspäi , L’oka on rodivunnuh Puadenen kyläh , ga pienete muuttihes perehinneh Segežah .Molodoit tuttavuttih Piiteris opastujes .Opastundan loppiettuu L’oka da Kirill ruvettih duumaimah , kunnebo olis lähtie elämäh – pienis linnois kazvanuot molodoit nikui ei tahtottu jiäjä suureh hälizijäh linnah .
– Lähtimmö elämäh Pyhäjärven kyläh . Sie eli minun buabo , kazvoigi minun muamo .Piiteris opastujes ylen äijäl tahtoin tulla järilleh omah čuppuh , suvaičen Karjalan luonduo da ilmastuo .Ukolegi Karjal rodih mieldy myö , enimite järvet – Kirillan roindumual on enämbi pelduo , saneli L’oka .Vuvves 2015 algajen neroniekat ruvettih ruadamah Melliččy-fondanke , kudai andoi pajah poltopäčin da enzimäzen padaniekan pyörikön .Neroniekat tässähgi pietäh yhtehisty ruaduo "Melličänke ".
– Piiteris eläjes minä opastuin kolmes padaniekan ruadopajas da sit jatkoin opastuksen iče videoloi myö , kuduat lövvin internetas .
Pajas minä vastain padaniekan ruavos , Kirill rubei valamah juveliiručomenduksii .Ga myö ainos avvutimmo toine tostu , yksinäh ruadua on ylen vaigei , saneli L’oka .
Kaheksan vuvven aloh neroniekat oldih nostamas da kehittämäs omua pajua , opastettih padaniekan neroh lapsii da ruavahembii .
Ruado käis lähti , pluanois oligi ottua ruadoh padaniekkoi , ku vois luadie suurembazii tilavuksii .Ga , pahakse mielekse , mulloi paja paloi kogonah .Uudet pajah pidi den’gua , sendah molodoit lähtiettih ruadoh Piiterih .Enzimäzii tavoittehii oli suaja varoi alužimen nostamizeh .
Ga ruadua täytty vägie ei suannuh pandemien rajoituksien periä .Sentämän kuun ruattuu L’oka da Kirill piätettih tulla järilleh Pyhäjärveh .Sie abuh tuli Pyhäjärven juuret -yhteiskunnalline liitto , kuduan projektu voitti Ven’an prezidentan grantoin kilvas .Projektan hantuzis neroniekoile annettih vuograh tilat , kudualois ei pie maksua projektan todevuttamizen aigua .Uuzi paja on sijoitannuhes Pyhäjärven kul’tuurutaloin pohjukerrokseh .
Projektan mugah pajah ostettihgi laittehet .Nygöi stuudies on kaksi padaniekan pyörikkyö (eräs pyörikkö ei palanuh tulipalos ), poltopäčči da ruadokoneh , kuduan avul ajellah savie .
Tänävuon pakkaskuun allus paja vastai enzimäzii opastujii .Sanommo , Uvven Vuvven pruazniekan lomapäivien aloh pajah kävyi piäl nelliäkymmendy hengie .Opastumah padaniekan neroh kerävyi rahvastu Petroskois , Priäžäs da Matrosaspäi .Kevätkuun toizel puoliškol neroniekat piettihgi ruadopaja školaniekkoih niškoi , kuduat yhtyttih Priäžäs piettyh Lapsien neroloin rezidensieh .Kirill vaste vai loppi uvven pajan kohendamizen , ga pajas vie ei ole nigo vetty , nigo kanalizatsiedu , nigo sähkyö , ku panna päčči ruadamah .
– Piemmö keruamiekan urokkoi , ga ei äijiä . Saviastieloi luajitah kahtes urokas , ga nygöi voimmo pidiä vaiku enzimäzen urokan , sendäh ku toizel urokal jo poltetah luajilmukset .Nygöi pajas on ruokos jo enämbi sadua opastujien luajilmustu , kuduat vuotetah tuliedu etuappua .Sendäh meijän piätavoittehennu on panna rattahile pajan ruado .Meil on äijy pluanua tuliekse aigua , ga niilöis myö sanelemmo vähästy myöhembi , sellittäy L’oka .
Paja on nossuh tuhkaspäi
Livvi
New written Livvic