Texts
Return to list | edit | delete | Create a new | Statistics | ? Help
Elina Potapova. Karjalan kielen nedälil karjalua kuului “Tuomes”
Elina Potapova
Karjalan kielen nedälil karjalua kuului “Tuomes”
Livvi
New written Livvic
Karjalas
11.-17. sulakuudu piettih Karjalan kielen nedäli .Sen hantuzis Tuomi-etnokul’tuurizes keskukses saneltih lapsile karjalazien kul’tuuras da tavois , tansittih da pajatettih karjalakse .
Buaboilluo gostis
Karjalan kielen nedälin hantuzis "Tuomes " tuttavutettih lapsii karjalazien taboih da perindölöih .Keskukseh avattih karjalazien vahnoin veššilöin da vehkehien uvvistettu ozuttelu .
Karjalan kielen nedälikse valmistettih laudazet , kudualoih on kirjutettu ozutteluezinehien nimet karjalan da ven’an kielel .Ezinehien nimet karjalakse kiändi paikalline eläi Vera Noskova .Ozuttelus on ezil läs 40 vahnua ezinehty , kuduat tuodih keskukseh paikallizet eläjät .Niilöin joukos on karasinlampuloi , tyttilöi , kätkyt , ut’ugat , kuožali , värtin , kaššeli .Ongi vereksel luajittuloi ezinehii , sanommo , tuohiastieloi da ferezi , kudai ommeltih vahnan karjalazen ferezin mugah .
– Ozuttelun tarkoituksennu on ozuttua lapsile ennevahnallizii ezinehii da sanelta niilöis . On tärgei , ku lapset suajas pidiä veššilöi käzis , on varmu Natalja Fomina .Ozuttelun enzimäzii kaččojii oldih Čalnan školan enzimäzen kluasan opastujat , kuduat 14. sulakuudu tuldih keskukseh Buaballuo gostis - pidoh .Omas lapsusaijas karjalazis kylis saneltih Viidanas eläi Zinaida Ležneva da Čalnas eläi Valentina Zubtsovskaja .Naizet saneltih lapsile , mittumih kižoih kižattih , midä hommua oli kois .Zinaida Mihailovna ozutti , kui ennevahnas käytettih ut’ugoi da luajittih tyttilöi tilkuzis .Karjalua maltajat naizet pajatettih karjalakse da sanottih erähii sanoi omal kielel .
– Lapsile on jygei kuvitella , ku buabat sežo oldih lapsinnu .
Školaniekoile rodih mieldy myö tiijustua , kui enne elettih karjalazet lapset , ližäi Natalja .Sulakuun 15. päivänny "Tuomes " juodih čuajuu karjalazeh tabah .Pivon aigua Bes’odaine vokualujoukon artistat pajatettih karjalakse da opastettih lapsii karjalazien kižoih da tansiloih , juotettihgi čuajul .
Uuzi johtai – endine ruado
Tänä sygyzyl Čalnan Tuomi-keskus täyttäy kaksikymmen vuottu .Endizen kirjaston taloih sijoitetus keskukses kehitetäh karjalazien perindöllizii neroloi , opastetah kanzallizii kielii , pajatetah karjalakse da pietäh erilazii ruadopajoi lapsile da ruavahile .Tuomi-keskus ruadau Čalnan kul’tuurutaloin tyves .Jälgimäzen kahten vuvven aloh Tuomi - keskuksen tilois ruadaugi Čalnan administratsii , sendäh ku sen endine taloi paloi .
Talvikuus 2021 algajen Tuomi-keskuksen johtajannu on Čalnan eläi Natalja Fomina .Jälgimäzii vuozii Natalja Vladimirovna ruadoi Čalnan školas , äijän vuottu ruadoigi ližäopastuksen opastajannu Priäžän piirin Lapsien da nuorižon luomisruavon
dvorčan Čalnan ozastos .Naine pidi Minun Karjal -kursua školas da erilazii pidoloi karjalazien kul’tuuran da tavoin säilyttämizekse da levittämizekse .Lapsusaijas Natalja opastui eri neroloih .
– Minun tuatto ruadoi taidoilijannu-čomendajannu Čalnan kul’tuurutalois , pidi erilazii kerholoi , maltoi kuduo da punuo pajunvičois . Minähäi "kazvoin " tuatan pajas , muamo ruadoi ombelijannu ."Tuomen " ruado on minule lähäine , saneli Natalja Fomina .
Ruaduo ymbäri vuvven
"Tuomes " alalleh pietäh erilazii pidoloi da kanzallizien neroloin ruadopajoi .Nygöi etnokul’tuurizes keskukses opastetah kudomah kangaspuuloil , keskukses on nelli kangaspuudu .Ruadopajoi pidäy neroniekku Ol’ga Savolainen .Tulien sygyzyn keskukses ruvetah opastumah valmistamah luajilmuksii villas , jatketahgi kudomizen kursiloi .Keskuksen tyves jo äijy vuottu ruadaugi kaksi pajojoukkuo : "Bes’ odaine " pajattau karjalan kielel da "Tuomi " – suomen kielel .Kerran nedälis etnokul’tuurizes keskukses pietäh urokkoi pienembih školaniekkoih niškoi .
Lapsile on programmoi kezän aiguagi .Pluanois on alalleh pidiä vastavuksii karjalua maltajien ristikanzoinke .Piätteniččöin keskukseh kerävytäh ruavahat rahvas – voinan lapset .Naizet kuvotah lentoil , valmistetah luajilmuksii pruazniekoikse da muudu .
Ližiä tieduo da uudizii "Tuomes " voibi tiijustua Čalnan kul’tuurutaloin internetsivul .Tuliel aigua kačotahgi luadie etnokul’tuurizen keskuksen oma sivu Vkontakte-saital .
Karjalan kielen nedälil karjalua kuului “Tuomes”
Livvi
New written Livvic
"