Error:
Недостаточно прав на выполнение этой операции
Texts
Return to list | edit | delete | Create a new | Statistics | ? Help
Valentina Libertsova. Kevätkuun jället. Suarnu
Valentina Libertsova
Kevätkuun jället. Suarnu
Livvi
New written Livvic
Tuli
muale Kevätkuu , ga kodvan ei voinnuh ellendiä , kui nenga vuottamata piädyi muale .Musti vai , kui viukai käil Sulakuu-veikki , dai uinoi pehmiel nurmel .
- Onnuako , jogo nenga terväh vuozi huškai ? Avoi-voi !Sit pidäs nosta da ottuakseh ruadoloih !
Hieroi silmii – tuaste ei ellendä : mulloi täl aigua kai mua oli katettu harmual vahnal heinäl , a sydämes vie kylmy .Sit pidi ajatella , konzu da kui vaihtua heinät uuzih , gu nuoret idozet ei kylmettäs , eigo hapattas , ku kazvettas omal aijal rikkomattomannu , tervehenny .Puutui kumardellakseh huondeksen halloile , viluloile vihmoile , jiähizele muaperäle …A nygöi …ymbäri oli lumi .Moine syvä – kai otti varavo : agu uppuot kivoksih ?
Liennego Vuozi midätahto sevoitannuh da havačuttannuh liijan aijoi ?- tuli Kevatkuun piäh mieli .
Kaččou – ga ikkunoil , seinil , pihalaučoil – kaikkiel sijoituttih kažit .Tiettäväine , se on , vikse , Kažiloin pruazniekku – enzimäine Kevätkuun päivy - toven pidäy ottuakseh ruadoh !Ylen vai on täs tila tundematoi .Pidänöygo kuččuo toizet kevätvellekset : Sulakuu da Oraskuu - da sellitellä yhtes ruavot , sobie keskenäh – midä , konzu , kel kus ruadua .
Sanottu – azuttu – vai ehti punalduakseh ičes ymbäri – veikit jo rinnal seizotah , muheloitetah , taputetah lundu , lekutettih piälöi – hyö sežo kummeksittih Kevätkuun talvie .A sit gu avattih suut da ruvettih toine toizen vuoroh hačattamah gu kevätlinnut toizet , ga Kevätkuu odva ehti piädy punuo da ottua piäh heijän zuakkunoi da nevvoloi .
- Oh , gorʹa , gorʹa , aiga bekettih puutuit , meijän nuorembi velli-rukku . Ga olgah , älä jo pahoittelei – myö avvutammo sinuu , dai yhtes väitämmö nämmä vahingot .
- Älä vai kiirehtä muadu lämmittäjes , älä sulua lundu , agu roinnou viennouzu , voijah alangolois ristittyzil upota kylyt , kuopat , garažat , pellot . Venehet vedäy kunnegi loitos rannaspäi , ligavutah kujot , pordahat , krinčat , hapatah da kylmetäh kazvokset , sanoi Sukakuu .
- Muga , onhäi Sulakuu sih niškoi - sulata mua da lumet . Sinul pidäy tarkah paista päiväzen da pilvienke – myvvittiä , ku päiväine pastas hilʹlʹakkazin , ei kaiken päivän aloh , a vai kodvazen , da vie sobie yöpakkazien tuulienke - gu kerras kai luhtat kuivatettas , da ei jiävytettäs ristittyzien tielöi .Net kahtel jallal kävelijät olendot ollah ylen huonot pyzymäh libiel .Vönytä se ruado kaikekse omakse kuukse , kolmandenkymmenen enzimäzeh päivässäh jatka kui vai voit , nevvoi Oraskuu .- Atkalua älä varua , vie pidäy ruveta ruskottamah puuloin ladvoi , varustua linduloile pättävät puut da varvat , kudamih vois luadie kodikkahat pezäzet .
Nenga vellet vie vägikodvan annettas omii nevvoloi , ga Kevätkuu jälgimäi keskusti heidy da kyzyi :
- Ga ehtitähgo nosta heinat , halvastuo kukat , puutuo kevätkuduh kalat , gu lumet suletanneh vai Sulakun aigah ?Terväh rodieu kallis pruazniekku , Suuren pyhän loppu – Äijypäivy .A vähästy myöhembi tulou Voiton päivy .Pidäs , gu mua olis puhtas , gu oldas jo vihandat heinät da kaunehet kukat .Ettogo myöhästy ?kyzyi Kevätkuu .
Veikit kačahtettih toine toizeh da illokkahasti puhkettih nagroh :
- Älä jo varua , emmo myöhästy , kai ehtimmö omal aijal !Ristittyzil pidäy tiijustua tovellistu talvie , ammui mostu ei olluh .
- Onhäi moine ennustus – gu talvi ollou vilu , pitky , pakkaine da lumikas , sit kezä roih räkki , pädevy kazvoksile da ristittyzien huogavuondale .
Vuottamata pagin myös keskustui : velleksien čurah päi nelʹlʹottih täytty vägie valgeihut kaži da kirjavu koiru .Kaži hyppäi lähäzele krinčale da nʹuglahtih mittuohlienne nägymättömäh loukkozeh .Koiru azetui , jugieh hengastih da kurketti :
- Vod on urai kissi , nengozel kažiloin pruazniekkupäiväl gu varuau minuu !Ei tiijä , vikse , gu koirat jo ammui heitettih ahtistella kažiloi .Minä vai tahtoin händy hyvitellä da ozuttua , kui tuas čupus nouzou vihmu da lumipilvi .Olgah , toinah puuttuu hyvitellä Naizienpäivänke libo Maidopyhälaskunke .A pahas siäs häi nygöi pagei yhteltiedy dai peittihes kodvakse levon uale .Pidäy lähtie ičel peittosijuä eččie da muata vie kodvaine , kuni kevät ei tulluh .
Libui koiru juoksemah , ei kuulluh , kui keviän kuut-vellekset nagrettih :
- Kevät jo tuli , jo täs on , älä hätkie vierettelei !
A sit Sulakuu da Oraskuu loškattih kätty Kevätkuul da prostittihes , ei hyö oldu harjavuonnuоt pitkih da viluloih pahoih siälöih , varattih kylmiä da voimattuo .
A lundu vihmanke rubei toven panemah , da mostu karjua , kai puut da koit hävittih .Nosti Kevätkuu turkin kagluksen ylembi , šuapkan vedi alahembi oččah da lähti kualamah lumes , a kunne pani jallan – sih rodih pieni luhtaine .
Istujat saruan levon ual harakat hačatettih :
- Kačokkua !Kuunelkua !Kevät tulou !Nengozet jället jättäy vai Kevätkuu !
Kevätkuun jället. Suarnu
Livvi
New written Livvic
-
-
-
-
-
Libertsova, Valentina
Следы марта. Сказка
Russian
-
-
-
-
-