Texts
Return to list | edit | delete | Create a new | Statistics | ? Help
Natalja Sinitskaja. Kentjärven škola: 200 vuvven taival
Natalja Sinitskaja
Kentjärven škola: 200 vuvven taival
Livvi
New written Livvic
Vaste
jälles remontan piendiä kohendetus alazualas enzimäzes kerrokses meidy vastuau opastai Natalja Ivanovna Filina .Häi kävelyttäy meidy školan tiloi myöte , ozuttau kai da kerdou :
– Školan johtai tänäpäi tuaste on Kondupohjas .Häi meil aivin ajelou administratiivizii kyzymyksii sellittämäs .Häi vähästy myöhembä tulou , sellittäy Natalja Ivanovna .
Kuuluu kellozen soitto .Se ei ole elektronnoin kellozen soitandu , kuduah olemmo harjavunnuh .Kellostu soittau eräs opastajis – elektronnoi kelloine vie ei rua .Da se rounoku kiännyttäy meidy endizih aigoih , konzu Kentjärves škola vaste algai oman ruavon .
Zavodan ruadajien školas algu oli
Kentjärven vasken da čugunan valattamizen zavodan tyveh vuvvennu 1834 oli avattu škola zavodan ruadajien lapsih niškoi .Se ruadoi XX vuozisuan alguh suate .Sen jälles vuvvennu 1900 škola luajittih erähän muanruadajan taloih .Zavodan ruadajat da opastajat hommattih vuvvennu 1903 Kentjärven ministerstvan opisto .Sih aigah školas oli kolme opastajua da kolme ozastuo .Jogahizel ozastol opastettih puolitostu vuottu , kluasaspäi toizeh opastujat "siirryttih " kerran keviäl da toizen kerran talvel .Joga vuottu alaozastole tuli 25-30 hengie , loppuozastos oli tavan mugah 6-9 hengie .
Vuvvennu 1918 škola oli eroitettu kirikös da sit heitettih Jumalan zakonan opastamine .Kanzallizen voinan aigah škola eli jygielöi aigoi : ei täydynyh halguo lämmittiä škola , ei olluh černiliä , bumuagua , kirjutussulgazii .
Vuvvennu 1931 Kentjärven škola muutettih muanruadajan nuorižon školakse , kunne vuvven peräs luajittih keskiškola .Sih aigah školas ruadoi kymmene opastajua .
Voinan aigah opastamine školas oli suomen kielel , sendäh jälles voinua äijil opastujil tuli uvvessah kiändyö algukluassoih .Voinan jälles joga vuottu opastujua liženi .Ven’al kaikkiel seiččeivuodehine opastus rodih vältämätöi .Sendäh vuvvennu 1957 Kentjärveh oli nostettu uuzi seiččeivuodehine škola .
Meni aigu da vuvvennu 1982 kyläh vahnan školan rinnale luajittih uuzi kaksikerroksine škola , kudai nygöi kokottau mäil pedäjien keskes .
Tämänpäiväine elaigu
— Kaksi vuottu lapset opastuttih kahteh vuoroh , kuni školas piettih remontua .Toinah nygöi pädöy : yhteh vuoroh opastuo lämmis da valgielois kohendettulois kabienietois , ylbeilöy Natalja Ivanovna .
Tänäpäi školas on 19 opastajua da 132 opastujua .Enimät lapset ollah kentjärveläzet , ga 17 hengie tuvvah škola-autoubusal Dvorčan kyläspäi .Erähii lapsii školan remontan aigah vahnembat vejeltih opastumah Kondupohjan da Petroskoin školih .
— Uskommo , ku hyö tullah järilleh omah školah . Midäbo on lapsii tyhjiä taluo muijale , ku omas kyläs nygöi on hyvä škola , pidäy varmuttu Natalja Filina .
Kävelemmö Natalja Ivanovnan kel opastuspertilöi myöte .Huomuammo , ku kyläläzet lapset aivin luajitah tervehyön da nostah seizoi , konzu pertih tulou vakkinaine ruavas ristikanzu .
Lapset kerrotah , kui miellyttäy heidy uvvistettu kohendettu škola , uvvet pertilomut , uvvet kirjutuslavvat .
Syöndypertisgi on pietty remonturuavot .Syömizien keittäjät ozutetah meile laittehistot — kai ollah uvvet : lihan - da kazvoksienpilkottavat , päčit da plitat .Ongi nygyaigaine marmit-sistiemu , kudai pidäy syömizii lämmänny .Školan sydämes da sen ulgopuolel lapsien turvalližuokse on luajittu videotarkastuksen sistiemat .Školahgi piästes joga lapsel on oma "avain ".
Karjalastu mujuu keskeh
Kentjärven školas tässäh opastettih lyydin murrehtu .Sidä ruaduo mondu vuottu pidi Natalja Kruglova .Täl kuul Natalja Igorevna siirdyi toizele ilmale .Školan haldivo vie ei tiijä , ken ottavus sih ruadoh da jatkas sidä .
— Minuu kehoitetah , minähäi olen lyydinkarjalaine . Kieldy maltan da pajatin Petrovskois horas .Ga tiijä vie en , otammosgo , sanou Natalja Ivanovna .
Natalja Kruglova pidi školas suurdu ruaduo karjalan kielen da kul’tuuran juuroittamizekse .Karjalan kieli školas ei olluh urokannu , lapset käydih kerhoh kaksi kerdua nedälis kahtekse čuassuu .Nataljan piän al 12 lastu opastuttih kieleh , kezän aigua mennyt vuozin ajeltih kieliluageriloih .Natalja Igorevnan hyvyös školas sportulajikse oli otettu karjalan kyykkä-kriukku .Sidä ruaduo nikui ei sua hyllätä , jättiä kesken .
Lujat vezat lyydiläzien mual
Kentjärven škola ylbeilöy omii kazvattiloi .
— Yhtendestostu kluasas meil on 12 hengie . Uskommo , ku hyö hyvin piästäh läbi tutkindolois da kui endizetgi meijän školan loppenuot nuoret piästäh opastumah sinne , kunne heil himoittau .Arbuammo , ku kolme hengie voijah suaja medalit parahas opastundas , pidäy varmuttu Natalja Ivanovna .
On Kentjärven školan loppenuzien joukos kuulužua ristikanzua .Art’om Novičonok avai kaksi uuttu händytiähtie — P /2011 R3 (Novichonok-Gerke ) и C /2012 S1 (ISON ), on suannuh Edgar Uilsonan palkindon .Art’om ruadau Petroskoin yliopistos , on biolougien kandiduattu .Ilja Matrosov vie 16-vuodehizennu toizien nuorien joukos käi Pohjaisn’abah suate .Händy vallittih sih joukkoh Ven’an 600 nuores .Viktor Pellä on muuzikkumies , pianistu da pidäy konsertoi ymbäri muailmua .Nelli Kentjärven školan loppenuttu nuordu miesty suadih surman erillizes voinuoperatsies , on viestittäh kavonnuttu .
— Myö kazvatammo da opastammo meijän lapsii olemah hyvinny ristittyzinny , ruattahes da elettähes hyö hos kus , sanou Natalja Ivanovna .
Kentjärven škola: 200 vuvven taival
Livvi
New written Livvic
–
—