Texts
Return to list | edit | delete | Create a new | Statistics | ? Help
Nadežda Vasiljeva. Tulkua käymäh meijän kulttuuritaloh
Nadežda Vasiljeva
Tulkua käymäh meijän kulttuuritaloh
Karelian Proper
New written karelian
Ei
ole šalaisuš , jotta pienissä pos’olkoissa ta kylissä kaikenmoisie tapuamisie , tilaisukšie ta huvitukšie jo ammuin pietäh kulttuuritaloissa .Paikalliset eläjät rikeneh šanotah niitä vanhah tapah klubiloiksi .
Kulttuuritalon merkityš
Kyläläisien elämäššä kulttuuritalo on erityisellä paikalla .Še on kylän šielu , missä läpättäy kylän šytän ta missä näkyy kylän eloš šen iloineh , vaikehukšineh tai šuruinehki .
Jyškyjärven kyläššä šemmosena šytämenä , kaikkien tärkeimpien tilaisukšien pitämisen paikkana on kulttuuritalo .Pieni ta mukava klubi eläy omua vilkašta elämyä , ottau vaštah luovien ryhmien jäšenie harjotteluih , kuččuu kaikkien ikien kyläläisie luovih illaččuloih .
Jyškyjärven kulttuuritalolla on pitkä istorija .Še aina oli tunnettu omalla omaperäisyöllä , erosi erikoisilla keinoilla ruavošša vierahien kera .Kulttuuritalon ruatajat annettih erikoista huomijuo paikalliseh omaluatuisuoh , kerättih vanhemmilta eläjiltä ta šäilytettih ohjelmissa vanhoja lauluja , piirileikkijä , tanššija .
Näin kerran , yli puolišatua vuotta takaperin šynty kaunis ta kirkaš konserttinumero – Kuin kuvotah kankašta -piiritanšši .Šiitä tuli jyškyjärviläisien artistojen kunnivokortti .Tuomi-folkloriryhmän naiset tanššitah šitä nytki ta ei ammuin näytettih "Kuin kuvotah kankašta "? Koštamukšešša .Tämän tanššin jo monet luatijat šiirryttih tuonilmasih , ka tanšši eläy ta tuou iluo kaččojilla .
Klubin kollektiivit
Tuomi-folkloriryhmäštä pitäy šanuo erikoisešti .Še noušou esiintymäh lavalla jo yli 50 vuotta ,ta keräsi omah ohjelmistoh šuurta miäryä karjalaisie lauluja .Monta vuosikymmentä ryhmän johtajana on Raisa Ribakova , muamonkieleh ta karjalaiseh kulttuurih ehottomašti uškollini ihmini .Ammatiltah Raisa Ivanovna on šuomen kielen opaštaja , monie vuosie hiän ruato paikallisešša koulušša .Vapuana aikana hiän ruato Tuomi-ryhmän kera , valičči ohjelmistuo , piti harjotukšie – täššä häntä aina autto monivuotini ošallistumini ryhmäššä , himo näyttyä kaččojilla karjalaisien laulujen kaunehutta ta melodisutta .
Nykyjäh Raisa Ribakova on anšijoitunuolla levolla , ka jatkau ruatua kulttuuritalošša .
Kalevalan piirin kulttuurialan pienen rahotukšen takie ei šua makšua täyttä palkkua kulttuuriruatajilla .Ka pieneh palkkah kaččomatta aktiiviset naiset jatetah ruatuo luovien ryhmien kera , yritetäh šäilyttyä ta šamalla antua niillä uutta elämyä .
Monta vuotta tuou iluo kaččojilla Nadežda-lauluryhmä ta Kalina-tanšširyhmä (johtaja Teresa Lesonen ).Nämä yhtyvehet ollah kaikkien juhlatilaisukšien ainaset ošallistujat ta Jyškyjärven eläjät aina vuotetah vaštautumisie heijän kera .
Kulttuuritalon šuunnitelmie
Näinä päivinä kulttuuritalon kollektiivit valmistauvutah tulijih oraškuun pruasniekkoih .Perintehellisešti kulttuuritalošša pietäh konsertti Voitonpäivänä ta muissellah omamualaisista , Šuuren Isänmuallisen šovan veteraniloista ta niistä , ket ei myöššytty taisteluista .
Šamalla aikua artistat valmistauvutah kyläpruasniekkah .Šinä päivänä jyškyjärviläisien luokše tullah artistat Koštamukšešta , Kalevalašta , Luušalmešta , Borovoista : koko päivä kylästadionilla pietäh kanšanlaulujen , tanššien , kilpailujen marafoni , kumpani yhistäy kaikkie karjalaisen kulttuurin yštävie .
Vielä lähiaikoina kulttuuritalošša pietäh pieni ka tarvittava remontti .Kulttuuritalon katto on pahašša kunnošša ta šen takie konserttišali niise näyttäy nyt pahalta .Jyškyjärviläiset toivotah , jotta ruavot šuoritetah ruttoh ta kunnollisešti , jotta kulttuuritalon vierahat tultuo , šanakši perintehellisih illaččuloih , tunnettais iččie mukavašti .
Šemmoset illačut oli pietty vašta tuanoin .Niih keräyty vanhemman šukupolven ihmisie ta yläluokkalaisie – tyttöjä ta poikie .Aikuhiset ta lapšet mielelläh kuunneltih kertomukšie pohjoiskarjalaisien perintehelliseštä puvušta .Kertomah puvušta tultih Kalevalatalo-kulttuurikeškukšen spesialistit .Hyö vaššattih monih kyšymykših ta autettih koululaisie šuoriutuo kanšallisih pukuloih .
Lisäkši keräytynyöt arvattih , mitä merkityštä on karjalaisešša kesselissä šekä pieneššä musejopirtissä šäilynyillä esinehillä .Illačušša oli tanššijaki , missä kaikin opaššuttih perintehellisie kanšanpiirileikkijä .
Jyškyjärven kulttuuritalo eläy omua elämyä .Še kuot’t’elou ratkaissa proplemoja ta olla paikkana , mi on valmis ottamah vaštah eri-ikäsie ihmisie .Hyö šuahah tiälä hyvyä mieltä , iluo vaštautumisista ta aina šanotah :
– Näkeyvymmä kohta uuvveštah , meijän kulttuuritalo !
Tulkua käymäh meijän kulttuuritaloh
Karelian Proper
New written karelian
–