Texts
Return to list | edit | delete | Create a new | Statistics | ? Help
Jelena Ruppijeva. Himo ruadua tulou, konzu vastavut rahvahan kel
Jelena Ruppijeva
Himo ruadua tulou, konzu vastavut rahvahan kel
Livvi
New written Livvic
Karjalan
TV :n kanzalliskielizen toimituksen ruadai Ol’ga Ogneva on suannuh kaksi palkinduo Jaroslavl’as pietys V teleprogrammoin , videofil’moin da roulikkoin kilvas "Ven’an kuldaine rengas ".Jaroslavl’an matkan jälles pagizimmo Ol’ga Ognevanke kilbah da hänen ruadoh nähte .
– Ol’ga , hyvittelemmö sinuu moizien suurien palkindoloin suaduu . Oletgo enzimästy kerdua ottanuh ozua täh kilbah ?
– Passibo . Olen yhtynyh täh kilbah ennepäigi , ga vai kaksi kerdua piäzin loppukilbah voittajien joukkoh , mennyt da tänävuon .
– Mibo kilboi se on ? Ken ottau ozua sih ?Sanele sih nähte .
– "Ven’an kuldaine rengas " on kogo Ven’an teleprogrammoin , videofi l’moin da roulikkoin festivuali . Sidä pietäh vuvves 2018 lähtijen Jaroslavl’as .Tänävuon piettih viijes festivuali .Sen pidäjänny on valdivolline ruadivo - da tv-yhtymys "Jaroslavija ".Kuigi meijän valdivolline Karjala -ruadivo - da tv-yhtymys , se kuuluu kogo Ven’an ruadivo - da tv-yhtymykseh .Kilbah voijah yhtyö kui valdivollizien ruadivo - da tv-yhtymyksien ruadajat , mugai toizet rahvas .Kilvas on kymmene nominatsiedu .Jogahizes vallitah kolme voittajua .Tänävuon kilbah yhtyi 164 hengie 51 linnaspäi , hyö työttih 218 ruaduo .
– Sinun kilbah työtyt ozutukset oldih karjalan kielel , ga niilöis oldih tekstusanat ven’an kielel , ku net oldas kaikile ellendettävät . Oligo kilbailtavien ozutuksien joukos ozutuksii toizilgi kielil ?
– Ennepäi olen työndänyh programmoi karjalan kielel da niih oli pandu ven’ankieline tekstukiännös . Täl kerdua työnnin ven’ankielizen s’užietan , kudai ozutettih ven’ankielizis uudizis .Sih kilbah otetah ruadoloi kanzallizil kielil , vai pidäy olla kiännös .Parahien ruadoloin keskes tänävuon oli programmu baškirskoil kielel .
– Sinä olet suannuh enzimäzen palkindon Paras foto - libo videoblogmatku -nominatsies . Sanele omis ruadolois , omis ozutuksis , kudamii nenga korgiesti arvostettih .Konzu da kes net oli luajittu ?
– Täh nominatsieh voijah yhtyö vai loppukilbah piässyöt , ket tullah festivualin loppupidoloih . Ekskursieloin aigua kuvatut videot libo fotokuvat lyhyön tekstanke pidi panna heštegoinneh sotsiualuverkoh .Sit niidy sie kačottih kilvan pidäjät da vallittih kolme voittajua .Nenne kirjutukset ollah minun sivul VK-verkos .
– Sinun Vieljärves kuvattuu ozutustu hutun varustandas kačoimmo kaikin dai olemmo mieldynyh sih . Passibo suuri , ku olet juohatannuh tämän vahnan karjalazen syömizen .Varustatgo sidä iče da suvaičet go sidä ?
– Sen ozutuksen luajindan juohatti Karjalan Kielen Koin ruadai da Oma Mua -lehten toimittai Natalja Antonova . Häi on rakas keittämäh da syömäh huttuu .Nygöi aniharvat maltetah sidä keittiä .Enzimäi myö kuvaimmo Kotikokki-programman , kus Natalja opasti keittämäh huttuu .Jällespäi vie häi keräi rahvastu vahnembua polvie Vieljärvespäi da kielipezän n’apukkoi yhtes keittämäh da syömäh huttuu .Sit vastavukses kuvaimmogi s’užietan .Täs pidäy hyväl sanal mainita da kiittiä kuvuajua Igor’ Istratjevua da leikkuajua Alina Mališevua .Hyö oldih kuvuamas da luadimas s’užiettua yhtes minun kel .Iče opastuin keittämäh huttuu da opittelin sidä enzi kerran juuri kuvavuksien aigua .Passibo Natalja Antonovale , nygöi toiči keitän kois .Se on ylen magužu syömine , eigo valmistandah mene äijiä aigua .Vai pidäy olla karjua ruisjauhuo da razvastu kannatestu da argivoidu .
– Ainos mielihyväl kačommo kaikkii sinun ozutuksii . A misbo sinä iče rakkahembal sanelet rahvahale , mittumii ozutuksii suvaičet valmistua ?
– Karjalazis , rahvahas da kieles , tavois da perindölöis , istouries .
– Toimittajan leivis olii vikse jo edukädeh duumaiččou , midä rubieu ruadamah tuliel aigua , kes libo mis rubieu sanelemah . Mittumua pluanua sinul on tuliekse aigua ?Misbo vie himoittas sanella rahvahale ?Mittumua ozutustu olis mieldy myöte vie luadie ?
– Toimittajal ainos pidäy olla matkas da piä on ajatustu täyzi ainos . Yhtelläh en rubie vie d’uakuimah tulieloi pluanoi .
– Olet jo äijän vuottu ruadanuh TV :n da lehten toimittajannu , mi miellyttäy sinuu sit ruavos da mi innostuttau uuzien ozutuksien luajindah da kirjutandah ?
– Minule piälimäine dielo on ainos olluh paista karjalakse da pagizuttua karjalazii . Olen tännesäh ruadanuh sidä , kui maltoin .Täydynöygo minun ruadoigäh karjalastu vai siirdynemmögo kogonah omas ruavos ven’an kieleh ?Se minuu vaivuau .Himo ruadua tulou , konzu vastavut rahvahan kel .
– Ongo Jaroslavl’ah käyndy andanuh uuttu innostustu ruadoh ? Kui hätken olit sie da midä ehtiit kaččuo ?Mi painui mieleh matkan aigua ?
– Konzu kävyt moizih festivua-liloih , kačot , midä toizet ruatah da pagizet kolleegoin kel , ainos tulou himo ruadua ielleh , keksie midä-tahto uuttu . Tämän matkan aigua paras oli juuri vastavundu da paginat kolleegoinke , erähii heis jo ennepäi tunzin .Da Jaroslavl’an linnu , tiettäväine , painui mieleh .Sie on midä kaččuo .
Himo ruadua tulou, konzu vastavut rahvahan kel
Livvi
New written Livvic