Texts
Return to list | edit | delete | Create a new | Statistics | ? Help
Jelena Ruppijeva. Volont’uorat on avvutettu Kižin suarel kežäpruazniekois
Jelena Ruppijeva
Volont’uorat on avvutettu Kižin suarel kežäpruazniekois
Livvi
New written Livvic
Vastavuksele
Priäžän etno-kul’tuurukeskukseh tuldih rahvas , kudamat äijän ruatah oman kylän hyväkse da ollah enzimäzinny abuniekoinnu kaikis ruadolois da dielolois Priäžäs .Heijän joukos oli nuorembua da vahnembua polvie rahvastu .Jogahizele mieleh oli tiijustua , kui tänäpäi kehitetäh volont’uoruruaduo Kiži-muzein ruadajat .Täh ruadoh muzeis kiinitetäh suurdu huomavuo .Tovestuksennu sille on muzein uuzi tämän vuvven oraskuus rattahile pandu Rahvahan nerot : tapahtumuvolont’uoruruado
Karjalas -projektu .Sit projektas priäžäläzile tarkah saneltih sen todevuttajat Marija Fadejeva da Anna Anhimova .
VOLONT’UORURUADO OMAKSE
Omah uudeh projektah Kiži muzei sai kannatustu Ven’an kul’tuurufondaspäi Kul’tuuran volont’uorat -programman hantuzis .Sen piälimäzii tarkoituksii oli volont’uoruruavon kannattamine Karjalan tazavallas silleh , ku iče projektah yhtynyöt volont’uorat valmistettas da piet täs tapahtumii Kižin suarel .Projektah oppimah omii vägilöi volont’uoruruavos tuli 36 hengie eri Karjalan piirilöispäi .Kezäkuul heih niškoi oli pietty harjaittelu , kudaman aigua hyö tiijustettih volont’uoruruavon eričyksis .
Harjaittelun aigua suaduloi tiedoloi da maltoloi projektah yhtynyöt volont’uorat jo voidih ozuttua heinykuul da elokuul Kižin suarel .Juuri kezän aigu Kižin suarel on tapahtumien puoles rikas .Täl aiguahäi enne karjalazil , vepsäläzil da oniegutagavozilazil oli ylen äijy ruaduo .Ei sudre sanottu rahvas : "Midä kezäl keriät , sidä talvel tabuat ", "Kezäpäivy vuvven syöttäy ".Ruadua pidi äijy , ruattihgi projektah yhtynyöt volont’uorat .Hyö kuvattih vastua suarel , piettih heinargie , leikattih vil’l’ua , pestih buukkuu , varustettih hormuu čuajukse .
Nämmih ruadoloih hyö enzimäi harjavuttih iče da sit jo ozutettih niilöi pruazniekois Kižin suaren gostile .Huondekses ildassah räken aigua hyö maltettih ruadua joga matkailijoin joukonke .A suarele kävyjiä viijen pruazniekan aigua , kudamas oldih projektah yhtynyöt volont’uorat , oli nellitostu tuhattu hengie .Ruado ei olluh kebjei , ga kai Kiži-muzein tämänvuodizet abuniekat yhteh iäneh sanotah , ku vie kerran tuldas suarele .Heih niškoi se oli unohtumatoi kogemus da hyvä mahto tiijustua uuttu
oman kodimuan kandurahvahien perindölöis da tavois .
ABUNIEKKUA TARVITAH
Kiži-muzein ruadajien Marija Fadejevan da Anna Anhimovan sanoin mugah muzein tapahtumih alalleh tarvitah abuniekkua .Aktiivine matkailukauzi algavuu suarel oraskuus Muzeiloin yön aigua da loppuu sygyzyl Pokrovannu .Suarel pietäh moizii suurii da kuulužii tapahtumii , kui Kižin reguattu , Kiži Run-juoksut , Suuri buukku-päivy , Suuri kalafestivuali , kudamis volont’uoroin abuu tarvitah enimäl .Talvelgi suarel da linnas on omat tapahtumat – muzeis pie täh Uvven Vuvven pruazniekkua , Maidopyhälaskuu , Art-zima vahnas linnas -pruazniekkua Giperboreja-festivualin hantuzis da monii toizii pidoloi .
– Petroskoisgi myö tarvičemmo abuniekkua . Jälgimäzen kahten vuvven aigua Art-zima - dai Vahnan linnan il’l’uuziet -pruazniekkoi piemmö volont’uoroin avul .Pruazniekkoin aigua ruadau mondu pajua rahvahan perindöllizien ruadoloin mugah .Nelli čuassuu kestäjäs pruazniekas meil on läs viittytuhattu hengie kävyjiä .Enimät tarvitah abuu .Yksile pidäy sellittiä , mi täs tapahtuu , toizile pidäy avvuttua ostua lippu libo ozuttua , kus ruadau seppy , sanelou Marija Fadejeva .
Priäžäs pietyn vastavuksen aigua Marija Fadejeva da Anna An himova potakoittih priäžäläzii volont’uoruruadoh , tarkah saneltih sit da mainittih kuulužua dobro .ru -verkosivustuo .Tämän verkosivuston kauti volont’uorat voijah eččie ičele ruaduo da volont’uoroin abuu tarviččijat voijah löydiä abuniekkua aktiivizien ristikanzoin joukos .Kiži muzein ruadajat käytetäh tädä resursua volont’uoroin eččijes , muzein sivuloilgi sotsialiverkolois ilmoitetah vakansielois .
– Meigäläzil on hyvä mahto puuttuo volont’uorakse muijalegi , sanommo , Moskovan libo Kazanin tapahtumih . Karjal on hyväl čotal volont’uoruruavos , tämä ruado on kehitynnyh tazavallas Karjalan volont’uoruruavon kehitys-keskuksengi hyvyös , kudaman johtajannu on Darja Makovetskaja , lujoittau Anna Anhimova .
Tuliekse 2023 vuottu Kiži-muzeis on reknailtu pidiä rekordumiäry tapahtumua – nellikymmen kaheksa .Ku roinnou himo avvuttua niilöis , oletto terveh tulluot .
Volont’uorat on avvutettu Kižin suarel kežäpruazniekois
Livvi
New written Livvic