Texts
Return to list | edit | delete | Create a new | Statistics | ? Help
Hebozel kellozienke
Hebozel kellozienke
Livvi
New written Livvic
Vuvvennu
1988 oli suuri roindupäivypruazniekku – 100 vuottu täytyi karjalazel runoilijal Jalmari Virtazel .Alavozen souhozu , silloi sen johtajannu oli Aleksandr Titov , yhtes tazavallan Kniga-liitonke perustettih Virtazen literatuurupalkindon .Sen kilvan oli voittanuh Vladimir Brendojev , häi puutui enzimäzekse laureatakse .L’udmila Aleksandrovna Gerasimova , kudai oli silloi piäzootehniekannu , mielihyväl mustelou sidä tapahtumua .Toinah hänen sanelemizes tiijustammo midägi uuttu runoniekkah niškoi .
– Myö emmohäi petties vallinnuh enzimäzekse laureatakse Vladimir Brendojevua . Myö luvimmo hänen runoloi lehtis da kniigazis .Net oldih mieldy myö hierulazile , kuduat ruattih muatalovuos .
Konzu piettih vastavus souhozan spetsialistoinke , Vladimir Jegorovič vähäzen saneli iččeh elaigah da tuotandoh nähte , a sit rubei kyzelemäh muatalovuon elaigua .Silloi myö saimmo hyväs ruavos äijän palkinduo : Ruskiedu flaguu , kunnivomerkii , puutuimmo VDNH-ozutteluh .Runoilii tiijusteli , kui myö piäzimmö nengozih tuloksih , kui kazvatammo žiivattoi , kazvoksii , midä da kulleh strojimmo .Tahtoi tiediägi kanzukundua : äijygo souhozas ruadau valgoven’alastu , ven’alastu , karjalastu , ukrainalastu da kui hyö pietäh yhtevytty keskenäh .
Konzu tuli aigu ajua zavodan syöndytaloih poikki kyläs , Vladimir Jegorovič sanoi : "Minul puutui ajella laivoil , mašinoil , poujezdal .Ettogo vois ajeluttua minuu hebozel "?Minuu piettih vahnimannu heboloin kaččojannu , gu ylen äijäl suvaičin nenii žiivattoi .Sit val’l’astin kaikis raviemban Planeta-hevon , čomendin vembelen kalkalozil , riputin kellozet .Regeh panimmo pehmien od’d’ualan da čoman kattien .Kučuimmo soittajua soiton kel , oli moine Koverskii .Tässäh ovvostan , kui mies jo nengozis ruavahis vuozis ruohtii , ei varannuh istuokseh regeh , vikse oli ylen rohkei .
Ajajes tahtoi paista ristittyzienke , kuduat puututtih vastah , käski azettua .Rahvastu äijy lähti kodiloispäi kellozien da soiton iäneh .Järilleh tulles Brendojev käski ajua kirkieh , gu suas tunnustua , kui voibi hevol ruttoh ajua .Jälles Minä suvaičen -runos kirjuttai käytti nengozet sanat : "Suvaičen Anukseh siirättiä ajua " – toinah mustoitti sen ajelendan , sidä vedäjiä Anukseh dorogua myöte .
Konzu tuli eruonduaigu , Vladimir Jegorovič ylen äijäl kiitti lämmäs vastuandas , kaikis enimäl hebozel ajelutandas : "Nengomua iluo minul ijäs ei olluh , kui tämä hebozel ajelendu ", sanoi mies .
Nengoine meil oli vastavus da nengoine oli meijän runoilii , omamualaine Vladimir Jegorovič Brendojev , äijäntiedäi , tiijonhimoine , pättävy , rohkei , eihäi sudre händy sanottih "Anuksen Jesenin ".
Hebozel kellozienke
Livvi
New written Livvic