Texts
Return to list | edit | delete | Create a new | Statistics | ? Help
Šašina Maria . Rahvaz kodvi ičeze kodikelen tedoid
Šašina Maria
Rahvaz kodvi ičeze kodikelen tedoid
Veps
New written Veps
Sulakus
mäni jogavozne akcii – "Diktant karjalan da vepsän kelil ".Petroskoin eläjad kirjutiba diktantan Karjalan da vepsän kirjkelen päiväl .Akcijaha ühtniba ristitud toižiški lidnoišpäi da külišpäi .Sen tegii om Karjalan rahvahaline da regionaline politikan ministerstv .
Tradicijan mödhe 20. sulakud Petroskoiš vedetihe jogavozne akcii – "Diktant vepsän da karjalan kelil ".Petroskoin universitetan kirjišton zal oli täuzʼ adivoid .Sinna tuliba ned , ked opendaba kelid da tahtoiba kodvda ičeze tedoid , a mugažo ned , ked navediba ičeze kodikelʼt da tahtoiba kaita sidä .Akcii avaižihe karjalaižil pajoil , miččid pajati Karjalan Rahvahaližen teatran artist Nikita Anisimov .Akcijan vedäjad sanuiba kaikile tulnuzile tervhensanoid .Karjalan rahvahaližen da regionaližen politikan ministerstvan radnikad da Petroskoin universitetan opendajad toivotiba kaikile hüvid satusid keliden opendamižes da kaičendas .
Diktantad voi kirjutada vepsän kelel da koumel karjalan kelen paginal – livvin , lüdin da pohjoižpaginal .Ken-se tuli kirjutamha ezmäižel kerdal , ken-se tuleskeleb kaikuččel vodel .
– Vepsän kelʼ om minun ezitatoiden kelʼ . I sikš kirjutan diktantan vepsän kelel .Minun täht nece om tradicii , sikš ühtnen neche azjtegoho kaikuččel vodel , nacein , viž vot .Meletan , miše nece om tarbhaine azj , – sanui Irina Popova , akcijan ühtnik .
Aleksei Solovjov om opendanu kursil karjalan kelen livvin paginad jo koume vot .Kaikuččel vodel hän kirjutab diktantad .
– Olen venälaine . Minun vanhembad oma Kesk-Venämalpäi .Minä olen sündnu Belorussias , kazvoin Petroskoiš i lugen Petroskoid kodilidnaks .Minä navedin Karjalad da sen tradicijoid , sikš zavodin opeta karjalan kelʼt .Minä kirjutan diktantan jo koumanden kerdan .Tahtoin kodvda ičein kelen tedoid , – sanui Aleksei .
Täl vodel diktantan täht oli valitud Vladimir Brendojevan "Kylʼmil "-starinan pala .Nece om jubileivoz’ : karjalaižele runoilijale da kirjutajale täuduiži 95 vot .Vladimir Brendojev rohktas kirjuti runoid da starinoid livvikš – ičeze kodipaginal – i muga kehitoiti karjalankelišt literaturad .
– Om hüvä , miše diktantan tekstaks om valitud Vladimir Brendojevan starin . Oli jüged , no melentartušt käta tekstan karjalan livvin paginaspäi pohjoižpaginaha .Minä meletan , miše diktantan abul ristitud , kudambad opendaba vepsän kel’t , karjalan kelen pohjoižpaginad , tverin da livvin paginoid , voiba tundištadas livvin paginan literaturan klassikanke – Vladimir Brendojevanke .Voib olda , erased heišpäi tahtoiškandeba lugeda Brendojevan runoid da prozad , – sanui Uljana Maksimova , Karjalan kelen pohjoižpaginan opendai da diktantan tegii .
Petroskoin ližaks diktant kirjutadihe enamba , mi 70 tahos : Karjalan municipaližiš rajonoiš , Piterin da Vologdan agjoiš , a mugažo Tverin oblastiš .Ken ei ehtind tulda akcijale , voi kirjutada diktantad kodiš .Tekst lugetihe Karjalan TV :n efiras , necidä videod voib kacta internetas .
– Diktantan akcijaha ühtneb enamb tuhad ristitud , hö tahtoiba ozutada ičeze tedoid da kodvda niid . Minun melen mödhe , nece om tärged .Akcijan pätegend om ozutada , miše karjalan da vepsän keled oma eläbad .Kelid opetas , niil pagištas televidenijal , radiol , pästtas kirjoid , žurnaloid , lapsed opendaba kelid školiš , rahvaz iče opendab kelid .Se om hüvä , – sanui Jelena Migunova , Karjalan rahvahaližen da regionaližen politikan ministerstvan Igähižiden rahvahiden valdkundan tugen erišton pämez’ .
Kaikutte akcijan ühtnik sai sertifikatan , miččes om kirjutadud balloiden lugu .Vepsläižiden keskes oliba ned , ked saiba parahimad arvznamad – 100 balad .
Rahvaz kodvi ičeze kodikelen tedoid
Veps
New written Veps