Texts
Return to list | edit | delete | Create a new | Statistics | ? Help
Kuznecov Maksim . Paginad vepsläižiden polhe suriš Venäman lidnoiš
Kuznecov Maksim
Paginad vepsläižiden polhe suriš Venäman lidnoiš
Veps
New written Veps
Sulakun
lopus Moskvas mäni lujas sur’ azjtego – "Tedo . Ezmäižed " -tedotelendmarafon .Neche marafonha ühtni äjakse tuhad norišton ezitajad kudambad kundliba Kreml’an valdmehiden lekcijoid .Mugažo marafonan aigan radoi Venäman rahvahiden sebruden universitetan lavut .Sil minä starinoičin adivoile vepsläižiš da vepsän keles .
Ezineda Venäman pälidnas läz Kreml’ad surel forumal ühtes korktoiden valdmehidenke om lujas sur’ arvostuz !Ezinijoiden keskes oliba Venäman päministr Mihail Mišustin , Venäman Varumatomuden Nevondišton varapämez’ Dmitrii Medvedev , Venäman varapäministr Dmitrii Černišenko , Venäman oiktoiden investicijoiden fondan pämez’ Kirill Dmitrijev .Mugažo norišton edes eziniba popul’arine baškiralaine "Ay Yola " -grupp ,"Buranovskije babuški " Udmurtiaspäi , matknik F’odor Kon’uhov da toižed .Kaik hö oliba surel scenal , a minä olin penel – 29. sulakud , konz sigä mäni Venäman rahvahiden sebruden universitetan Patris Lumumban nimel radnikoiden dokladoiden päiv .Neciš voimuses pidab sanuda sur’ spasib minun pämehele da tedo-ohjandajale Aleksei Arzamazovale da RUDN :an Venäkelen institutan pämehele Natalja Pomorcevale .
Nügüd’ minä paksus vedän lekcijoid , ičein kirjoiden prezentacijoid erazvuiččiš lidnoiš , eskai ezinen pajoidenke .18. sulakud Piteriš lugin lekcijan karjalaižiš , vepsläižiš da heiden keliš "Ligovskaja "-kirjištos . Minä tundištoitin kundlijoid vepsän kelenke da vepsläižidenke – kus hö eläba , miččed keled oma vepsän kelen sugukeled .Starinoičin , miše vepsän keles om koume paginad : pohjoižvepsän pagin , miččel pagištas Karjalas Änižjärven randal , keskvepsän pagin , miččel pagištas Piterin agjan päivlaskmpoles da Vologdan agjan päivnouzmpoles , da suvivepsän pagin , miččel pagištas vaiše Piterin agjan Boksitogorskan rajonas .No mugažo , kut kaik mö tedam , vepsän kelel om kirjkel’ , miččen tegi kel’tedomez’ Nina Zaiceva da miččel kerdan kus lähteba eloho "Kodima "-lehtez , kerdan vodes – "Verez tullei "-al’manah da kerdan kvartalas – "Kipinä "-žurnalan vepsänkeline nomer .Om melentartušt , miše pohjoižvepsläižed sanuba "hö kuctaze ", keskvepsläižed sanuba "hij kuctas ", a suvivepsläižed sanuba "he kucuba ", no pidab kirjutada "hö kucuba ": vepsän kirjkel’he mülüba erazvuiččiden paginoiden pirdad .
Paksus , konz vedetas keliden mastar’-klassoid , sanutas , kut necil kelel oma "Tervhen !", "Spasib !", "Nägemoiš !" da m . e .Minä meletan , miše nece ei ole lujas melentartušt , i sikš ozutan , kut vepsän keles kuluba "minä ", "sinä ", "hän ", "mö ", "tö ", "hö "-pronominad , da sen jäl’ghe sel’genzoitan , kut pidab kändelta verboid prezensas – pozitivižes da negativižes formiš .Mastar’-klassan adivod , kudambad ei tednugoi vepsän kel’t , minun abul saneliba "minä lugen ", "sinä luged ", "mö kirjutam ", "mö em kirjutagoi " -tipižid frazoid , i kaikile nece oli lujas mel’he .Ezitusen lopus lugin runon vepsän kelel ičein "Elo "-kogomusespäi da pajatin otegen Anna Astin "Baroidme "-pajospäi , miččen konz-se olin kändnu vepsäks .
Dokladan jäl’ghe viž ristitud sanui minei , kut melentartušt heile oli kundelta mindai .Heiden keskes oli üks’ čoma neižne , kudamb sai minun kogomusen lahjaks .
Paginad vepsläižiden polhe suriš Venäman lidnoiš
Veps
New written Veps