Texts
Return to list | edit | delete | Create a new | Statistics | ? Help
Natalja Sinitskaja. Uuttu paikannimie: kummua sanot — nagra et
Natalja Sinitskaja
Uuttu paikannimie: kummua sanot — nagra et
Livvi
New written Livvic
Kanzallizen
da alovehellizen poliitiekan ministerstvan tilois oli pietty vuoronmugaine Karjalan piämiehen tyves toimijan karjalazien , vepsäläzien da suomelazien edustajien istundo .
Täl kerdua paginal oldih meijänkielizet laitoksien nimet da karjalazien kylien kehitys .Uuzis paikannimilöis , kudamis käytetäh meijän kielii , saneli Jekaterina Zaharova , Kielen , literatuuran da histourien instituutan kieliozaston piälikkö .
— Karjalan , vepsän da suomen kieldy käyttäjes da omile laitoksile nimilöi andajes biznesmiehet puaksuh luajitah hairahtuksii . Se koskou meijän kielien sanoin kirjuttamistu da keksimisty .Erikseh kirjutetah sanoi , kudamii pidäs kirjuttua yhteh , sanommo – Kala Ranta .Toiči heile mieleh juohtuu mostu nimie , kudamua ni ole ei meijän kielis — Muama Maaga .Biznesmiehet väitetäh , ku karjalakse se tarkoittau Muaman mägi /Muamanmägi .Moine ajatus oli nimen keksijöil , kuduat luajitah juustoloi , ga kirjutettih hyö oman laitoksen nimen muga , ga ni ellendiä ei sua , sanoi istundos Jekaterina Zaharova , paikannimilöin tutkii .
Nagratuttau vai itketyttäy ?
Oli tutkijan ezitettylöin nimilöin keskes Hiiden lihas keitetty liemigi .Rohkenisgo ken meigävelles oppie tämänmostu rokkua ?Sen hämmästyttävän syömizen rinnal tarittavu Lohikeito (yhten t :n kel ) jo ei muga varaita .
— Ristikanzu , kudai ellendäy libo maltau meijän kielii onnuako ei äijäl usko moizii kehoituksii da alguhpanoloi , jatkau Jekaterina Zaharova .
Ongi karjalan -, vepsän - da suomenkielizien paikannimilöin keskes hyviä da pättäviä — kafee "Koivu ", buaru "Hirvi ", turistutaloi "Kodikas ", ruadopaja "Tyyli ", leibypastamo "Oma Leipomo ".
— Myö ellendämmö , ku omile firmoile meijän kielil nimilöi keksijes biznesmiehet tahtotah kuhkuttua paikallizii eläjiii da turistoi omah ruadoh , omih tavaroih da palveluloih . Yhtelläh sidä ruadua pidäy vagavah da älykkähästi , ku uvvet nimet ei nagratuttas da hämmästyttäs kieldymaltajii .Toizekse , moizis pädemättömis da tolkuttomis nimilöis on pahuttu Karjalalegi .Se pahendau tazavallan stuatussua , pidäy varmuttu Jekaterina Zaharova .
Nevvostolazien mieles , biznesmiehile , kuduat turistoin da omien palveluloin käyttäjien kuhkuttamizekse käytetäh karjalua , vepsiä da suomie , pidäy enämbäl kunnivoija meijän kielii da nimilöi andajes kyzyö nevvuo kieliniekoil .
Tarittuu ni koiru ei syö ?
Kielentutkijat da kielenmaltajat tarittih dai taritah abuu niilöile , ket tahtottas panna omale firmale meijänkielizet nimet .Yhtelläh enimät eibo kuulta nevvuo .
Viäräh keksityt da kirjutetut paikannimet vois kebjieh kohendua .Sanommo , viäräs Talo Joki-nimes vois luadie oigei Jokitalo libo Joki-talo .Talo Rinda -nimen sijah vois ilmestyö olgei Rindatalo libo Rinda-talo .Jarvi da Talvi-Kesa kerras roittas oigiet da čomat , vai pane tiettylöin kirjaimien piäle čökkiet — Järvi da Talvi-Kesä .Meličujarvi kebjieh rodies karjalazekse kirjaimien ližemäl da hairahtuksien kohendamal — Melliččyjärvi .
Huomivoh ottajen sidä , ku äijät paginal olijois laitoksis käytetäh valdivon abuu omua biznessua kehittäjes — heidy opastetah valdivon varoih , kučutah projektoih , autetah Luajittu Karjalas -merkin suajes — heil pidäs enämbäl kuulta kieliniekoin nevvuo da olla vuardamata kandukanzoin kielii .
Sanommo , Mua Čola -kondiiterskoin emändy , tverinkarjalaine , sanoi , ku nareko kirjuttau oman laiktoksen nimen kaksi sanua erikseh , hos tiedäy , ku pidäs kirjuttua yhteh .Händy , näit , muga enämbäl miellyttäy oman laitoksen "logo ".
Tugikohtat — tuvekse da kehityksekse
Istundos Karjalan ekonoumizen kehityksen varaministru Aleksandr Lomako kerdoi , kui täytetäh federuallizen keskuksen käskylöi tugikohtien kehittämizekse .
Federuallizeh tugikohtien luvetteluh kuuluu Karjalan 19 eländykohtua , tazavallan luvetteluh — 50 eländysijua .
— Vuodessah 2030 nämis vallittulois tugikohtis elaijantazo pidäy korrendua 30%, vuodessah 2036 — 60%, sanoi Lomako .
Tugikohtien kehittämizeh kuulutah opastus -, kul’tuuru - da tervehyslaitoksien , tielöin , silloin , vezisistiemoin kohendamine , guazun suandu eländykohtih , lahonnuzien kodiloin eläjien muuttamine uuzih tiloih , ruadokohtien luvun suurendamine da muut ruavot .
Mennyt vuon luajittuloin ruadoloin luvettelus Lomako nimitti Pyhärven kul’tuurutaloin sähkösistieman azettamizen , Kentjärven školan perustehellizen remontan , Vieljärven 989 metrin pitkän vezibutkisistieman kohendamizen , Rukajärven školah autoubusan ostamizene da äijät toizet ruavot .
Aleksandr Lomako kiitti nevvostolazii da Karjalazien X kerämön vallittuloin nevvostoh kuulujii avus tugikohtien luvettelun luajindas da materjualoin keriändäs .
Uuttu paikannimie: kummua sanot — nagra et
Livvi
New written Livvic