Texts
Return to list | edit | delete | Create a new | Statistics | ? Help
Nikolai Filatov. Leiby-suolu syöjile
Nikolai Filatov
Leiby-suolu syöjile
Livvi
New written Livvic
Mieros
kävelles moneh kerdah olen nähnyh da kuulluh kui armas , kallis on rahvahal oma karjalan kieli .Minä sen avul monii vuozii piädy elätin , pagizuttelin sadoi karjalazii .Ylen harvah heijän keskes löydyi jo elähtännyh ristikanzu , kudai oli "unohtannuh " oman kielen .En usko moizii miehii , kuduat nuorennu paistih , a mieroh lähtiettyy kerras unohtettih oma kieli .
Olin kerran talvel tulizel pakkazel ruadomatkal Lendieran meččyniekkoilluo .Midälienne perevyi meijän mašin i pidi kiändyö paikallizien nerokkahien konemiehien puoleh abuu kyzymäh .Viga löyttih terväh , pakkaine oli viäryniekku .Tutustuin Vas’a-miehen kel , kudai oli auttamas meidy .Paginas sai ellendiä – häi on karjalaine da vie oli kazvanuh Suonan bokkukyläs , 15 kilometrin piäs minun kodikyläs Kolatselläs .Olimmo kuulluh toine toizeh näh , kui sanotah , yheksä hyviä , kaheksa kaunistu .
Yhtelläh vastavuimmo enzi kerdua .Hätken tarattelimmo , tiettäväine , omal kielel , yhtehizih tuttavih näh , sen päivän eloksen hyvis dai kaikis puolis .Olin ennepäi kuulluh , ku tämä mies on vähäsanaine , a nygöi "papatti " yhteh palah , harvah andoi minule sanan välih čökätä .Murginaigu loppih , garažan rahvas levii ken kunne , minun paginkanzu jäi syömätä .Kiitin Vas’ua paginois , jo tahtoin kätty loškata , kačon , ga mužikku täydyi kyynälih , tartui minun käzivardeh da virkoi : "Kol’a-rukku , nukka vie kodvazen pagizemmo omal kielel , en musta , konzu jälgimäzen kerran nengaverran pagizin .Tiä ei ole kenen kel paista , kerdu rahvas on kerävynnyh uvvel meččymual eri puolilpäi Nevvostoliittuo , a karjalastu on kaksi-kolme kaikkiedah ".Hätken jatkoin paginua miehen kel , kudual oli armas oma kieli .
Raadivotoimittajan ruavos oli tärgei suaha ristikanzu pagizemah , virittiä pagin .Eihäi sudre paista : hyväh sanah leppy lämbyy , pahah – tuomi katkieu .Kui sinä kiänyt ristikanzan puoleh , moizengi vastavuksen suat .
Enzi kerdua vakkikohtah mendyy , en kerras jiävinyh omua kieldy , se toiči autoi ihan kerras piästä putin tuttavakse .Anuksen souhozan Puutilan briguadas oli kuulužan Roza Aleksejevna Mikkojevan kapustankazvattai rahvas .Nygöi ečitäh rajantagastu neruo , kui suaha 300 – 400 tsentnerii gektuaral , a silloi , vuottu 30 tagaperin , anukselazet suadih piäl 700 tsentierin joga gektuaral .
Oli aigazen keviän viilei huondespäivy .Naizet , heidy oli piäl kymmendy , kerävyttih huogavuspertih lämbiemäh da čuajuu ryyppiämäh .Sinä piän hyö istutettih kapustan taimenuzii mudapadazih .Jo senčois kuulin karjalan kielel : "Mibo šliäppypiäherroi tulou nahkureppu olgupiäl ".Kynnykses piäliči harpattuu luajin tervehyön ven’an kielel : "Hleb da sol’ ".Tervyöle kerras ei vastattu , midälienne nagrahtettih erähän inehmizen sanoin periä .Toistin uvvessah ven’akse .Täl kerdua kuulin kirmeikielizet sanat : "Anna seisou kodvazen uksičupus , sit kučummo stolah ".Syrryin karjalan kieleh : "Terveh teile , leibysuolu syöjile .Etto tahtone stolah kuččuo , sit pidäy vastata nenga : Istoi , ristikanzu syömäh stolua kohtah golbečan piäle , sellin stolah , ezin ikkunah ".
Kodvazekse taloin vägi vaikastui , ku ei voinnuh ni vuottua ven’alazespäi nengomua vastavustu .Vastebo sit kaikin röhähtettih nagramah , a se kirmeikieline hyppäi eččimäh minuh näh kuppii , toizet kerras löyttih kunne istuttua kuččumatoi gost’u , tarittih omii evähii .Jälles sidä käyndykerdua Puutilan kapustan kazvattajat ainos löyttih minule , kui sanotah taloin mielen hyväkse , kuppi čuajuu da kaksi palastu zuaharii .
Leiby-suolu syöjile
Livvi
New written Livvic