Texts
Return to list | edit | delete | Create a new | Statistics | ? Help
Nina Zaiceva. Sit' - sarnaline jogi. 07.pala
Nina Zaiceva
Sit' - sarnaline jogi. 07.pala
Veps
Händikahuzid kandoi
Hanh’ .Mecživataižed sirdlihe havados , künzihe , hilläšti vinguiba .
– Sinä kacu hüvin , miše ned ei rebitanugoi havadod , – sanui Hanh’ Tol’aižele .
Tol’ka ei pästand sil’mid neciš arvhavadospäi .
Hö ei männugoi völ kaht kilometrad pezaspäi , kut prihaižed kulištiba tuskaližen , pitkän ulaidusen .
– Nece emä om , – sanui Hanh’ , homaites , miše händikahan homendezpajo oli madalamb i kauktemb .
– A ei-ik se mäne meiden taga ? Ved’ se tedab , miše mö otim poigaižid .A ku jokseb meiden jäl’ghe ?
– Ala varaida , mö rikom sidä kirvhel .
– Ka , rikod ! – Tol’ka pöl’gästusiš kacui tagaze . – Sil oma mugoižed hambhad ... Paremba puhu libuda !
– Ka libu , ku tahtoid . A minä lähten kodihe .
Hanh’ uskoi , miše händikahad ei rohtkoi lodas heiden päle i ei tahtoind pagišta neciš .Hän pidi päs , kut hän kazvatab händikahuden , kut käveleškandeb senke mectamaha , kut opendab sidä varjoita lehmfermad .Siloi mamale ei pidaška ištta märgäs vilus ferman komnatas .Ka i voib tehta erazvuiččid azjoid , konz sinai om mugoine händikaz-koir .
A Tol’aižele oli muga opak kulda necidä händikahiden öpajod , ka hän ei voind astta vaitti .
– Kule-ške , Hanh’ , a midä sinä tahtoid ostta premijale , miččen sad händikahuziš ?
Ved’ sinei anttas kuz’kümne rubl’ad !Voib ostta velokezran …
– Minä ičein händikahuden kazvataškanden , – sanui vastha Hanh’ .
– Jose kazvataškanded ? – Tol’aine čududelihe , kut hänele ei tulend pähä nece loštai idei – kazvatada händikahut . – Ik kazvataškanded molembid ?
– Minä sanuin – minun ! Üks’ händikahut om sinun , mö ühtes pezaspäi saim ...
– Ik tozi ? A minä meletin , miše sinä otad molembid .Pezan-se sinä löuzid .Ku andad ühten minei , ka minä-ki kazvataškanden , dressiruiškanden .
– Kacu mitte kazvatai ! Holdu , miše sinun tataiž händikahut vodkale ei vajehtaiži .
– Ka nimidä . Minä peitän sidä hüväs tahos .
– Keda peitäd ? Tattast ?
– Händikahut ! Vai sanun , miše nece om ani arvokahan koiran poigaine .Hän nikonz ei nägend händikahid .
– Sanu . A minä en vargastand sidä , a iče pezaspäi sanu olen .
– Ka sinei midä ! Sinä iče oled ižand .
Prihaižed rigehtiba kodihe , a heiden jäl’ghe kului tuskikaz händikahiden pajo .
Hanhen endustuz todenzui .Semendkun toižel päiväl hänen tataze , habi seištes jaugoil vodkaspäi , tembaiži händikahuden tagalapas i iški pertin saumaha .
– Koumekümne rubl’ad – dengad oma . – Hän taci händikahuden sarajaha . – Ala koske sidä , pän heitän , – sanui hän Tol’aižele , kudamb seištes vauhan modonke oli vaumiž tactas tatan päle .
I sen-žo ehtan Tol’aine läksi pos’olkaha .Semendkun koumandel päiväl školas ei olend urokoid , i hän tahtoi paremba olda tühjas internatas , mi kodiš tatanke , kudamb job nenile dengoile , miččid völ ei sand riktud händikahudes .
Sit' - sarnaline jogi. 07.pala
Veps