Texts
Return to list | edit | delete | Create a new | Statistics | ? Help
Nina Zaiceva. Sit' - sarnaline jogi. 08.pala
Nina Zaiceva
Sit' - sarnaline jogi. 08.pala
Veps
Heinuses
om pimed i vuine .Mujub vastoile i hirile , muloižele heinäle .
Piluihe tuleb päivänvauged .Sen sinižiš jonoiš , miččed kuti čapoiba hämäräižen , lendiba säskuded , nägub lendai pölü .
– Ka naku , Kaizer , möst homendez tuli ! – sanui Hanh’ , sibitades hahkan händikahan rindad . – Möst pidab sömäd ecta . Sanutas , miše kondjanpoigaižed kaiken söba , a sinä valičed .Sinei lihad anda !
Kaizer , sur’päine i levedlapaine , kužuižen igäs jo koiransuruine , kacub sarajan čogaha .Om jüged el’geta , kuleb-ik se , miš sanui ižand .
– Sinä naku midä , – jatktab Hanh’ , – sül’ge lihaze i sö kalad ! Siš om äi fosforad , öl paremba näguškanded .
Kaizer hilläs kärauzi pän , kucuhti Hanheze i möst kacuškanzi čogaha , kuti midä-se kulištades .
– Min korvad panid püštti ? Tedan , mamoi astub fermaspäi , maidod kandab .
Kaizer vingahti hilläšti , libui , jügedas polgi levedoil lapoil .
Teravas Hanh’-ki kulišti maman rigehtijad haškud .Mamoi tuli ösmenaspäi .Kaizer vingahtaškanzi komedamba .
– Ala vingu . Sijal !Nügüd’ ton söda .
Darja , korged kazvol , laih naine väzunuden kacegenke , kudamban modol eliba vaiše mustad sured sil’mäd , judahti vädran laučale i sanui :
– Lemboi otaiži sinun Kaizerad i sindai senke ühtes !
– Midä möst ? – sanui Hanh’ i kacauzi vädraha . Maidod oli ani vähä , litrad kaks’ .– Jose ed voind enambad toda ?
– Kuspäi otan enambad ? Meiden nece pämez’ kidastaškanzi : "En anda maidol händikast sötta !"
– A midä , om-ik hänele žal’ . Mö em otkoi muite , dengoid maksam .
Hanh’ valoi maidod levedaha raudastjaha , murenzi sinna leibäd , konz mamoi ei nägend , pani sinna luzikaižen saharad i läksi sarajale .
– Naku sö ! – hän andoi astjan händikahale . – El’gendan , miše vähähk om , no midä teged . Necile jomarile om žal’ maidod sinun täht ...
Kaizer pästi ičeze suren kärzan astjaha , ezmäi nühahti – mille haižub – i zavodi ažlakos söda .
Internatas sötta händikast oli kebnemb : lapsed toskeliba , ken midä voib .Erašti lihad-ki putui , kalbasad , munid .A konz zavodihe keza-aig , leibän da maidon ližaks ei olend nimidä .Penikaižid haragaižid da varišaižid , miččid erašti hö taboiteliba , – nece oli , kut sanutas , ühten hambhan rad .
Ünaižed päiväd Hanh’ Kaizeranke oliba mecas , no amu jo ei voinugoi nimidä tabata .Tozi sanuda – oli kaloid , no niid Kaizer söi vaiše ani sures näl’gäs .
Heiden kodiš oli muga , miše Hanh’ voi tehta midä taht , konz kodihe oli todud jo vet sur’ buč da haugoid päčinnoks täuz’ kogo .
Necil homendesel Hanhele putui vastha Tol’aine kaivonno .
– Kule-ške , Hanh’ , tarbiž-ik lihad Kaizerale ?
– A kuspäi otad ? – küzui Hanh’ .
– Tat öl toi . Äi lihad .Kuni hö mamanke bučin vaumičiba da solad , minä suren palan čapoin .Se om peittud minun sarajaha .
– A kus tat oti lihad ?
– En teda . Kuti miččen-se lehmän pidi rikta : mihe-se kakastui , vai völ midä-se ...
– Tat kolhozaspäi vargasti , sinä tataspäi . Ei tarbiž minei mugošt lihad .
– Ka ved’ minä en sinei andan-ki ! – abittui
Tol’aine . – Minä Kaizeran täht staraimoi . I otin ei kus-ni , a kodišpäi .Kuna sidä nugüd’ ?Tacta-k ?
– Ka olgha ! – sanui Hanh’ . – To . Kaizerale tozi-ki lihata hond om .Se ved’ kaiken-se händikaz om !
– A miš minä pagižen ? Minä völ kerdan vet tulen i ton lihad vädras .Mö panem lihan sinun vädraha , a sinä valad vet , i niken nimidä ei homaiče .
Hö muga tegiba-ki .Kaik oli čomin tehtud .No konz Hanh’ otaškanzi lihan vädraspäi , pertedeshe tuli mamoi .
– Midä sinai om ? – küzui hän napernas . – Om-ik liha ? Kuspäi otid ?
– Tol’aine Aks’onov andoi , Kaizerale . – Se om mitte-se paha ...
– Paha-k ? Ka mikš siloi vädran paganzoitid ?– Darja oti lihapalan nühni , kacui sidä kaikiš polišpäi .
– Om-ik nece paha ? Se om torez !A ku minä tedištan , kuspäi nece muga sanutud "pämez’ " lihad oti !
– Ka sinä ved’ Tol’kale pahad teged ! – kidastaškanzi Hanh’ . – Hän tahtoi Kaizerale ...
– Minei ei ole azjad ! Minä necidä jomarid tahtoin opeta !– Darja taci lihan lavale , oti čogaspäi vastan i läksi kodihe . "Jose sanub kelle-se ? – tuskas meleti Hanh’ . I pidi hänele necen vastan tagut pertedeshe tulda !"
Sit' - sarnaline jogi. 08.pala
Veps
–
Anatolii Petuhov
Сить - таинственная река
Russian
—