Texts
Return to list | edit | delete | Create a new | Statistics | ? Help
Nina Zaiceva. Sit' - sarnaline jogi. 11.pala
Nina Zaiceva
Sit' - sarnaline jogi. 11.pala
Veps
Pol’ön
aigan šalašin seinän taga zavodi holduda Kaizer .Hän kaiken tahtoi magata valdal , no panihe magadamha sen seinännoks , kus magazi ižand .
– A ku tänna tuleb sen mamaze ? – sanui šuhaiten Tol’aine .
– Ei tule . Ku sil oli muretud peza , ka se edahan täspäi lähteb i ei tule tänna .
Kaizer möst kobaidaškanzi .Kului , kut se libui , hengahti süväs .Sen jäl’ghe
kuluškanzi heinän robaiduz , i – kuti viri katkaitihe – ropsahti oksaine .
– Kulid-ik ? – šuhaiten sanui Sergei .
– Hillemba ! – sanui Hanh’ i ištuihe , miše kulda paremba , kuna läksi Kaizer .
Erases pordos päliči kuluškanzi komed veden bul’skahtuz , sid’ völ kerdan i völ .
– Om-ik nece Kaizer ? – küzui Tol’ka .
– Ka ei , se ei lähte vedehe , – sanui Hanh’ .
– Ka kenak sigä om ?
– Ken tedab ?! Lähtkam jogele !
Prihad vil’skahtiba šalašišpäi i hilläšti läksiba jogennoks , kuspäi sihesai kuluiba veden bul’skahtused .
– Ka nece om verkoidenno , – dogadihe Hanh’ . – Jokskam !
Kavi , mihe oli sidotud verk , čibuihe sinna-tänna , a jogen keskes nägui sur’ kala .
Kaizer püštti korvad i libunuded karvad hibjas seižui ani vedenno i kacui heitmata sinna , kuspäi kului judu .
Hanh’ heiti lautan noraspäi , prihaižed kaik koumen hüppähtiba sihe i läksiba ujumaha sihe tahoze .Verkon kibrikoid ei nägund , i siš tahos , kuna putui kala , vezi anu kehui händan iškendoišpäi .Hanh’ pästi vedhe käden ani hardjoihesai , kosketi ülembaižen verkon jäntken , habi sen lendouzi i zavodi käzil sirttas ühtes kibrikospäi toižhe kibrikohosai .Hän tunzi hüvin kalan vahvad hüppindad verkos , mitte vaumiž oli jo ozutadas veden päl .
– Nügüd’-se ka ed pagene minuspäi ! Nügüd’ meiden linned !– saneli Hanh’ .
Sid’ kajahti mugoine opak kida , i Tol’ka , miš oli , hüppähti vedhe .Lautan čibuhtoiti , verkon šlibantoiti kuna-se alahaks , i Hanh’ lanksi vedhe .Laides , hän ezmäi ujuškanzi randha , no kulišti Sergejan voikajan änen , pördihe tagaze , kactes , kus om Tol’ka .
Erasiš metras ičezennopäi Hanh’ nägišti veden päl Tol’kan libunuden käden , mitte sid’-žo pästihe vedhe , i hänele tegihe opak .
– Laut ! Tänna laut !– kidastaškanzi hän Sergejale , a iče rigehtiškanzi Tol’kale abuhu : hän el’gendaškanzi , miše Tol’ka segoi verkoho . Pordos päliči hän tembaiži Tol’kan kädes i zavodi ujuda randha .No sen-žo aigan ken-se lujas vedaškanzi Tol’kad süvüdehe .Opakos Hanh’ zavodi lujemba rata käzil i jaugoil .Vedel al mi-se ratkaižihe , i Tol’kan pä ozutihe veden päl .A lautan kaik kandoi i kandoi veden joksendal .
– Ka midäk sinä ! Kärautelde sigä !– heikahti hän Sergejale , kudamb kaiken-se seižui lautan keskel .
Kut-se školas starinoitihe , miše upnuzile tarbiž tehta tegohengaiduz .No kut necidä tehta , Hanh’ ei tedand .Hän kärauzi Tol’kan päl alahaks i zavodi händast kovas pudištada .
– Vaiše kole ! En anda kolda !– hogišten saneli hän , i sen-žo aigan kut voi i mahtoi pörduteli Tol’kale elod . Hän pudišti Tol’kan sihesai , kuni se zavodi ohkta .– Nu naku ! – hengahti Hanh’ . – Muga-se paremb om .
Hanh’ pästi sebranikan maha i möst johtuti Segejan polhe .
– Kus oled ?
– Ujun ! – sanui Sergei . – Joksend ved’ om .
– Uju randannoks , ala uju keskedme !
Prihaižed seižuiba ümbri nodjos i kuivaziba sobid .Säsked vizäižiba heiš ümbri .I Hanh’ , miše oliži enamba savud , tacli nodjoho vihandoid barboid .
Tol’ka sihesai säraiži , hän ei voind sidoda eskai koumed sanad .
– Haug’ ... Samal päs ...– se oli üksjaine , min hän sanui .
A Sergei starinoiči :
– Sinä konz zavodid verkod libutamha , haug’-se libuškanzi ülähäks .Sur’kulu !Tozi-ki , sen pän päl samal oli , mitte-se nälöm .Tol’ka kut nägišti , ka kidastaškanzi – i vedhe !
Sid’ kacun – sinä-ki čuklahtid .Šest kadoi , i mindai kuna-se vedaškanzi ...
– Teidenke vaiše löcuid ongitamha , a ei kaloid ! – buraiži Hanh’ . – No hüvä om . Ika ištuižim verkos ühtes necen haugenke ...
– Kule ! – šuhaidaškanzi Sergei , kactes kehkeroil sil’mil . – A nece uk-se , kudamb Paijärvespäi ... Hän kaken oikti sanui .Vaiše sinä neciš meile starinoičid , kut nece ozaižihe-ki ...
– Midä ozaižihe ? Iče pöl’gästuid , a nügüd’ – "ozaižihe "!A miše samal oli päs , ka necen minä-ki nägin .Ezmäi meletin , miše ozutihe .No kaikile koumele ei voind ozutadas ...
– Voib olda , se nügüd’-ki verkos om !?
– Sindai varastab .
– Meletad , läksi ?
– Ka ved’ ei kulu ! Kaizer kacu , tünäs venub .Se-ki nimidä ei kule .
Kaizer , kulištades nimen , kacuhti ižandaha , sen sil’mäd paloiba vihandal mujul kezaön hämäraižes .
Verkon prihaižed heitiba päiväižen nouzmas .Tozi sanuda , heitli sidä Hanh’ , a Tol’ka i Sergei seižuiba randal i kacuiba .Kalad putui vähän – kahtele lemusele , voib olda .
Nimittušt hauged ei olend , no verkon südäin oli rebitadud lophusai : eskai ülähäine jände oli kuti čaptud raudaižil .Hanh’ palahtelihe , miše kala pageni – a ku hö toižiba kodihe mugoižen sur’kulun kalan , miččen pähä samloid kazvoi .A Sergei varaiži Tol’kan polhe : ei siš , miše ei to kodihe pol’ havadod kalad , i siš , miše hän läksi mecha öks küzumata , hänele voi kut putub !Ka völ i verk-se hänen tatan oli , a nugüd’ se rebitadud om .Vaiše Tol’ka oli vaitti .Hänele kaiken-se näguihe , kut veden pindale saihe nece sur’kulu samlokaz haugen pä , kut hän opakospäi čuklahti vedhe (Hanh’ meleti , miše Tol’ka iče hüppähti vedhe ), a sid’ mitte-se tundmatoi vägi tabazi händast paidas i zavodi upotelda , vedades händast kaik süvemba i süvemba viluhu vedhe .
Sit' - sarnaline jogi. 11.pala
Veps
–
Anatolii Petuhov
Сить - таинственная река
Russian
—
—