Texts
Return to list | edit | delete | Create a new | Statistics | ? Help
Nina Zaiceva. Sit' - sarnaline jogi. 12.pala
Nina Zaiceva
Sit' - sarnaline jogi. 12.pala
Veps
Ei
ehtind Hanh’ haškahtada künduses päliči , ka Darja sanui :
– Tedad-ik mittušt lihad sinei Tol’ka toskeli ?
– Mittušt ? – küzui Hanh’ , mujuštades midä-se hubad .
– Koumanden ferman vazaine söihe imičal , a živatlekar’ ühtes necen "pämehenke " tegiba bumagan , kuti se manvägedusid söi . Bumagaha kirjutadihe , miše necen vazan liha om kaidud maha , a azjal-se – hö jagoiba lihad poleti .Naku kut !
– A kuspäi sinä tedištid necen ?
– Ka tedištin ! Toine-se živatlekar’ lidnas oli .Konz tuli , minä hänele kaikes
starinoičin …
– Sanuid-ik , miše Tol’ka lihad Kaizerale toi ?
– Ka sanuin ! Kutak mugošt sanu en !Nece vaza-se kaidihe maspäi , a sigä vaiše pä om da kabjad .Da völ nahk kiškoidenke ...A lihad-se ei ole .Kuctihe milicii , tehtihe necil "pämehel " kacund kodiš .A liha-se karzn’as , bučhe solatud .
– Ottihe-ik brigadirad ?
– A midä händast otta ! Kuna hän jokseb ?Tämbei homendesespäi vodkad job .Kaik astjad kodiš murenzi , sanui , miše mindai kükseb neciš svetuspäi , a Tol’kan , sanub , rikon !Minä sanuin – ka , Tol’kale void tehta , midä taht , hän sinun om , a mindai ed koske sormel-ki !
Irdalpäi kuluškanzi sur’kulu laind , vizäiduz , kida .Hanh’ tacihe iknannoks .Brigadiran kodišpäi liinman kal’t joksi Tol’ka , a humalikaz tat taclihe haugoil jäl’ghe i laihe jäl’gmäžil sanoil .Hanh’ tembaiži kepkan .
– Kuna , ištu kodiš ! – kidastaškanzi Darja . – Ala tartu sihe !
No Hanh’ toukaiži maman i hüppähti irdale .
– Kacu mitte ! Maman toukaiži !Minä sinei andan !– kidasti Darja išktes nürkul iknaha .
Sarajaspäi rebitihe Kaizer , lühüdas ulaiten .
– Vaitti ! – kidahti Hanh’ i tacihe Tol’kan jäl’ghe .
Hän küksi Tol’kan jo mecanno , tabazi ougas .
– A-a-a ! – opakos kidastaškanzi Tol’ka i lanksi normele .
Hanh’ eskai iče habi ei lanktend : modon sijas Tol’kal oli mitte-se verekaz liha .
– Mil hän sindai ? – küzui Hanh’ i pästihe pol’vile sebranikannoks .
– Silituzrauda-a-al ... – habi sanui Tol’ka .
– Naku mitte kü ! Fašist !– Hanh’ ruši maikan pälpäi , rebiti sen paloihe .
– Anda , minä sidon .
No Tol’ka ei andand .
– Paremba oliži , ku minä eglai oližin uponu ! – sanui hän .
– Minä sinei uptan ! Sanun : sidoda tarbiž !Sinun nena kaik om muretud !
Hanh’ kut-se sidoi Tol’kan modon , avaiten jättes vaiše sil’mäd i alahaižen hulen .– Midä nügüd’ tegeškandem ? – küzui hän .
– En teda ... Kodihe enamba en lähte .Nikonz !
– Muga tegem-ki . Eläškanded meil .Mö Kaizeranke sarajal magadam , i sinä
meidenke .
– En lähte . Hän mindai teil-ki löudab .Sanui , miše rikob .Humalikaz om , habi püžub jaugoil ...
Hanh’ hengahti :
– Siloi lähtkam šalašihe .Sigä hän ei löuda sindai .
– Sigä haug’ om ...
– Nu-ka midä ! Minä kalad saškan , a sinä haugoid keradaškanded , lemust
keitäškanded ...Murmoid Kurgsole lähtem …
– Astkam , – sanui Tol’ka , – minei nügüd’ om üks’kaik ...
Sit' - sarnaline jogi. 12.pala
Veps
–
–
Anatolii Petuhov
Сить - таинственная река
Russian
—
—
—