Texts
Return to list | edit | delete | Create a new | Statistics | ? Help
Nina Zaiceva. Sit' - sarnaline jogi. 15.pala
Nina Zaiceva
Sit' - sarnaline jogi. 15.pala
Veps
Homendesel
, konz Darja tuli fermalpäi , pert’he tuli Tan’aine .Tervehtades , hän seižutihe kündusel .
– Min täht muga aigoiš tulid ? – čududeldes küzui Darja .
– Ik Vas’aine kodiš ? – küzui Tan’aine .
– A konz hän kodiš oleskeleb : Tol’ka Aks’onovanke kuna-se läksiba ... Mikš hän sinei ?
– Ka muga . Tarbiž !– i Tan’aine joksi irdale .
Pätuz tuli pähä ühtnägoi : tarbiž mända Sitile , šalašinnoks .Tan’ka joksi kodihe , oti bidonaižen i sanudes mamale , miše läksi marjoid ecmaha , mäni irdale .
Miše niken ei tundištand , kuna hän läksi , Tan’ka läksi toižhe bokha , nituiden kal’t , i vaiše barbikos , ümbärtes külän , tuli tutabale tropaižele .
Necen kezan hän völ ei olend šalašiš .Hanh’ ni kerdad ei kucund händast
ičezenke .No ei ved’ hän kükse Tan’ašt , konz hän tuleb sinna !A voib olda , hänele linneb mel’he , miše hän ei pöl’gästund mända mecadme üksnäze kahesa kilometrad , i hö lopuks ladišoiš .No ku Hanh’ ei tahtoiškande ladidas , ka necen-ki hän el’gendab – iče värnik oli .
Ka hän oli vär ...Kut amu nece oli !Tan’aižen muštho tuli se vilukun päiv , konz hän läksi necen merimehenke kinoho , kuti mitte-se aigvozne neižne .Siloi hän unohti Hanhes .Ei voi sanuda , miše unohti , no sirdi kuna-se nene johtutesed , sikš ku nece rindatuz : laihaine Vas’aine Hanh’ , kudamb oli völ seičemendes klassas , i čoma aigvozne priha – ei olend Hanhen polel .
No Tan’aine möhemba el’genzi ičeze vigan , hän sid’-žo johtuti Hanhes i andoi ičeleze sanan nikonz ei vajehtada Vas’ašt nikeneks toižeks .Hän eskai ei lähtend kinoho Jurka Subbotinanke , kudamb oli čomemb kaikid prihaižid školas , i hänehe oliba mel’dünuded kaik školan neičukaižed .Kaik , no Tan’ka – ei !
Hän prosti Hanhele kaik hänen abidakahad iloižed , näritused , ka völ-ki oli vaumiž midä-ni prostida ...
Nügüd’ Tan’ka meleti siš , miše , voib olda , Hanh’ läžuškanzi vai hänele midä-se om tehnus …Ei sur’ ozatomuz’ , ani pičukaine .I siloi Hanh’ voiži tedištada , miččen hüvän , holevan voib olda Tan’aine .Hän paniži hänen pän ičeze kombuile i silitaškanzi hänen hibusid .I hänele tegižihe siloi paremba .Hän sauptaiži sil’mäd i uindaiži .I konz hän oliži unen valdas , hän tervehtaiži händast kebnašti .A hän ei magadaiži , a kaiken rižaiži .Hän siloi el’gendaiži , kut Tan’aine armastab händast ...
Tan’aine ei homaičend , kut mäni pol’matkad .Nügüd’ pidab mända hurale , surhe seibhazesai , a sid’ kärauta suvehe i astta sihesai , kuni nece čaptud mecsija veb Sitinnoks .A sigä randadme šalašihesai ani läz om .
I sid’ Tan’aižele tuli mel’he , miše šalašiš Hanh’ ei ole üksnäze , hänenke om Tol’ka Aks’onov , kudambad , sanutas , lujas löi tataze .I hän meletaškanzi , kutak voiži tehta , miše Tol’ka kuna-se mäniži , vaiše hot’ časuks .Hän meleti : Hanh’ läžub , hän venub šalašiš , ei voi libuda , i Tol’ka läksiži haugoid tomha , a möhemba lähteb ongitamha .
No kala ei ongitade , i hän seižuškandeb randal longigesai ...
Tan’aine tüništui i ližazi haškuid .Pakuižes platjos , mitte ozuti hänen hibjan , kaposan i korktan , hän astui kebnašti , ei varaidand nimidä neciš korbes .Joudai bidonaine erašti kolkotihe puihe da penzhiže .
Sit' - sarnaline jogi. 15.pala
Veps