Texts
Return to list | edit | delete | Create a new | Statistics | ? Help
Pehkonen Margarita . Talovusfoorumas investitsiedu Karjalan matkustamizeh
Pehkonen Margarita
Talovusfoorumas investitsiedu Karjalan matkustamizeh
Livvi
New written Livvic
Piiteris pietys
kanzoinvälizes talovusfoorumas solmittih nelli sobimustu , kudamien mugah eri puolile Karjalua nouzou uuttu azetuskohtua tazavaldah tulluzih niškoi .Niilöin nostamizeh pannah enämbi kaheksua miljardua rubl’ua .
Kemin piirih avavuu ymbärivuodehine huogavundukeskus .Sen alovehele nouzou 600-pertihine hoteli , spa-keskus , restoruanu da suuri kerähmözualu .Ližäkse huogavundukeskus tariččou gostile erilastu aijanviettuo .
– Keskuksen alovehele rakendetah pyöräilyle da moottorupyöräilyle pädijät kohtat . Paiči sidä keskukses rodieu hiihtoladu , kangeiluseiny da kanuatturada .Kezäl gost’at voijah mielihyväkse sovvella venehil .Talvel hyö voijah menettiä aigua luistelenduradal libo jiäčukeldumizes , kerdou Karjalan piämiehen lehtistöpalvelu omassah tiedottehes .
Ennustuksien mugah keskus rubieu palvelemah 1700 hengie .Sie rubieu ruadamah 200 hengie .
Tulies huogavundukeskuksespäi kebjieh voibi piästä Vienanmeren kallivopiirustuksien alovehele libo Solovetskoin suarele .
– Veinanmeren (alovehen ) kehitys matkustajien vedovoimukohtannu on meile strateegizesti tärgei . Huogavundukeskuksen perustamisprojektu on ainavoluaduine .Sen hyvyös perustammo uvven matkustamisklasteran , sanoi Karjalan piämies Artur Parfenčikov omassah lehtistöpalvelule .
Keskus rakendetah investitsien varoil .Investorannu on Tohmajoki Park -laitos .
Sobimus solmittih Piiteris pietys kanzoinvälizes talovusfoorumas .Dokumentan allekirjutettih Karjalan piämies Artur Parfenčikov ja investoran edustai Dmitri Sazonov .
– Laitos panou projektah enämbän kolmie miljardua rubl’ua , andau tieduo piämiehen lehtistöpalvelu .
Vie yksi huogavundukeskus nouzou Sordavalan piirikunnan Riekkalansuarele .Sobimuksen mugah se rakendetah yhtehizes ruavos Cosmos Hotel Group -laitoksen kel , kudai panou projektah läs viitty miljardua rubl’ua .
— Huogavundukeskus tuou hyödyy pereh - ja biznesmatkustamizele Luadogan Karjalas da andau uuttu ruadokohtua , kerdoi Parfenčikov lehtistöpalvelun tiedottehes .
Puudogan piiri ja Kondupohju suajah investitsiedu
Vie kaksi foorumas solmittuu sobimustu koskietah uuzien huogavundukohtien rakendamistu Puudogan ja Kondupohjan piirilöih .Puudogan piirin Šalah-nouzou huogavundukeskus , kuduas rodieu 18 kodii .
– Olen varmu , ku se rodieu kyzyttävy (huogavundukohtu ), vihjuau Parfenčikov .
Kondupohju suau 58-pertihizen hotelin , kuduas rodieu restoruanu , liikundu - ja kerähmözualat .
– Hoteli rodieu kyzyttävy , sendäh ku se sijaiččou Murmanskan ja Piiterin välizen valdutien lähäl , sanou Parfenčikov .
Hoteli huavatah ottua käyttöh vuvvennu 2028.
Karjalan kivi Piiterin hyövykse
Karjal luadiu omassah panoksen Piiterin matkustamizehgi .Karjalan graniittua voijah käyttiä Piiterin Pedrin da Puavilan linnoituksen kohendamizes .Linnoitus on yksi Piiterin piänähtävyksis .
— Piiteri on kiinnostunnuh karjalan kives . Parahite tutkitah mahtuo käyttiä karjalan graniittua Pedrin da Puavilan linnoituksen da (Piiterin histourien ) muzein toizien kohtien perustehellizes kohendamizes , kirjutti Parfenčikov omassah VKontakte-sivul .
— Nygöi olemmo perustehellizesti kohendamas äijii kohtii . Ies on linnoituksen seinän graniittuverhon suuri restavratsii , kerdou Piiterin histourien muzein johtai Vladimir Grigorjev tiedottehes .
Restavratsies voibi käyttiä ruskiedu graniittua .Sen louhindu algavui Priäžän piiris mennyt vuon .
– Karjalas löydyy ezimerkikse harmuadu ja savunväristy sego valpahanruskiedu mraamorua . Ližäkse karjalan kivi sobiu erinomazesti arhitektuuruelementoin luadimizeh .Nämmien kaikkien ominažuksien hyvyös karjalan kivi vallittih restavratsies käytettäväkse , kerrottih Karjalan Sanomile kirikös tämän vuvven allus .
Karjalan ja vepsän kielien digitulevažus huomivon keskes
Ven’an kanzoin yhtenäžyön vuvvennu foorumalazet paistihgi Ven’an kandukanzoin kielien tuliedu aigua .
Karjalan tazavaldu pidäy yhtehisty ruaduo Yandex-konsernan kel .Yhtehine ruado koskougi karjalan ja vepsän kielen ližiämisty Yandexan verkokiändäjäh .
– Piimmö paginua yhteisruavon piäsuundoih nähte . Yksi niilöis koskou Yandex Kiändäi -verkokiännöspalveluu , kuduah ližätäh lähi aigua karjalan ja vepsän kielet .Valmisteluruavot jo algavuttih .Spetsialistat ollah kielikorpussoi luadimas , kirjutti Karjalan piämies Artur Parfenčikov omassah VKontakte-sivul .
Valmistelut livvinkarjalan ližiämizeh verkokiändäjäh suadih allun vuvvennu 2024.Projektah yhtynyöt karjalan kieldy maltajat spetsialistat työtäh verkokiändäjän luadijoile rinnakkahii virkehii karjalakse ja ven’akse .
– Täh aigah on työtty 72 000 rinnakkastu virkehty da läs 100 000 virkehty ilmai kiännösty , kerdou Karjalan kanzallizen da alovehellizen poliitiekan ministerstvan edustai Jelena Migunova .
Karjalan kanzallizen da alovehellizen poliitiekan ministerstvan mugah livvinkarjalan digitalizoičendas rodieu merkittävy panos karjalazien etnokul’tuurizen perindön säilyttämizeh .
– Projektas rodieu suurdu tugie karjalan kielen opastajile , kieldy opastujile ristittyzile sego kielen käytös kiinnostunnuzile alguajile kirjuttajile da media-alan spetsialistoile , vihjuau Migunova .
Projektah kuuluu Karjalan oigiehkirjuttamizen komiisien rahvastu , Karjalan tutkimuskeskuksen kielen , literatuuran ja histourien instituutan spetsialistoi , karjalazien ja vepsäläzien kanzallizih liittoloih kuulujua sego omal himol ruadajua .
Ennustuksien mugah livvinkarjalua koskii projektu loppehes 1. talvikuudu 2026.
Tuliekse kačotah ližätä Yandex Kiändäi -verkokiändäjäh sežo vepsängi kieli .Projektu on jo algavunnuh .
– Täh suate on kerätty 40 000 virkehty . Net työtäh verkokiändäjän luadijoile vuvven 2026 talvikuun 1. päiväh suate , kerdou Migunova .
Talovusfoorumas investitsiedu Karjalan matkustamizeh
Livvi
New written Livvic