Texts
Return to list | edit | delete | Create a new | Statistics | ? Help
Valentina Libertsova. Soita, soita, Ilomieli!
Valentina Libertsova
Soita, soita, Ilomieli!
Livvi
New written Livvic
Anuksen
Kanzallizes muzeis piettih Ilomielikandelehjoukon 5-vuozipäiväle omistettu konsertu .Sih kerävyi vägitukku rahvastu Anuksenlinnas dai piirin kylispäi .
Ičegi soittajat ollah eri kylispäi : johtai Galina Potapova da hänen mies Aleksandr eletäh Yllözes , Ivan da Svetlana Jljinat – Videles , Julija Anikina , Marina Jefimova da Antonina Rossijeva ollah alavozelat .Ga yksisama kaikin alalleh vastavutah Alavozen kul’tuurutalois harjaituksis – jälles urokkoi , huogavopäivin libo loman aigah .Muga ruatah vai ylen innostunnuot da nerokkahat ristittyöt .Hyö moizetgi ollah .Kaikin opastunnuot muuzikkuškolan opastajat , vaigu soitetah da opastetah lapsii soittamah toizil eriluaduzil soittimil .Yksi Antonina lapsennu ylen hyvin loppi muuzikkuškolan , ga nygöi ruadau omas školas algukluasoin opastajannu .Sanakse , mollembil hänen lapsil Art’omal da An’n’oil sežo ollah kandelehet käis .
Konzu viizi vuottu tagaperin Galina Vitaljevna jälles kursiloil opastundua kehoitti perustua kandelehelsoittajien joukon , kaikin mendih myödäh , ruvettih opastumah , harjavumah soittamah karjalan rahvahallizel soittimel .Enzimäi ohjelmistos oldih vahnat karjalan rahvahan sävelmät , sit ližävyi klassiekku , vuozipäivykonsertas jo kuuluttih nygyaigazien säveldäjien tevokset .
Konsertan iel Anuksen Kanzallizen muzein johtai Natalja Nikolajeva tervehti "Ilomieleh " kuulujii dai kerävynnyzii kaččojii , sanoi , gu muzein histouriellizis zualois , kudamat vallittih kandelehelsoittajat , on ozutelluezinehennu se soitin dai äijy sen aigastu , konsertu roih suurennu lahjannu da ilonnu ei vai kaččojil da muzein ruadajil , ga eksponuatoilgi – net sežo , gu elävät , kuunnellah da mustellah endisty aigua .
Konsertale oli annettu nimi "Viizi vuottu ihalmuo da ilomieldy ", a rakendeh oli azuttu , gu päivy hierus .Jälles enzimästy Runo kandeleh niškoi -sävelmiä buitegu tuli huondes : kuuluttih kirikön kellot Sari Kaasizen Huondes pyhänpiän mail -tevokses .Ielleh oldih vessellät rahvahallizet soitot , kummallizet žiivattu-sävelmät kažih , hebozeh , kodijänöih nähte .
Ei suannuh olla muhahtumattah , konzu kandelehen sijah Ivan Iljin otti käzih soiton da Aleksandr Potapov pillin .Miehet , buitegu tavallizet hierun soittajat , ruvettih ozuttamah omii neroloi da kilbailemah naizien ies .Se jo gu zavodiihes ehtänaigaine bes’odu .Kino , kuduadu erähin illoin ozutettih hierulois , – uuzi Vahnu Anuksenlinnu-video , kuduan kuvai Valentina Matvejeva Lauland .Muzikal’naja Karelija -projektan hantuzis .Sen samazen nerokkahan naizen Joven kivet -sävelmy , gu rannal istundu päivänlaskul .A sit – bes’odu-diskotiekku kadrielinke .Jälgimäzikse yhtes pajatettih Soita , soita , Ilomieli ! -pajo , kuduan sanat piädykauti kirjutti Anna Usova , a pajokse luadii Ivan Iljin , se rodih "Ilomielen " gimnakse .
Tiettäväine , merkipäivän illačun aloh Ilomieli-joukko otti vastahgi pruazniekkuhyvittelendät .Viijes vuvves nerokas joukko rodih kuulužu omal Anuksen mual , ezityi eriluaduzil lavoil , enimytteh Alavozen kul’tuurutaloin .Puaksuh yhtyi Karjalan tazavallan , Ven’an dai kanzoinvälizih kilboih da festivualiloih , voitti da sai enzimäzet sijat .VK-sivul voibi nähtä vägitukku diplomua da kiitoskirjastu , kuduat tovestetah sidä ."Ilomieli " puutui vuvven 2025 Anuksen piirin laureatakse . Ruavahien kantelistoin rinnal kazvau Iloine-joukko muuzikkuškolan nuoris opastujis .Suurdu abuu "Ilomieli " andau Karjalan Rahvahan liiton Alavozen ozastole .
Hyvittelemäh vuozipäivänke tuldih Anuksen piirin piälikkö Vadim Murii da sotsiuallizen kehitändän haldivon johtai Alla Sidorova .Yhteltiedy omien lahjoinke lugiettih da annettih käzih korgiet kiitoskirjazet Karjalan ku’tuuruministerstvan da Karjalan kanzallizen da alovehellizen poliitiekan ministerstvan puoles .Alavozen haldivon johtai Natalja Arhipova da Alavozen kul’tuurutaloin johtai Ol’ga Bogdanova annettih kiitoskirjazet da kukat jogahizele kandelehelsoittajale .Ylen hengellizesti artistoi hyvitteli Karjalazien X kerähmön vallittuloin nevvoston piälikkö Inga Gurilova .Omat hyvittelendysanat virki da andoi lahjat Karjalan Rahvahan liiton johtokundah kuului da Anuksen karjalazet -liitoh kuului Tatjana Romanova .
Ilomieli-ansambl’an-konsertas kaikin levittih hyväs mieles , a muzikantoi vuottau dorogu Novgorodah , kunne heidy kučuttih festivualih .Toivotammo parahii tuloksii , uuttu tevostu , korgiedu lavua , soitandan ihailijua !Anna tuliet vuvvetgi mennäh ihalmon da ilomielenke , alalleh kuulutah meijän mual kandelehien iänet !
Soita, soita, Ilomieli!
Livvi
New written Livvic