Texts
Return to list | edit | delete | Create a new | Statistics | ? Help
Šuškina Lilija . Kičči-kočči antau lapšilla rohkevutta
Šuškina Lilija
Kičči-kočči antau lapšilla rohkevutta
Karelian Proper
New written karelian
Kešäkuun
alušša Periodikakuštantamon lapšien kieliryhmän oppivuosi loppu .Enši vuotena "Kičči-kočči " täyttäy jo viisi vuotta .
Rikaš konserttitoiminta
Periodika-kuštantamon aulašša oli vilkašta : lapšet valmistauvuttih tanšši - ta lauluesitykšeh .Konsertin kaččojina oltih heijän vanhemmat .Näin kešäkuun alušša loppu Kičči-kočči-lapšienryhmän oppivuosi .
– Myö laulamma , šoitamma , tanššimma , kisuamma ta tutuššumma karjalan ta vepšän kieleh . Še oli meijän kerhon nelläš oppivuosi , kertou kieliryhmän opaštaja Alina Kartinen .
– Näkyvissä on miellyttävä tuloš : lapšet kehitettih taitojah . Hyö ošallissuttih konserttiloih ta esiinnyttih festivaliloissa ."Kičči-kočči " antau lapšilla rohkevutta . Kerholaiset ei varata ihmisie ta voijah esittyä keräytynyillä tanššiliikkehie tahi näyttyä kantelen šoiton alkuja , lisyäy hiän .
Kičči-kočči-ryhmän konserttitoiminta on rikaš .Lapšet ošallissutah Periodika-kuštantamon järještämih tapahtumih .Lisäkši heijät mielelläh otetah vaštah toisien kulttuuritapahtumien ošallistujiksi .
– Tänä oppivuotena ryhmäläisillä oli kuuši esityštä . Viimeni oli oraškuušša .Lapšet esiinnyttih Karjalan taitomusejon näyttelyn avajaisissa .Kešäkuušša , vaikka oppivuosi jo loppu , ka kiččikoččilaiset otettih ošua vielä yhteh tapahtumah .20. kešäkuuta hyö käytih Šoutjärveh ta esiinnyttih perintehellisellä vepšäläisellä Elon pu -festivalilla , šelittäy kieliryhmän opaštaja .
Kerhošša on mukava
"Kičči-kočči " yhistäy eri-ikäsie lapšie , kumpaset on kiinnoššuttu karjalaisešta kulttuurista .Nyt ryhmäh käypi 16 kuuši-kakšitoista-vuotista lašta .
– Miun poika Platon Šarapkov opaštuu lapšienryhmäššä jo kakši vuotta . Šain tietyä "Kičči-kočista " opaštaja Alina Kartisen VK-šivulta , muistelou Jelena Nuija .
Pojan mieleštä kerhošša on mukava käyvä .
– Kieliryhmäššä on miellyttävä ilmapiiri . Opaštajat ollah yštävällisie .Hyö šelitetäh šelväšti , mitä meijän pitäy ruatua .Tykkyän eniten kantelen šoitošta .Tahon šoittua tätä karjalaista šoitinta erinomasešti , kertou kymmenen-vuotini Platon .
Pojan mieleh jäi oraškuun esityš Karjalan taitomusejošša .
– Musejošša meilä järješšettih mielenkiintoni ekskursijo ta muasteri-oppi , koroštau hiän .
Natalja Pellisen kolme lašta käypi šiännöllisešti "Kiččikočin " oppituntiloilla vuuvvešta 2025.
– Ryhmän peruštamisešta lähtien nävin informatijuo šiitä verkošta ta TV-lähetykšistä . Kerhošša lapšet opaššutah luatimah joukkotyötä .Še on erittäin tärkie taito , kertou naini .
Natalja Pellisen mukah , hänen tyttäret eniten tykätäh esitykšistä ta kiertoloista .
–Mihail-poikani oikein tykkyäy Mukava tunti -muasteri-oppija , šanelou naini .
Jelena Nuijan ta Natalja Pellisen lapšet šanottih , jotta tahotah jatkua Kičči-kočči-kieliryhmäššä enši oppivuotena .
Terveh tulla kerhoh !
"Kičči-kočči " toimiu kouluvuuvven aikana . Kerho keräytyy kerran netälissä .Tavallisien oppituntien lisäkši lapšilla järješšetäh muasteri-oppija , kumpasih ošallistuu luovien ammattien etuštajie .
– Järješšämmä šemmosie muasteri-oppija kerran kuukauvešša . Viime oppivuotena muasteri-oppiloissa oli mukana Karjalan Kanšallisen teatterin näyttelijä Andrei Gorškov .Hiän kerto näyttelijän työn šaloista .Niise tapasima multi-instrumentalistin Tatjana Umn’akovan , kumpani tuttavuššutti kiččikoččilaisie erilaisih šoittimih , luvettelou Alina Kartinen .
– Järješšämmä šemmosie tapuamisie enši oppivuotenaki , lupuau miun pakinakaveri .
"Kičči-kočči " alotti vuuvven 2022 puolivälissä . Enši kalenterivuotena lapšien kieliryhmä täyttäy jo viisi vuotta .
– Šuunnitelmissa on tietyšti valmistua mukava juhlakonsertti . Meinuamma järještyä šen kevyällä 2027.Enši oppivuotena Kičči-kočči-kerho tuaš ottau ošua erilaisih tapahtumih Petroskoissa .Olis hyvä lähtie niise esityšmatkah , toivou opaštaja .
Šykyšyllä lapšienryhmä kuččuu mukah uušie ošallistujie .
– Meilä tulou nellä-viisi uutta lašta vuuvvešša , ka uušien ošallistujien miärä ei ole rajotettu . Kaikkie mielellänä otamma vaštah , kertou Alina Kartinen .
Jotta piäššä kieliryhmäh lapšien ei tarviče šuorittua mimmosiekana tutkintoja .
– Lapšen halu tutuštuo karjalaiseh kulttuurih on meilä tärkeintä , painottau kerhon opaštaja Marina Tukkija .
Tietoja piäšyštä lapšien Kičči-kočči-kieliryhmäh löytyy Periodika-kuštantamošša .
Kičči-kočči antau lapšilla rohkevutta
Karelian Proper
New written karelian
"