Texts
Return to list | edit | delete | Create a new | Statistics | ? Help
Larisa Smolina. Piteriš mäni etnoforum
Larisa Smolina
Piteriš mäni etnoforum
Veps
New written Veps
20.-22. semendkud
Piteriš mäni etnoforum , mitte ihastoiti adivoid bohatal programmal da sur’znamasižil paginoil Venäman rahvahiden polhe : midä ühtenzoitab tämbei ristituid sures valdkundas , kut pagišta tradicijoiš nügüdläižel kelel , mikš tämbei om tärged kaita kul’turjäl’gestust .
Etnoforuman pätegii om Kuntskamera-muzei da Piterin tedoakademii .Naku sigä mäniba-ki kaik plenarižed ištundad , paginad , mastar’-klassad da etnoprojektoiden jarmark .
Forum mäni koume päiväd , sil vastsihe tedomehed , politikad , biznesmehed , erazvuiččiden regionoiden , organizacijoiden aktivistad da etnokul’turižiden projektoiden tegijad .Eläbiden paginoiden aigan hö vajehtihe melil , mahtoil da radoil .
Tetabad akademikad kut Andrei Golovn’ov , Valerii Tiškov starinoičiba mugoižiš terminoiš , kut äirahvahuz’ , igähine rahvaz , nacii .Pagištihe Venäman valdkundaližen rahvahaližen politikan strategijas , mitte om oigetud ezmäi kaiked sihe , miše ühtenzoitta rahvahid da varjoita Venämad , kaita kul’turid , etnosoid .Oli äi paginoid Venäman äirahvahudes kut rahvahaližes idejas .
Etnoforumal oli ozutadud parahimad etnoprojektad , miččid tehtas tedoalovehes da praktikal .Abazinoiden ülembaižen kongressan pämez’ Mussa Ekzekov starinoiči , kut om tärged kaita rahvahiden kul’turad mamankelen abul .Ved’ sanas om energii da vägi .Hänen melen mödhe pidab parembzoitta elod küliš , siloi rahvaz-ki eläškandeb sigä da kaičeb ičtaze .
Jelena Guščina Kazanišpäi sanui , kut om tärged kaita rahvahaližid sädoid da kuverz’ äi väged ned toba .Larisa Čirkova Karjalaspäi starinoiči , kut kaitas vepsän kel’t da kul’turad nügüdläižiden tehnologijoiden abul .Etnobloger Genrih Nemčinov da etnomodeljer Jevgenia Koškina ozutiba , kut rahvahuz’ abutab löuta ted elos .
Etnoforuman aigan mäniba muzikaližed ehtad , etnoprojektoiden ezitamine , sigä ozutadihe tradicionaližid käziradoid , muštlahjoid , fotoid , sädoid , muzikaližid da kargtradicijoid , rahvahaližid muzejid , etnoturizmad , lapsiden projektoid da mugažo erazvuiččid mastar’-klassoid , miččil adivoid opetihe kudomaha , tehmaha kruževoid , vestmaha , tehmaha ičeze käzil muštlahjoid .Kaik hö tundištihe Venäman rahvahiden käziradoidenke da tradicijoidenke praktikal .
Etnoforuman jäl’gmäižel päiväl mäni etnodefile .Venäman igähižed rahvahad ozutiba tradicionaližiden da nügüdläižiden sädoiden 15 kollekcijad .
Kaikiden adivoiden täht oli tehtud melentartuine kul’turprogramm Lampovo-küläs .Sigä pidetihe Nikolan jarmark , ozutadihe erazvuiččiden mastariden käziradoid , pajatadihe , kargaitihe , vätihe .Praznuičemha Nikolan Vešnijan pühäd praznikad tuliba ei vaiše Etnoforuman adivod , no mugažo Gatčinan rajonan eläjad da Venäman toižiden regionoiden adivod .
Piterin etnoforuman lopus oli vaumitud rezol’ucii , kus om kirjutadud foruman adivoiden päidejad da taričendad .
Piteriš mäni etnoforum
Veps
New written Veps