Texts
Return to list | edit | delete | Create a new | Statistics | ? Help
Irina Sotnikova. Nikolai Abramovan runod libutaba lapsiden henged
Irina Sotnikova
Nikolai Abramovan runod libutaba lapsiden henged
Veps
New written Veps
Petroskoin
školaninternatan №24 openikad ühtes opendajidenke tegiba mul’tfil’man Nikolai Abramovan "Maid "-runole .Neciš kirjuteses starinoičem mul’tstudijan rados da mul’tfil’man tegemižes .
Školas-internatas №24 jo 11 vot radab "ČIPSi " -mul’tstudii .Sen ohjandajad oma augotižškolan opendai Jelena Fedulova i opendai-logoped Natalja Spiridonova .Studijaha kävuba 1.–12. klassoiden openikad .Kaikuččen voden mul’tstudijas todenzoittas uz’ projekt .
– Ühtes Natalja Gennadjevnanke mö popul’arizoitam lugemišt openikoiden keskes . Nece om lujas delikatine i jüged tem opendajiden täht .Miše opeta lapsid lugemaha , ozutada melentartust kirjoihe , mö zavodim kävutoitta rados erazvuiččid mahtoid .Lapsed äjan pirdaba .Konz meil oli jo äi lapsiden töid , mö pätim : pidab nenid materialoid kut-se kävutada , otta radho .Meil oma eriližed lapsed i heile om jüged kingitada homaičust mihe-se pit’käks aigaks , sikš mö zavodim kuvata lapsidenke lühüdoid fil’moid , miččiden henged oliba iče lapsed .Heile nece azj tuli lujas mel’he .Miše lapsil sünduiži ičeze heng vai starin , heile pidi äjak-se vot eläda neniš starinoiš , olda miččen-se starinan hengen , – sanui Jelena Fedulova .
Konz lapsed openzihe lugemaha da kirjutamha , studijan ohjandajad zavodiba tundištoitta heid erazvuiččen literaturanke (sovetskijan aigan literaturanke , verazmaiženke ) da kuvata mul’tfil’moid kirjutusiden mödhe .Lapsed iče änetaba mul’tfil’moid da pirdaba niiden täht kuvid .
– Lapsed kazvaba i tegesoiš argembikš . Miččen-se hengen kal’t heile om kebnemb sanuda ičeze problemoiš .Meile pidab ei vaiše iloitelda da kehitoitta heid , tarbiž , miše lapsed iče meletaižiba miččiš-se tärktoiš azjoiš .I mö zavodim meletada istorijoid , – ližazi Jelena Sem’onovna .
Nece voz’ om omištadud Venäman rahvahiden ühtmudele , sikš kogonaižen voden lapsed tundištihe tetaban vepsläižen runoilijan Nikolai Abramovan sädandradonke .Ezmäi opendajad iče oppiba da süveniba Nikolai Abramovan runoihe .Heiden südäimid koski se , kut Nikolai mahtoi kuvata tundmusid , ristituid , londust .Lugedes hänen runoid voib putta külähä , jogele , olda kožmuses londusenke .Hänen runoiš ei ole agressijad – ned oma lämäd , sel’ktad , kebnad , lujas südäinkoskijad .
– Karjalas om äi lahjakahid ristituid , kudambiden sädandradon kal’t voib tundištoitta openikoid mirunke ümbri meiš . No meiden lapsed ei voigoi el’geta jügedoid tedoid .Nikolai Abramovan runod oma jogapäiväližes elos , armastuses kodimaha , vanhembihe , pert’he – nened temad oma sel’ktad i kebnad lapsiden täht .Ei kaikutte avtor mahtab muga lämäs kuvata ičeze tundmusid .Nacein , meiden openikad ei el’gekoi kaikuttušt rivid , no hö el’gendaba runon jüvän , i nece om tarbhašt meiden täht , – sanui Jelena Fedulova .– Lapsile oli mel’he , konz mö starinoičim Nikolai Abramovan polhe . Ved’ nece ei ole vaiše runoilii : Nikolai oli eripoližen ristitun , fotografan , lehtmehen , akt’oran …Lapsidenke voib pagišta erazvuiččiš azjoiš hänen runoiden , fotokuviden , fil’moiden abul .
Nikolai Abramovan "Maid "-runo tuli mel’he kaikile , sille oli-ki kuvatud mul’tfil’m .Kut homaičiba studijan ohjandajad , "se om kuti männudes aigaspäi i sil-žo aigal tulijas aigaspäi , ristitud lugeškaba sidä erazvuiččel aigal i el’gendaškandeba – nece om nügüdläine runo , se om aktualine kaiken aigan ".
– Lapsed surel tahtol lugiba necen runon , no kaikutte nägišti siš midä-se ičeze : ken-se kingiti homaičust leibän hajuhu , ken-se – maha . Lapsed pirdiba čomid kuvid , eläbzoitiba runon .Rad oli lujas melentartuine , eskai tegihe vähäižen opal , miše se lopihe , – sanui Jelena Sem’onovna .
Openduzvoden lopus literaturvastusel mäni mul’tfil’man prezentacii .Ezmäižen kerdan azjtegole kuctihe openikoiden vanhembid .Vastusele tuli Nikolajan plem’annik-ki Dmitrii Fedotov .
– Dmitrii starinoiči vepsläižen runoilijan elos da rados , siš , kut Nikolai tuli Karjalaha . Lapsed pagištoitiba händast .Sen ližaks Dmitrii abuti meile änetada mul’tfil’man , se kaikile lujas tuli mel’he , – sanui Natalja Spiridonova .
Nece melentartuine projekt ühtenzoiti kaikid : opendajid , lapsid , heiden vanhembid .Mul’tfil’man tegemižehe lapsed opendajidenke paniba henged , äi väged ."Maid "-runos om süvä da tärged jüvä . Se käski lapsid meletada tärktoiš eloazjoiš , nähta čomut prostiš azjoiš .Mul’tstudijan ohjandajad toivoba , miše hö jatktaba tundištadas Nikolai Abramovan sädandradonke , ved’ hänen runod libutaba lapsiden henged .
Teravas mul’tfil’m voib kacta Petroskoin školan-internatan №24 saital .
Nikolai Abramovan runod libutaba lapsiden henged
Veps
New written Veps