Texts
Return to list | edit | delete | Create a new | Statistics | ? Help
Nadežda Vasiljeva. Pappi Ioann Tsvetajevin kunnivokši
Nadežda Vasiljeva
Pappi Ioann Tsvetajevin kunnivokši
Karelian Proper
New written karelian
Kalevalan
piirissä ennein perspektiivittömien kylien likvitoinnan alkuo , kumpani mäni meijän mualla viime vuosišuan 60-luvulla , oli yli 60 kylyä .
Kylissä elettih ihmiset , ruattih mualla , kynnettih , kylvettih , pyyvvettih kalua , piettih šiivattua .Yksi šemmosista kylistä oli Jyvyälakši .
Arhiivatietojen mukah enšimmäini kirjallini maininta kyläštä oli jo XVII vuosišualla .Jyvyälakši , kuin ni Kalevalan piirin monet toisetki kylät , pietäh runokylänä .Tänne XIX vuosišuan lopušša kävi runonkeryäjä Elias Lönnrot šekä šuomelaini lingvisti Karjalainen .Šamoista arhiivalähtehistä voipi šuaha tietyä , jotta arheologiset tutkimukšet viitatah šiih , jotta kylän alovehella ta lähellä olijilla mailla oli muinaisihmisen elinpaikkoja .
Onnakko 60-luvulla kylä oli kačottu perspektiivittömäkši : oli pantu kiini koulu , kirjašto , pošti , paikallini kauppa , klubi , navetta .Kyläläiset ašettauvuttih elämäh piirin toisissa paikoissa , eniten Kalevalan pos’olkašša .
Alevtina Denisova , omua šukunimie Torvinen (šanakši , tämä šukunimi oli kaikkein yleisin Jyvyälahešša ) muistelou :
– Mie olen šyntyn ta kašvan Jyvyälahešša , še on miun pieni kotimua .Muissan , kuin kylä pantih kiini , kuin šitä vähitellen "tapettih ": päivittäin , netälittäin , kuukaušittain .Enšin pantih kiini koulu , kotvasen ajan piäštä – pošti .Šiitä tuli paikallisen klubin vuoro , a mie šilloin ruavoin kirjaštošša .Niin pikkuhil’l’ua elämä Jyvyälahešša šammu : kohta työkykyset eläjät jätettih omat šeuvut , eläkeläisetki jiätih kyläh vain lyhyökši ajakši .Ilman kauppua , šähkyö , liäkärin hoituo elämä tuli mahottomakši .
Alevtina Ivanovna kerto , kuin hiän lapšena uuvvenvuuvven juhlissa pyöri piirileikissä potruškojen kera kylän klubissa .Vielä ennein neuvoštovallan ašettamista Karjalan pohjosešša , klubin rakennuš oli kylän kirikkönä .Še oli rakennettu vuotena 1898 ta omissettu pyhällä šuuriruhtinahalla Aleksandr Nevskillä .Neuvoštovallan tultuo kiriköššä järješšettih enšin lukutupa , šiitä klubi .Šuuren Isänmuallisen šovan aikana Jyvyälakši oli šuomelaisien miehitykšeššä , ta kiriköššä šijottu vihollisen štabi .
– Mie hyvin muissan kirikön rakennukšen , šanelou Alevtina Denisova . – Vaštapiätä , tien toisella puolella oli kalmismua kallistunuijen ristien kera . Vanhemmat kiellettih meitä šielä juokšentelomisešta ta kisuamisešta .
Šillä kylän vanhalla kalmismualla löysi rauhan pappi Ioan Tsvetajev .Hiän oli hauvattu kirikön takana 110 vuotta takaperin .
Tuanoin Kalevalan Pietarin ta Puavilan kirikön tuaton Jevgenii Korenevin puoleh kiännyttih Ioan Tsvetajevin šukulaiset kyšyllä ašettua risti hautaušpaikalla ta šillä elvyttyä muisto .Pyyntöh vaššattih kuin tuatto Jevgenii , niin ni monet Pietarin ta Puavilan kirikön kävijät .
Hyö tultih Jyvyälahteh ta enšimmäisellä matalla kačottih kylä , löyvettih entisen kirikön perušta , paistih ihmisien kera , ket käyväh kyläh koko kešäkši , ta šuatih tietyä , jotta vielä on šäilyn vanhan časoun’an rakennuš .Časoun’a oli rakennettu XIX vuosišuan keškipuolella Jumalanemon Uspenjan kunnivokši .Neuvoštoaikoina še oli muutettu elintalokši ta šielä vielä nytki eletäh ihmiset .
Toisella matalla kyläh tuatto Jevgenii Korenev ta hänen apulaiset šahattih penšahat ta puut , mit kašvettih kirikön peruštalla šekä kerättih ruhkat tämän paikan ympäriltä .Hyö ašetettih kumarrušristi kirikön alttarin paikalla kaikkien pappien muissokši , kumpaset palveltih tällä mualla .
Ka tämä ei ole loppu .Vielä on šuunniteltu toisieki ruatoja .Tällä hetkellä kirikön kävijät valmissetah erikoini tiijotuštaulu , mi kertou jyvyälahen kirikön ta šen papiston istorijašta .Jo elokuušša še tuuvvah Jyvyälahteh ta ašetetah kirikön peruštan luona .Täh tapahtumah ta kumarrušrissin pyhittämiseh kalevalalaiset vuotetah niise pappi Ioan Tsvetajevin šukulaisie .
Pitäy vielä lisätä , jotta entisen kirikön rakennukšen jiännökšet kylän likvitoinnan aikana vietih Kalevalah .Uhtuon sovhosi pitälti šäilytti šielä muanviljelyšvehkehie .Nyt tämä jo hyvin lahonut rakennuš kuuluu piirin hallintoh : šielä , kuin enneinki , šäilytetäh tarpehettomie tavaroja .
Pappi Ioann Tsvetajevin kunnivokši
Karelian Proper
New written karelian
–