Texts
Return to list | edit | delete | Create a new | Statistics | ? Help
Nadežda Mičurova. Puuarhitektuuran säilytändy on suuri vastus. 1
Nadežda Mičurova
Puuarhitektuuran säilytändy on suuri vastus. 1
Livvi
New written Livvic
Kižin suarimuzein 60-vuozipäiväkse
Kižin suari
on Karjalan da Ven’an kaunehembii paikkoi .Joga vuottu tänne tulou tuhanzii turistoi ihailemah ainavoluadustu puuarhitektuurua da čomua Karjalan luonduo .
Tänävuon täydyi kuuzikymmen vuottu kui Kižin suarimuzei toimiu kul’tuurualan valdivolaitoksennu .Se on tundiettu ymbäri muailmua Spuasan pogostan kirikkölöil da kellojalloil .Tiettäväine , suaren piälimäzenny nähtävyksenny on 22-kuupolline uvvistettu Jumalan kirkastuksen kirikkö .Suarel on muudugi histouriellistu rakendustu , kuduat hyvin ozutetah karjalazien , vepsäläzien da ven’alazien bohattua kul’tuuruperindyö .Nämmis puurakenduksis kuigi suares suurdu huoldu pidäy Kižin suarimuzein johtai Jelena Bogdanova .Kižin suaren tämänpäiväzes elokses , ruadolois da pluanois tuliekse Jelena Viktorovna saneli meijän lehtele .
Jelena Viktorovna , tämä vuozi on merkittävy Kiži - muzeih niškoi .Se pidäy omua 60-vuozipäiviä .Kui työ varustuitto da varustutto täh vuozipäiväh ?Midä on jo ruattu da midä on vie pluanois ?
– Joga vuozi muzeil on ylen tärgei . Kuuzikymmen vuottu meijän muzeil rodih 1. päivänny pakkaskuudu .Meil on varustettu äijy eriluadustu piduo tämän päivän nimeh .Ezimerkikse ozuttelu , kudai on omistettu muzein alguhpanijale , nerokkahale arhitektorale Aleksandr Opolovnikovale .Hänen aigah suarele toizis kylispäi ruvettih tuomah taloloi , časounazii , kirikkölöi , oldih pietty restavroičusruavot mustopaččahil .On ylen tärgei kaččuo , kui kuvveskymmenes vuvves kehityi muzei , midä on suadu luajitukse , i midä myö tahtozimmo iellehpäi jatkua .Kiži-muzei oli luajittu muga , gu ozuttuaOniegantagavozen ven’alazien , karjalazien da vepsäläzien kul’tuurua enzikse , viegi pomoroin kul’tuurua .Kaikkie , midä koskou arhitektuurua , etnogruafiedu , nämien kanzoin elaigua da taboi , sidä myö olemmo täs tutkimas .Myö ozutammo kyläläzen ristikanzan elaigua , kui meijän eziižät elettih , midä hyö ruattih i on ylen tärgei , gu se siirdyi polvi polves .Se ei ole vai muite ozutandua , se on jo eländytaba .Meil pidäy ruistu kazvattua , muarjua kerätä , vastua azuo da heiniä varustua .
Mennyt kuul työ olitto Intermuzei .BRIKS+ -festivualis , kudai piettih Moskovas , yhtyitto pyöryžän stolan ruadoh , kudaman nimi oli "Restavroičussistiemu Ven’al ".Sanelkua vähäzen , mih näh työ sie pagizitto ?
– Enzikse myö pagizimmo , kui pidäy opastua nuorii , valmistua ammatillizii restavroiččjoi , gu hyö jälles tuldas ruadoh muzeiloih . Minä sanelin meijän Rahmanovan keskukses , kudai ruadau suarel , kui myö valmistammo restavroiččijoi .Se on moine pitkyaigaine suuri ruado , kudai andoi jo omat tulokset – enämbi tuhattu hengie ymbäri Ven’ua opastui meijän keskukses .Pidäy sanuo , gu ennepäi meil oldih IKKROM :angi kursat , kunne kävyi kahteskymmenes muaspäi rahvastu , kudamil on mieldykiinnittäi tutkie puuarhitektuurua .Kaikin sanottih omat hommat .Meil pidäy inženierua , konstruktorua , arhitektorua .Niilöin valmistamizes myö pagizimmo .Puusepät da restavroiččijat meil ollah , a kui se ruado panna projektoih ...Tiettäväine , pidäy ammatillistu rahvastu .Sidä kaikkie myö sie pagizimmo .
On tärgei opastua nuorii kirvesmiehen ruadoh
Vladimir Rahmanovan -nimine kogo Ven’an puuarhitektuuran mustomerkilöin säilytändykeskus Kižin suarel oli avattu pakkaskuul vuvvennu 2020 Ven’an kul’tuuruministerstvan kannatuksel .Se oli luajittu sih niškoi , gu varustua hyvii kirvesmiehii da puunke ruadajii spetsialistoi , kuduat voidas pidiä restavroičuruadoloi .Perustehennu kogo Ven’an säilytändykeskuksen luadimizeh rodih Opastus-metoudielline kirvesmiehien keskus , kudai toimiu Kižis vuvves 2014.
– Myö opastammo ristittyzii , kudamat jälles voijah tutkie , kohendua , pidiä suurii restavroičusruadoloi mustopaččahil , suuril kirikkölöil libo kodiloil . On eriluadustu kaheksa mostu programmua , kudamii myö voibi opastuo .Ezimerkikse , Luvemmo mustopačastu -programmu .Opastammo midä pidäy ruadua , gu kodi ei lahonis .Meil ollah opastundukniigat da 84 mustopačastu eriluadustu , kudamii myö tutkimmo i kudamil eriluaduzii ruadoloi voimmo pidiä , kui kebjembii , konzu myö pordahii kohendammo , alusvenčoi vaihtammo libo levoloi kohendammo , muga i jygiembii , konzu kaiken taloin riičimmö , sit uvvessah keriämmö , restavroičemmo .Meijän muzeil on kaksi litsenziedu – yksi restavroičusda kohendusruadoloin pidämizeh , toine – opastamizeh .
Puuarhitektuuran säilytändy on suuri vastus. 1
Livvi
New written Livvic