Тексты

Вернуться к просмотру | Вернуться к списку

TULE TOIČI, TYÖNNÄ LAPSII

История изменений

17 января 2023 в 11:01 Нина Шибанова

• создал(а) текст
• создал(а) текст: Ennevahnas oli tavannu talven aigua kävvä ad’voih omien luo, kerdu kois nimittumua kiirehty ruaduo ei olluh. Enimite ad’voih käydih tyttölapset, neidizet. Käydih, tiettäväine, kunnetah toizeh kyläh rahvastu nägemäh da iččie ozuttamah. Kerale otettih kezriämisty, nieglomistu, a taloin vägi ad’voidu ei ruatutannuh, andoi huogavuo, sendähgi sanottih: ”Ad’vois ei pane ailastu bokkah”. Jälles murginua ad’voidu potakoittih viertä huogavumah, kerdu ”et ku painane palastu, sit painat ailastu”. Ylen puaksuh jälles ad’voičendua lähikyläspäi tuli sulhaine koziččemah ad’voidu mučoikse, olihäi tavannu tuvva andilas muijalpäi. Mučoidu enzi kerdua työttih ad’voih kodoilah kuvven nedälin peräs jälles miehele menendiä. Käydih ad’voih neidizet, nuoret mučoit, kävähteltihgi jo elähtännyöt inehmizet, heilgi oli himo nähtä omii da kuulta kaiken mieron uudizet. Hos sie ruadoh ei potakoittu, ga ičel pidi nähtä da tostavuo mil voibi auttua taloin vägie, semmite emändiä. Ken ei tostavu auttamah – lähtijes sai kuulta, konzu kentahto ižändyväis peitoči burahtih: ”Harvembah kävyt – armahembi olet”. Ad’vois olles pidi tiediä, min verdu sie voibi olla: voibigo olla nedäli, kaksi vai kolme nedälii. Liigua ei pidänyh gostie, hos midä armahembi olit. Kerran jo elähtännyh Outti, kudual ičellehgi oli lapsii perehes, hätkestyi, ižändyvägi jo terstavui ad’voih, ei malta kui hänes erota, kui händy kaimata. Jälgimäi Outti on jo kynnyksel, passiboiččeh hyväs gostitandas. Taloin emändy toivottau hänele: – Jumal keräl. Tule toiči. – Tulen, tulen, vastuau Outti da yhten jallan jo nostau kynnykses piäliči. – Tule toiči, työnnä lapsii. – Työnnän, työnnän, ihastui Outti. – Ruohkan buolan aigua, jatkau emändy. Outti uvvessah hyppäi pertih: – Mindäh ruohkan buolan aigua? – Vähembi syvväh, kuuluu vastavus. Kodih tulduu Outil kyzytäh: – Kuibo, Outti, sinuu gostitettih? – Ylen hyvin: muile vie valgies valettih, a minule ainos vaskes. Outile valettih vaskisamvuaraspäi pal’l’astu hiilavua vetty.