Тексты
Вернуться к просмотру | Вернуться к списку
”Pyhäžy dielo”
История изменений
19 января 2023 в 15:19 Нина Шибанова
- создал(а) текст
- создал(а) текст: Karjalan Kanzallizen teatran Pyhäžy dielo -spektakli painuu joga kaččojan mieleh. Viluverellizenny sidä kaččojes vikse niken ei olluh. ”Pyhäžy dielo” liikuttau syväindy, panou miettimäh da äijis kohtis itketyttäygi. Se tapahtuu sendäh, ku spektaklin teemu on rahvahan syväindy koskii, da vie sendäh, ku laval näet nerokkahii ozuttelijoi. Pyhäžy dielo -spektaklis on kaikkiedah kaksi roulii, kaksi piähengie: ukko da akku, Grigourii da Vasilisa. Heidy ozutetah Ven’an muas da Karjalas kuulužat da arvostetut artistat Pekka Mikšijev da Vieno Kettunen. Enämbän 60 vuottu hyö eletäh yhtes da ruatah yhtes teatras. Pyhäžy dielo -spektakli on luajittu Baškortostanan kirjuttajan Florid Bul’akovan ozutelman mugah. Sen ohjuajannu on Andrei Dežonov. Kanzallizes teatras Pyhäžy dielo -spektaklii ozutetah kahtel kielel: ven’akse da karjalan kielen kahtel murdehel. Syvyskuul vuvvennu 2009 oli spektaklin enziozutelmu. Silloi se ozutettih ven’an kielel. Kevätkuun 14. päivänny vuvvennu 2010 Pekka Mikšijevan 75-vuozipäivän kunnivokse spektakli enzikerdua piettih livvin kielel, kudai on Pekka Mikšijevan muamankielenny. Vuvvennu 2016 Pyhäžy dielo -spektaklii ruvettih ozuttamah jo vienan kielel, kudai on Vieno Kettuzen muamankielenny. Pekka Mikšijev on roinnuhes Anuksen piirin Videlen kyläs. Vuvvennu 1957 loppi Leningruadan teatrallizen instituutan. Vieno Kettunen on roinnuhes Kalevalan piirin Kuusiniemen kyläs. Viizitostuvuodizennu piäzi opastumah Karjalan Kanzallizen teatran (sillozen Karjal-suomelazen druamuteatran) stuudieh. Kanzallizes teatras Pekka da Vieno ruatah enämbän kuuttukymmendy vuottu.Sit aijas on ozutettu äijy roulii da suadu äijy palkinduo. Vuvvennu 1972 Pekka Mikšijev sai korgeiarvozen K. Stanislavskoin palkindon Vasselein roulis Otatko miut, Karjalan mua -spektaklis. Vieno Kettunen on Kalevalan piirin kunnivoittu eläi, Karjalan piämiehen Sampo-palkindon da monien Onežskaja maska-palkindoloin suannuh. Pekka Mikšijev da Vieno Kettunen ollah karjalan kielen da karjalazenkul’tuuran akkiloiččijat da kehittäjät. Hyö ollah karjalazen rahvahan Oma Pajo -horan perustajii da enzimäzii pajattajii, Karjalan Rahvahan Liiton ruavon alguhpanijoi.