Тексты

Вернуться к просмотру | Вернуться к списку

Iisus Lehtikovan pruazniekas

История изменений

23 февраля 2023 в 19:00 Нина Шибанова

• создал(а) текст
• создал(а) перевод текста
• создал(а) текст: ¹ Tämän jälles Iisus käveli eri puolil Galilein muadu.^ Juudien mual Häi ei tahtonuh kävellä, ku jevreit tahtottih tappua Händy. ² Jevreilöin Lehtikovan pruazniekku oli lähäl. ³ Iisusan vellet sanottih Hänele: «Mene Juudieh, sit sinun opastujatgi suahah nähtä, mittumii ruadoloi sinä ruat. ⁴ Eihäi niken pie peitos omii ruadoloi, ku tahtonou iče olla nägevis. Kerran on n՚eruo nengozeh, ozuta muailmale mi miehii olet». ⁵ Velletgi ei uskottu Häneh. ⁶ Iisus sanoi heile: «Nygöi vie ei ole minun aigu – a teile pädöy mi aigoi i olgah. ⁷ Teidy muailmu ei voi vihata, a minuu se vihuau, ku minä tovestan – sen ruavot ollah pahat. ⁸ Mengiä vai työ pruazniekale. Minä en vie lähte tälle pruazniekale, ku minun aigu ei vie tulluh». ⁹ Nenga Häi sanoi i jäi Galileih. ¹⁰ No konzu vellet lähtiettih pruazniekale, Iisusgi lähti sinne, ei rahvahan nähten, a peitoči. ¹¹ Pruazniekan aigua jevreilöin vahnimat ečittih Händy i kyzeltih: «Kusbo se mies on»? ¹² Rahvahan keskes oli äijy kiistua Häneh näh.^ Yhtet sanottih: «Häi on hyvä mies», toizet sanottih: «Ei ole, häi smuttiu rahvastu». ¹³ Silmis niken ei ruohtinuh paista Häneh näh, ku kaikin varattih jevreilöin vahnimii. ¹⁴ Konzu pruazniekku oli puolivälis, Iisus nouzi jumalankodih i rubei opastamah. ¹⁵ Jevreilöin vahnimat diivittihes i sanottih: «Kuibo tai opastumatoi mies voibi tiediä Pyhät Kirjutukset»? ¹⁶ Iisus sanoi heile: «Se, mih minä opastan, ei ole minus lähtenyh, a on Hänes lähtenyh, kudai työndi minuu. ¹⁷ Ken tahtou noudua Hänen tahtuo, se piäzöy perile, ongo minun opastus Jumalas lähtenyh vai pagizengo omas ičespäi. ¹⁸ Se, ken sanou omii duumii, tahtou ičelleh kunnivuo. No se, ken tahtou kunnivuo omale työndäjäle, pagizou tottu, hänen sanois ei ole kielastustu. ¹⁹ Andoihäi Moisei teile Zakonan. No ni yksi teis ei novva sidä. Miksebo työ tahtotto tappua minuu»? ²⁰ Rahvas sanottih: «Sinus on paganhengi. Kenbo sinuu tahtou tappua»? ²¹ Iisus sanoi vastah: «Minä luajiin vaiku yhten ruavon, i työ kaikin sidä kummeksitto. ²² Moisei andoi teile ymbärileikkuandan – tovel sanuo, se ei ole lähtenyh Moiseispäi, a tuattoloin tuattoloispäi – i sen työ luajitto suovattangi. ²³ Ku kerran ristikanzale luajitah ymbärileikkavus suovattangi, ku ei rikkuo Moisein Zakonua, ga miksebo sit työ oletto vihazet minun piäle, ku minä suovattan piästin ristikanzan ynnäh? ²⁴ Älgiä suudikkua vai piälpäi kaččojen, a suudikkua oigiel suvvol».