Тексты

Вернуться к просмотру | Вернуться к списку

Petrie viäritetäh Jerusalimissa

История изменений

30 июня 2023 в 11:31 Нина Шибанова

• создал(а) текст
• создал(а) перевод текста
• создал(а) текст: ¹Apostolit ta Juutijan eri puolilla olijat uškovellet kuultih, jotta muutki rahvahat kuin jevreit otettih vaštah Jumalan šana. ²Konša Petri tuli Jerusalimih, laitaleikatut uškovellet moitittih häntä.^ Hyö šanottih: ³«Šie kävit laitaleikkuamattomien luona ta šöit hiän kera». ⁴ Šilloin Petri šelitti heilä, mitein kaikki oli alušta loppuh šuate.^ Hiän šano: ⁵«Mie olin Joppijan linnašša ta moliuvuin. Šiitä hurmehuin ta nävin, mitein taivahašta šolahti juštih miun eteh mi lienöy aštien tapani niin kuin šuuri huršti, kumpaista lašettih nelläštä kokašta. ⁶Kun rupesin šitä kaččomah tarkemmin, niin nävin muan nelläjalkasie elukkoja, petoja, ryömijie ta taivahan lintuja. ⁷ Vielä kuulin iänen, mi šano miula: "Nouše, Petri!^ Ise ta šyö"! ⁸Mie vaštasin: "En šuinki šyö, Hospoti!^ Konšana en ole pannun šuuhuni mitänä pakanua enkä kiellettyö". ⁹Šilloin iäni taivahašta pakasi uuvveštah ta šano: "Min Jumala puhisti, šitä elä šie šano pakanakši". ¹⁰Näin oli kolmičči.^ Šiitä huršti kaikkineh päivineh noššettih jälelläh taivahah. ¹¹ Šiih šamah aikah kolme mieštä šeisattu šen talon eteh, missä mie olin.^ Hiät oli työnnetty Kesarijašta miun luokši. ¹²Henki šano miula, jotta miun pitäis lähtie hiän kera eikä epyällä. Miun kera lähettih vielä nämä kuuši vellie, ta myö mänimä Kesarijah Kornilin taloh. ¹³Hiän pakasi meilä, mitein näki koissa anhelin. Anheli šano hänellä: "Työnnä Joppijah miehie käymäh tänne Simoni, kumpaista šanotah Petriksi. ¹⁴Hiän šanou šiula šanat, kumpasien voimalla pelaššut šie ta koko šiun taloveh". ¹⁵ Ta konša mie aloin paissa, niin Pyhä Henki laškeutu Kornilin talošša olijih niin kuin alušša laškeutu meih. ¹⁶ Šiitä mie muissin, jotta Hospoti oli šanon näin: "Iivana kašto veješšä, vain tiät kaššetah Pyhäššä Henkeššä". ¹⁷Ka kun kerran Jumala anto heilä šaman lahjan kuin meiläki, konša alkoma uškuo Hospotih Iisussah Hristossah, niin mi mie olin Jumalua vaššuštamah»? ¹⁸ Tämän kuultuo kaikin rauhotuttih ta ruvettih ylentämäh Jumalua.^ Hyö šanottih: «Ka Jumala autto toisenvierosie niise kiäntymäh Hänen puoleh, jotta hyö šuatais elämä».