Тексты

Вернуться к просмотру | Вернуться к списку

Jerusalimin kerähmö

История изменений

04 июля 2023 в 14:11 Нина Шибанова

• создал(а) текст
• создал(а) перевод текста
• создал(а) текст: ¹Juutijašta tuli Antiohijan uškojakuntah eryähie, ket opaššettih: «Kun että antane laitaleikata iččienä Moissein käšyn mukah, niin että voi pelaštuo». ²Puavila ta Varnava oltih vaštah, ta šiitä as's'ašta tuli melkoni kiista.^ Šentäh šovittih, jotta Puavila, Varnava ta vielä eryähät muut lähettäis tämän kiistan takie apostolien ta vanhimpien luo Jerusalimih. ³Uškojakunta šuoritti hiät matkah.^ Hyö kulettih Finikijan ta Samarijan läpi ta kerrottih uškovellilöillä toisenvierosien kiäntymiseštä uškoh.^ Tämän kuultuo kaikin lujašti ihaššuttih. ⁴Konša hyö tultih Jerusalimih, uškojakunta, apostolit ta vanhimmat otettih hiät hyvin vaštah. Hyö šaneltih, mimmosie šuurie ruatoja Jumala oli luatin heijän kautti ta mitein Hiän oli avannun ušon oven toisenvierosilla. ⁵Šiitä eryähät uškoh kiäntynyöt farisseit šekauvuttih as's'ah.^ Hyö šanottih, jotta toisista vieroista uškoh kiäntynyöt niise pitäy laitaleikata ta käškie heitä elämäh Moissein Sakonan mukah. ⁶Apostolit ta vanhimmat keräyvyttih tätä kyšymyštä tutkimah. ⁷Pitän kiistan jälkeh Petri nousi ta šano heilä: «Vellet, työ tiijättä, jotta Jumala jo aikoja valičči miän joukošta miut, jotta miun šuušta toisenvieroset kuultais Hyvä Viesti ta kiännyttäis uškoh. ⁸Jumala, kumpani tietäy kaikkien šytämet, anto heilä Pyhän Henken šamoin kuin meiläki, ta näin näytti, jotta hyväkšyy nämä rahvahat. ⁹Hiän ei luatin mitänä eruo miän ta heijän välillä, vain puhisti heijän šytämet niise ušolla. ¹⁰Niin jotta mintäh työ nyt tahotta kiušata Jumalua ta panna opaššettavien harteilla jykie kannelmuš, kumpaista miän tuatot ei jakšettu kantua ta myö niise emmä jakšan? ¹¹ Myöhän ušomma, jotta pelaššumma Hospotin Iisussan Hristossan armon avulla, šamoin kuin hyöki pelaššutah». ¹²Šiitä kerähmö vakautu.^ Hyö kuunneltih Varnavan ta Puavilan pakinua šiitä, mitein šuurie merkkiruatoja ta kummie Jumala luati heijän käsien kautti toisenvierosien joukošša. ¹³Konša hyö lopetettih, Juakko šano: «Vellet, kuunnelkua nyt milma. ¹⁴Simoni Petri šelitti, mitein Jumala enši kerran lähešty toisenvierosie, mielien ottua heistä ičelläh rahvahan. ¹⁵Tämä käyt yksih Jumalan viessintuojien šanojen kera.^ Onhan Pyhissä Kirjutukšissa šanottu näin: ¹⁶ – Šen jälkeh Mie myöššyn ta rakennan uuvveštah Tuavitan kuatunehen kojin. Raunivoista Mie šen tuaš rakennan, kohennan entisekši, ¹⁷ anna kaikki muut ihmiset niise ečittäis Hospotie, kaikki kanšat, kumpaset Mie otan omakši.^ Näin šanou Hospoti, kumpani ruatau tämän. ¹⁸Jumala tietäy kaikki omat ruavot ilmasenikusista ajoista. ¹⁹ Šentäh olen šitä mieltä, jotta ei pie jykientyä niijen elošta, ket muista vieroista kiännyttih Jumalan puoleh. ²⁰Kuitenki miän pitäy kirjuttua heilä, jotta hyö ei šyötäis valehjumalien pakanoimua šyömistä, jotta ei käytäis vierahih naisih, ei šyötäis lihua, mistä veri ei ole lašettu, eikä vertä ta jotta ei ruattais toisilla šitä, mitä ičelläh ei tahota. ²¹Onhan Moissein Sakona jo ammusis ta ajoista tullun tunnetukši kaikissa linnoissa, kun šitä luvetah iäneh sinagogoissa joka šuovatta».