Тексты
Вернуться к просмотру | Вернуться к списку
Puhtasjärven Maša
История изменений
22 августа 2024 в 16:41 Нина Шибанова
- создал(а) текст
- создал(а) текст: ... Nuožarven školas viijendes da kuvvendes kluasas opastundu meni suomen kielel, kui i omas Puhtasjärven kyläs. Vai yksi urokku oli ven’akse. Mašal kaikis jugien oli opastuo pagizemah ven’akse. Kirjuttamah häi opastui terväh dai arvosanat oldih hyvät, a paista ei maltanuh nimidä. Muga mendih dielot toizilgi. Ven’an kielen opastai oli Grigorii Ivanovič. Häi urokoil sanelou da kyzyy ven’akse, a opastujat vastatah karjalakse. Grigorii Ivanovič panou kolmozen da muhizou: – Rauhu dielo. Konzutahto opastutto pagizemah ven’aksegi. Tiettäväine, urokoin keskučoil kai lapset paistih vai karjalakse. Grigorii Ivanovič toiči pyörähtäh kluassah i vagavasti mustoittau: – Pidäy opastuo pagizemah ven’akse. Mindähbo pagizetto karjalakse? A lapsil ven’an kieli ni mieles ei ole. Seiččemendes kluasas kai urokat roittihes ven’an kielel. Suomenkieline opastundu heitettih puhtahakse. Opastujil rodih vie jugiembi opastuo, a opastajil sellittiä urokkoi. Muantiijon opastai oli nuori suomelaine inehmine. Häi kerran, onnuako nareko, kyzyi opastujii: – Kenbo tiedäy, kui ven’akse roih sana “sarvikarja”? Vai yksi kudailienne opastujis tiezi sen sanan i vastai: – Rogatii skot! Opastai kiitti händy i vedi urokkua ielleh. Maša ihastui, gu tiijusti ven’akse uvven sanan. Muiten hänel muantiijon urokat oldih meldy myö i annettihes kebjiesti. Kaikis enimäl Mašua miellytti matemaatiekku. Onnuako, se oli vie opastajan periä. Opastai liygiläine mies Mokkijev Maksim Jakovlevič vedi matemaatiekkua viijendes seiččemendeh kluassah suate. Häi oli Mašan kluasan johtajannu kai kolme vuottu. Maksim Jakovlevičan sellittämizet Maša kerras otti piäh. Kluasas gu ei kaikin lienne ellendetty, sanommo, mi se on yksi kolmasvuitti, Maksim Jakovlevič puhtahal livvin kielel sellitti: – Otakkua huruah kädeh pehmei pačoi. Oigieh kädeh otakkua terävy veičči. Pačoi leikakkua kolmeh yhten tobjuoh vuittih. Yksi vuitti annakkua tuatale, toine annakkua muamale, a kolmas otakkua ičele. Vot kudaman otitto ičele, se ongi pačoin yksi kolmasvuitti. Nygöi ellendittögo? – Ellendimmö! – yhteh iäneh vastai kluassu. Maksim Jakovlevič puaksuh kučui Mašua kluasan edeh vastamah libo kluassulavval lugemah zaduaččua. Andau kädeh ozutandukeppizen i käsköy: – Sanele toine kerdu. Tuhkijev ei ellendännyh vie nimidä. A Mašale panou viidozen. Maksim Jakovlevič suvaiččui Mašua i puaksuh kehitti händy: – Seiččemen kluasan loppiettuu sinul pidäs mennä ielleh opastumah Petroskoile opastaiopistoh. Mašal ei suannuh ielleh opastuo. Hänel pidi eččie ruaduo da mennä omua piädy syöttämäh.