Тексты
Вернуться к просмотру | Вернуться к списку
Kut Vidlas Uz’ voz’ vastatihe
История изменений
23 января 2025 в 11:20 Нина Шибанова
- создал(а) текст
- создал(а) текст: Nacein, äjiden ristituiden täht kaikid parahimad sarnaližed praznikad oma Uz’ voz’ da Raštvad. Necen čudokahan aigan, konz ma om kattud lumesižel pälusel, pud seižuba lumipövuiš, a kaikiš lidnoiš, küliš, eskai kaikid edahaižembiš der’ouniš loštaba lämoihuzil Uden voden kuzed, ristitud varastaba todesišt čudod. Meiden Piterin agjan Podporožjen rajonan Vidl-küläs om kogonaine hüviden noididen jouk – nene oma Vepsläižiden fol’kloran keskusen radnikad da ohjandai Maria Mihailovna Lapikova. Hö paniba äi vägid sen täht, miše vaumištada meiden küläs melentartuižid praznikoid. 2.–7. vilukud oli tehtud äi erazvuiččid azjtegoid kaikuččen igän täht. Nene oliba ekskursijad Vepsläižiden fol’kloran keskustme, Uden voden teatraližid ozutelusid lapsile, kargprogrammoid norištole da aigvoččile, Uden voden muštlahjoiden tegemižen mastar’-klassoid, kvest da praznikaline koncert. Venäman eläjil om hüvä tradicii – kacta Uden voden praznikoiden aigan armhid fil’moid. Nece idei pandihe “Uden voden melodijad” - praznikaližen koncertan programman pohjaze. Noidad tegiba muga, miše Pakaižuk unohti praznikas da jäi kodihe kacmaha televizorad… Miše Pakaižuk muštištaiži koncertas, Lumineičukaine da Vasilisa Premudraja johtutiba hänen armhid fil’moid. Čudokahal ekranal voi nägištada tetabiden fil’moiden hengid, a scenalpäi kului kaikile tutabad melodijad, nägui karg- da teatrozutelused. Paiči Vepsläižiden fol’kloran keskusen radnikoid da sijaližid sädaisebroiden ühtnikoid scenale tuliba adivod Piterišpäi – aigvoččed da lapsed. Ked tuliba Vidlaha rižamaha läheližid, toiba kerdale pajo- da karglahjoid. Ved Uz’ voz’ om aig sen täht, miše vastatas läheližidenke, keratas stolan taga kanznikoidenke, pagišta sebranikoidenke. Toine läm’ vastuz oli “Čudod planan mödhe!” -ehtal. Ende Vidlan Kul’turpertiš oli tradicii kanman Raštvoid kerata külän eläjid stoliden taga “Ö edel Raštvoid” -vastusel. Vepsläižiden fol’kloran keskusen radnikad kaičiba necen tradicijan. Hö tegiba sen vuiččen azjtegon – vastuz läksi čomaks. Ehtan aigan mäni “Ozaida melodii” -vänd stoliden taga. Ristitud surel tahtol pajatiba armhid pajoid. Ehtan aigan praznikan vedäjad iloiteliba adivoid erazvuiččil vändoil, taričiba ühtneda kargmarafonaha. Oli tundmuz, miše aigvoččed ühteks ehtaks pördutiba enččen aigan tagaze i tegihe pordoks lapsikš – mugoižel surel tahtol hö varastiba Pakaižukod da vediba hänenke horovodan pajatades “Mecas sündui pen’ kuz’” -pajod, ihastusiš ühtniba vändoihe da konkursoihe! Energijan, ilon, hüvüden da lämuden vägi om sadud! Tahtoin sanuda sur’ spasib praznikoiden tegijoile meiden unohtamatomiš emocijoiš! A kaikile toižile – toivotada mirud da tervhut, kanzan lämut da satusid udes 2025. vodes!