Тексты
Вернуться к просмотру | Вернуться к списку
Tuavitta Israelin čuarina
История изменений
02 февраля 2025 в 21:31 Нина Шибанова
- создал(а) текст
- создал(а) текст: Šen jälkeh kun Tuavitta voitti Goliaffin, čuari Sauli kučču hänet luokšeh. Tuavitta oli rohkie šotapiälikkö, kumpasen johtamina israelilaiset voitettih vihollisieh. Saulin kuoltuo Tuavitašta tuli Israelin čuari. Hiän rupesi elämäh Jerusalimissa ta halličči šieltä muatah. Jo šilloin konša Tuavitta paimenti tuattoh lampahie, hiän mielelläh šoitti arfalla ta laulo iččeh kekšimie lauluja. Tai čuarinaki ollešša hiän kekši lauluja, kumpasie laulettih Jumalan kunnivokši šekä laulajat jotta tavallini rahvaš. Piiplijašša on äijän Tuavitan lauluja tahi psalmija. Tuavitta täyveštä šyväimeštäh tykkäsi Jumalua ta psalmiloissah hiän ylenti Jumalan nimie. Tuavitta tiesi, mitein tärkie lampahilla on hyvä paimen, šentäh kun hiän iče nuorena paimenti lampahie. Eryähäššä psalmissah hiän vertuau Jumalua hyväh paimeneh näin: «Hospoti on miun paimeneni, en ole minkänä vailla. Hiän viey miut vihreillä niittylöillä, hiän juohattau miut vesien viereh, šielä šuan levähellä. Hiän virottau miun henkeni, hiän juohattau miut oikiella tiellä oman nimeh kunnivon tähen. Vaikka mie kulkisin pimieššä notkošša, en varajais mitänä pahua, šentäh kun šie olet miun kera. Šie šuojelet milma kiälläš, juohatat miun aškelie paimenšauvallaš. Šie varuššat miula stolan vihollisieni šilmien ieššä. Šie voitelet miun piäni hyvähajusella voitiella, ta miun juoma-aštieni on piripintani. Šiun hyvyš ta armahuš ympäröiččöy milma kaikkina elämäni päivinä, ta mie šuan elyä jumalankojissa päivieni loppuh šuate».