Тексты

Вернуться к просмотру | Вернуться к списку

Metsolan polkuja myöten hiihäten

История изменений

13 февраля 2025 в 15:35 Нина Шибанова

• создал(а) текст
• создал(а) текст: Koštamukšelaiset aktiivisešti vietettih tuiskukuun enšimmäini netälinloppu. AŠTUMALLA TA ŠUKŠILLA Arktini Metsolan polkuja myöten -lumifestivali kešti kakši päivyä. Enšimmäini festivalipäivä oli omissettu šauvakävelyllä. Enšimmäiseštä kačahukšešta tavallisella liikuntalajilla on äijän yksityiskohtie. Šentäh ennen kuin lähtie kävelömäh šauvojen kera, šauvakävelyn opaštaja Jevgenija Muhotina vietti startin ošallistujilla lämmittelyharjottelun – toičči oli vaikie luatie šitä, ka kaikin ahkerašti toissettih opaštajan näyttämie liikkehie. Šen lisäkši Jevgenija näytti, mitein oikein aštuo šauvojen kera, jotta liikunta tois vain hyötyö tervehyöllä eikä vahinkuo. Järještäjät valmissettih ošallistujilla kolmekilometrini piirireitti. Matan aikana kävelijien vaštah tultih šuojelumečän elukat: repo, kontie ta hukka – hyö näytettih urheilijilla oikieta tietä. Joukon enšimmäiseššä rivissä aštu Metsolan simvoli – Tapio-poro. Koululaini Maksim tuli loppuh enšimmäisenä. Hiän harraštau dz’udo-urheiluo, a šauvakävelykilpailuh ošallistu enšimmäistä kertua. – Milma miellytti kilpailu, vaikka oli vaikie aštuo järvie myöten, toičči lumen alla oli vettä, šano Maksim kilpailun jälkeh. TAPION MATKUA MYÖTEN Aikuhiset hiihtäjät hiihettih marafonin puolen ta nellännenošan matkoja, še on 25 ta 12,5 kilometrie. Pohjoisšiä toi vaikeukšie hiihtäjillä. Kontokki-järvellä oli kova tuuli ta še kuato ihmisie jaloilta. Irina Šapkova ei ni huomannun, kuin kavotti lakin. – Mie hiihin 12,5 kilometrie. Avarapaikalla tuuli oli erityisešti kova. Konša hiihin järven kolmannen ošan tunsin, jotta on kylmä ta ymmärrin, jotta tuulenpuška vei lakin piäštäni. Loppuh šuaten jäi vain kilometri ta mie jatoin kilpailuo. Yksi ošallistuja löysi miun lakin ta anto miula kilpailun lopun jälkeh, kerto Irina. Aikuhisien kilpailujen jälkeh oli pietty lapšien kilpailut – 100-metriset hiihtoajot. Lapšet oikein staraitih, ka još eryähillä ei onnistun ajua loppuh, ni Tapio-poro tuli avukši. Taikašankari otti hiihtokepistä ta veti lapšen loppuh. Lapšien sprintissä kaikin oltih voittajina ta šuatih metalit, a kaččojat räpytettih jokahisella lapšella ta yllätettih šanoilla: “Olet moločča! Vielä-vielä! Loppuh jäi vähäsen!” Joka vuosi festivalih tulou ihmisie enemmäštä paikašta. Tällä kertua ajamah Metsolan polkuja myöten tuli hiihtäjie Karjalan eri paikoista. Viktor Grigorjevič Voilov on Rukajärveštä. Hiän on 83-vuotini. Festivalissa hänet palkittih urheiluvarmuošta. – Mie olen ošallistun festivalih nellättä kertua peräkkäh. Tällä kertua oli vaikie hiihtyä, ka mimmoni kaunehuš on ympäri! Mie olen oikein tyytyväini, šaneli Viktor. Kyšymykšeh, mintäh on tärkie harraštua urheiluo, mieš šano, jotta šen anšijošta olet hyvällä mielellä, a še vaikuttau ni šuhtehih toisien ihmisien kera. Krasnov Boleslavilla Lietmajärveštä on 62 vuotta ta hiän kolmanteh kertah tuli festivalih. – Miun ieššä juoksi urheilumuasteri Jurii Mošin Pitkärannašta. Mie piteliyvyin hänen jäleššä. Sel’l’alla myö ohittima toini toista, ka loppuh miun onnistu tulla enšimmäisenä. Tämä festivali on erityini. Mie tunnen šukupolvien yhtehyttä. Kontokki-järvie pitin ennein kulki laukunkantajien matka, šano Boleslav Krasnov. Šuojelualovehen hiihtofestivalih otetah ošua koko perehet. Niin, Natalja Grivitskaja hiihti 12,5 kilometrie yheššä Katti-tytön kera, a hänen Huoti-poika ošallistu lapšien sprinttih. Perehen isäntä kannatti koko perehtä. – Jo monta vuotta otamma ošua kilpailuh. Myö mielellänä ajamma matan kaunehie paikkoja myöten. Kaikki on hyvin järješšetty ta kaikešta on ajateltu. Lapšilla on mukava ohjelma, hyö ei ikävöijä. Tänä vuotena sprintissä on enemmän ikäryhmie. Passipo järještäjillä urheilupruasniekašta ta lepopäiväštä, lisäsi Natalja. Toičči kaččojat nähtih tovellisie dramahetkijä. Koštamukšen voimakkahimmat urheilijat Vlad Stogov ta Matvei Naumenko koko matka hiihettih toini toisen peräššä. Lopušša Matvei revälti voiton kilpailijalta. – Oli oikein vaikie. Järvellä oli kova tuuli, a mečäššä šato vereštä lunta ta šauvat upottih. Ajattelen, jotta voittua autto oikie taktiikka. Koko matan mie olin Vladin šelän takuana ta šentäh šäilytin voimua loppuh šuateh, šano omista vaikutelmista Matvei. 25 kilometrin piävoittajakši tuli Art’om Mihejev. Naisien kešen 12,5 kilometrin ajošša voitti Jekaterina Sizova. Še oli tytön kolmaš kilpailu. Vuotena 2023 hiän oli kolmantena, a vuotena 2024 voitti kultametalin. Voittajat šuatih sertifikatit partn’oriloilta – 10 tuhatta rupl’ua. Hiihtoajojen lisäkši festivalissa oli vietetty koripallo lumikentällä, kyykkä, šuomelaisilla kelkoilla ta t’ubingilla ajot, šekä kenttä, missä jokahini šai työntyä kiekko tovellisih veräjih. Arktisen Metsolan polkuja myöten -talvifestivalin järještäjinä ollah Koštamukšen luonnonšuojelupuisto ta kanšallini Kaleval’skii-puisto šekä Karjalan pelletti -yhtijö ta Koštamukšen kaupunkipiirin hallinto.