Тексты

Вернуться к просмотру | Вернуться к списку

Karjalua kuului Puudogan mual

История изменений

02 апреля 2025 в 11:58 Нина Шибанова

• создал(а) текст
• создал(а) текст: Puudogan linnas 25.^ kevätkuudu školas n:u 3 piettih Karjalan tazavallan 105-vuozipäiväle omistettu muamankielen festivuali “Moi krai rodnoi – Karelija moja!” Festivualin programmu oli monipuoline da rikas. Pidoh kerdynyöt paikallizet eläjät oli juattu joukkoloih da käydih vuorokkai eri aihetiloih. Kerähmö -ruadokentäl vagavan paginan piettih Karjalazien X kerähmön vallittuloin nevvoston paginanvedäi Inga Gurilova da nevvostoh kuului Raisa Samodajeva. V ritme tansa -kentäl saneli perindöllizih tansiloih nähte Viola Malmin opastui da Mägriän školan opastai Margarita Lopuhina. Muuzikkukentäl Puudogan školan muuzikanopastai Daniil Sem’onov tuttavutti rahvastu karjalazeh perindöllizeh muuzikkah da soittimih. Allus oli sana -kentäl Puudogan školan ven’an kielen da literatuuran opastai, vallittuloin nevvostoh kuului Uljana Pavlenko opasti karjalastu kirjaimikkuo da karjalan kielen siändölöi. Sivon paikkazen da sanelen Karjalas -kentäl vastai kaikkii Oma Mua -lehten toimittai Margarita Kemppainen. Margarita opasti, kui ennevahnas da nygöi eri ruadolois olles rahvas sivottih paikkoi piäh. Festivualih yhtyttih Puudogan muan pajattajat: Krasnoborskiikylän folklourujoukko “Sudaruški” da Avdejevon kylän Rodnije napevi -folklourujoukko. Nämmis joukkolois pajatetah omua muadu da perindyö suvaiččijat rahvas, pajatetah Puudogan muan ylen čomii vahnoi pajoloi. Avdejevon kylän pajattai, Anuksenmuan karjalaine Valentina Pavlova pajatti karjalazen pajon “Kazvatti muamo minuu”. On hyviä mieldy, ku festivualin päivänny loittozes Puudogan piiris, kus nygöi eläy vähä karjalastu, oli muga äijy karjalazien eloksentabah kuulujua: muuzikkua, tansiloi, perindölöi, kuului karjalastu paginua da pajuo. Tämän pivon keksi da järjesti, kuhkutti yhtehizeh ruadoh opastajii da aktivistoi karjalaine Uljana Pavlenko. Karjalazien runoloin päivänny, kudai pietäh 10.^ kezäkuudu, jo huavatah pidiä uuzi festivuali, kudai yhtistäy vie enämbän karjalastu.