Тексты
Вернуться к просмотру | Вернуться к списку
Aleksandra Stepanova
История изменений
07 апреля 2025 в 15:19 Нина Шибанова
- создал(а) текст
- создал(а) текст: Aleksandra Stepanovna Stepanova (30.^ elokuudu 1930) on karjalazen rahvahanrunohuon tutkii, filolougientiedoloin kandiduattu, Karjalan tazavallan tiedoalan arvostettu ruadai (1995). Enämbän 44 vuottu Aleksandra Stepanova ruadoi Ven'an tiedoakadiemien Karjalan tiedokeskuksen Kielen, literatuuran da histourien instituutas. Eloskerdu Aleksandra Stepanova on roinnuhes Vienan Karjalan Šombajärven kyläh karjalazien muanruadajien pereheh. Vuvvennu 1938 lähti opastumah Haikol'an školah. Sih aigah opastus školas oli karjalan kielel. Enne voinua ehti loppie kolme kluassua, evakos Ižänmuallizen voinan aigah loppi nelländen kluasan. Voinan jälles Aleksandra Stepanova jatkoi opastundan Uhtuon školas. Yheksändes kluasas hänen literatuuran opastajannu oli Unelma Konkka (tulii kuulužu folkloristu). Oman opastajan hyvyös Aleksandra Stepanova lähti opastumah Petroskoin valdivonyliopistoh histourii-filolougizen tiedokunnan suomi-ugrilazele ozastole. Vuvvennu 1957, opastundan loppiettuu, Stepanovua työttih ruadoh Nilmijärveh, kus häi ruadoi kaksi vuottu opastajannu. Ruadoi vie Kalevalan da Kondupohjan piiris opastajannu. Vuvvennu 1962 tuli ruadoh Nevvostoliiton tiedoakadiemien Karjalan tiedokeskuksen Kielen, literatuuran da histourien instituuttah Unelma Konkan kučus. Instituutas Aleksandra Stepanova ruadoi vuodessah 2007. Aleksandra Stepanova tutki suarnoi, eepizii pajoloi, joiguloi, yhtelläh hänen ruavon piätutkimuskohtii oldih itkuvirret, vuvvennu 1969 häi vagavah ottihes niilöin tutkindah. Händy enne tädä rahvahanrunohuon žanrua ei tutkittu nigo Ven'al, nigo Suomes. Vuvvennu 1980 Aleksandra Stepanova väitti filolougientiedoloin kandiduatakse. Väitösruavon tiemannu oldih karjalazet itkuvirret. Ruadajes Aleksandra Stepanoval oli enämbi 50 tutkimusmatkua eri Karjalan piirilöih da Kuolanniemimuale. Julgavot Aleksandra Stepanoval on piässyh ilmah äijy kniigua da tiedokirjutustu karjalazen rahvahanrunohuos Ven'an da Suomen julgavolois. Palkindot Aleksandra Stepanova on Suomes ruadajien Suomalaisen kirjallisuuden seuran, Kalevalaseuran, Suomalais-ugrilaisen seuran jäsen. Stepanova on suannuh mondu Ven'an tiedoakadiemien da Karjalan tazavallan halličuksen kunnivokirjastu (1990,2005). Vuvvennu 1995 häi sai Karjalan tazavallan tiedoalan arvostettu ruadai –arvonimen. Vuvvennu 1992 Stepanova sai Kalevalaseuran kunnivokirjazen kui Suomen rahvahan hengenperindön tiedäi da maltai. Vuvvennu 2006 Suomalaisen kirjallisuuden seuran 175-vuozipäivän hantuzis Stepanova sai seuran kunnivokirjazen.