Тексты
Вернуться к просмотру | Вернуться к списку
Radam lapsiden täht
История изменений
23 апреля 2025 в 11:12 Нина Шибанова
- создал(а) текст
- создал(а) текст: “Kuki-rikku”-videožurnalan tegijad udes tartuiba radho. Toivotadas, miše necil vodel eloho lähteba ühesanz’ da kümnenz’ žurnalan vipuskad. “Kuki-rikku” om ilosine videožurnal lapsiden täht. Nene oma hüväsüdäimeližed da ilokahad istorijad karjalan i vepsän kelil. Kaik istorijad oma lapsiden elon polhe: heiden kosketusiš vanhembidenke, sebranikoidenke da školan opendajidenke. “Kuki-rikku”-videožurnal tehtas vodelpäi 2021. Joga vodel snimd’as kaks’ žurnalan vipuskad, kaikuččes om koume rolikad: kaks’ om karjalan kelel (kahtel paginal) da üks’ om vepsän kelel. Rahatugen žurnal sab Karjalan rahvahaližen da regionaližen politikan ministerstvalpäi. “Kuki-rikku”-žurnalad voib kacta internetas, “VKontakte”-gruppas, mugažo se ozutadas Karjalan TV:n “Omin silmin”-programmas. Žurnalan tegemižes radab äi ristituid: kino-ohjandai Julia Potahina (režiss’or), kameramez’ Igor’ Arehovskii, teatran režiss’or Darja Grečana, muzikantad Arto Rinne da Aleksandr Šašin, scenarijan avtorad da projektan ohjandajad Galina Baburova i Maria Šašina. Jogahižel kerdal radho tartuba mugažo akt’orad, karjalan kelen kändajad, opendajad da lapsiden vanhembad. Kaikutte lühüd vai pit’k istorii – nece om suren radon satuz, äjiden ristituiden ühthine rad. Necil vodel “Kuki-rikku”-žurnalan tegijad zavodiba radon jo kevädel: ezmäižed sjomkad oli tehtud sulakus. Rolikas snimihe Timofei Starodubcev da Karjalan radion toimitai Anna Usova. Nece rolik karjalan kelel starinoičeb kacujile laškan prihaižen polhe. Kino-ohjandai Julia Potahina sanub: “Süžet uden rolikan täht om ottud todesižes elospäi. Siš meile starinoitihe edeližiden sjomkoiden aigan. Mö amu jo tahtoim snimd’a sen, no sirdim necen azjan kaiken aigan. Necil vodel mö jo tegim sen, kaik meil ozaižihe. Lujas teravas löuzim akt’oroid necen süžetan täht. Timofei ühtni jo toižihe “Kuki-rikku”-žurnalan sezonoihe, no hän oli vaiše epizodoiš. Tima hüvin el’gendab, midä mö pakičem, tegeb läz kaiked ezmäižes dubl’aspäi”. Sulakus projektan avtorad Maria Šašina da Galina Baburova mugažo tegiba prezentacijan Petroskoin Suomalaiž-ugrilaižes školas. Sigä hö vastsihe 4.^ klassan openikoidenke, starinoičiba heile žurnalan polhe da ozutiba erased rolikad. Ilokahad istorijad tuliba lapsile mel’he, i erased heišpäi tahtoiškanziba ühtneda sjomkoihe. Necil vodel žurnalan tegijad planuičeba tehta mugoižed vastused lapsidenke toižiš-ki klassoiš da eskai toižiš školiš. Vastusen aigan lapsile sanutihe parahiman scenarijan konkursan polhe. Galina da Maria valičeba parahiman scenarijan, i sen pohjal linneb tehtud uz’ rolik. Scenarijoid voib kirjutada miččes taht formas. Oigeta niid voib “Kodima”-lehtesen redakcijaha vai “VKontakte”-verkon “Kuki-rikku”-gruppaha.