Тексты
Вернуться к просмотру | Вернуться к списку
“N’amuzet” sytytetäh nerokybenyzii lapsis
История изменений
24 апреля 2025 в 11:22 Нина Шибанова
- создал(а) текст
- создал(а) текст: Karjalan runohuon N’amuzet-festivuali piettih Jessoilan kyläs. Eessoilas piettyh fesitivualih yhtyi Jessoilan da Veškelyksen lastu, lapsienpäivykoin kazvattii da školas opastujua. Kaikin hyö vagavah valmistuttih festivualih, opastuttih lugemah karjalazien runoilijoin runoloi vahnembien, opastajien da kazvattajien kel. Festivualin avai Karjalan kuningas – Lev Vorobjov, koronu piäs, savakko käis, pajot da vesselät sanondat keräl. Festivualin vedäjinny oldih Galina Voglojeva da Irina Larionova. Heidy autettih prinsessu Liza, jessoil’čan kieliaktivistan Zoja Saveljevan pruavobunukku, da prinsu Roma, paikallizen karjalazen runoilijan Irina Grigorjevan bunukku. Kuningattaren roulis oli Veškelyksen haldivon piälikön virras olii Lidija Ams, hänen käzis festivualilazet suadih festivualin “avaimen” kirjavis n’amuzis da magiet lahjat. Nuoris festivualilazis kuulimmo suarnat karjalan kielel, “Värtinäine” ilaškoitti rahvahallizil pajoloil da kandelehel soitandal, Veškelyksen “Vesselät” oman johtajan Pavel Andrejevan piän al valmistettih pajon da ozutelman. Runoloin lugijat vähäzel varattih ezittyjes, ga lugiettih runoloi hyvin. Hyvä mieles oli kuulta, kui hyvin hyö lugietah runoloi karjalakse, nähtä, mittumat kaunehet ruutat valmistettih ezitykseh niškoi. Arvostajil oli jygei vallita parahii. Arvostusjoukko Karjalan raadivon toimittajan Anna Usovan piän al arvosti oigieh da vagavah, jagoi diplomoi, sertifikuattoi da lahjoi. Passibo suuri festivualin valmistajile da pidäjile, ku luajitah moizii pidoloi, sytytetäh nerokybenyzii lapsis. Zualu oli täyzi. Kuuluttih käinräškytykset da kiitändysanat. Veškelyksen kyläspäi rahvas tuldih kuvvel mašinal. Tulolazil oli mahto kävvä kirjaston ozutteluzualah, kus hyö nähtih paikallizien taidomiehien tevoksii da ihailtih kaunistu Siämärven lohkuo. Konzulienne festivualin pandih alguh runoilii Valentina Akimova da Zoja Saveljeva. Valentina Vladimirovna kirjutti N’amuzet-kirjan, Zoja Lukinična sen kiändi karjalakse. Nygöi N’amuzet-festivuali lujenou da kazvau, kehittäy rahvahallistu kul’tuurua da kazvattau lapsis neruo.