Тексты

Вернуться к просмотру | Вернуться к списку

Pelatka Tolkkuh-Polkuh!

История изменений

17 июня 2025 в 11:46 Нина Шибанова

• создал(а) текст
• создал(а) текст: Interaktiivini Tolkku-Polku -peli on omissettu Karjalan muan istorij alla ta perintehillä. Valmistajat staraitih luatie tuotehta, kumpani kiinnoštau lapšie šekä aikuhisie. Uuši Karjala-aiheini Tolkku-Polku -peli ilmešty Koštamuk šen Sreda-kulttuurikehityškeškukšen alottehen anšijošta Severstal’- ta Karjalan pelletti-yritykšien kannatukšella. “Tolkku-Polku” on ainutluatuni vajellušpeli, kumpani auttau mukavašša muuvvošša tutuštuo alovehen kulttuuriperintöh. “Tolkun-Polun” pelikenttä on jalkojen alla. Pelin ošallistujat muututah paikallisiksi henkilöiksi: Väinämöisekši, geologiksi, Našto-kaunottarekši tahi vuatimekši. – Sreda-keškukšen joukko šiännöllisešti järještäy ušeita pihatilaisukšie. Joka kerta meilä on ideja maksimalisešti vetyä mukana kaččojie tapahtumah, jotta hyö ei ainuoštah oltais vierahina, vain oikeina ošallistujina. Šuunnitelmissa oli projekti – huvi, kumpani on mukava lapšilla ta aikuhisilla, eri vaikehuštašojen kera, kertou Sreda-kulttuurikehityškeškukšen johtaja Jelena Hmelevskaja. Piävuatimukšen mukah pelin piti kertuo kotimuašta ta keštyä 15–20 minuuttie. – Lopulta ilmešty omaluatuni “latepeli”, missä ošallistujista tulou meijäh muah šivottuja henkilöjä. Esimerkiksi, geologi tahi vanha viisaš Väinämöini. Peluajat mukautetah omie henkilöjä, šiirrytäh pelitilua myöten, šuoritetah eri tehtävie ta eissytäh loppuo kohti. Projektie valmisti monipuolini joukko: pelimehaniikan ekspertit miärättih elementtien miäryä ta niijen vuorovaikutušta, rakennettih pelin dinamiikkua. Kotišeutututkijat ta paikallisen yhteisön etuštajat autettih oikein kertuo alovehešta, jatkau kertomušta miun pakinakaveri. Tolkku-Polku -nimi kekšittih karjalan kielen kurššien opaštujat Marija Mitinan joholla. Pelin luatimisen prosessih kuulu pitkä testauš viime vuuvven pimiekuun alušta. – Joka arvoštelu tarkotušryhmiltä autto parentua pelie, min tulokšekši tuli tilaisuošša esitetty loppuversijo, šanelou Jelena Hmelevskaja. Nyt Koštamukšen eläjät ta vierahat šuahah pelata “Tolkkuh-Polkuh” šekä kaupunkin pihapruasniekoissa, jotta Sreda-keškukšešša.