Тексты
Вернуться к просмотру | Вернуться к списку
Lähetkö šie
История изменений
23 июня 2025 в 16:28 Нина Шибанова
- создал(а) текст
- создал(а) текст: Lähetkö šie, vualijaini lapši, valkual'omah vaimaluo varruttani valkien hyväseni šuarukylysih? En voi valkual'l'a vaimaluo vartuvuoni, kun on vaivukšenneltu vallan nuorukkaiset vuaklokätyseni varšijani myöten, nin lähe šie valkual’omah, vualijaini lapši. Lähe šie, oimun armaš omakuntaseni, onehta varruttani očistiksentelomah oimun jälkimmäisie kertasie orheijen hyväsien kylysih. En voi očistiksennella, kun niin olkapiähysieni myöten onnaheltu oimun nuorukkaiset osrakätyseni ottamien kerallisie kiukka opualaisie akkiloiješša. Kuin on katkiel'tu kaijat kalovehkätyseni, kaikki kannettuijen kerallisie kiukka kaihosie kannellešša. Lähe šie očistiksentelomah, ottajaini lapši, onehta varruttani. En voi oimun ylennekšennellä oimun nuorikkaiset olkakätiseni očistiksentelomah. Kaikki on onnaheltu ottamien kerallisissa opualaisissa, on onnaheltu oimun nuorukkaiset osrakätyseni olkapäisistä šuate. (Vaštua kysytäh:) Etkö voi, valkeilla ilmoilla šiätelijä vualijaiseni, etkö voi varuššella vuara vuarasilta vaštavarpasie vallan jälkimmäiset kertaset šuavehen hyväseni šuarukylysissä šuarnan jälkimmäiset kertaset kun šuarnan kualelen. Voikah tuhanšina tulikypenyisina tunnon ylennekšennellä tuuvehen hyväsen tuprukylyni, ta šatoina šavupaččahaisina šuarnan ylennekšennelkäh šuavehen hyväseni šuarukylyni. (Kysytäh vielä vettä käs'aštieh tuatolta): Etkö voi kumuall'a, kulu hyväseni, monien kuušijen juurijen läpi kulkovie kuvašvetysie, millä kujin nuorukkaisie kulmipuolusieni [kastelisin]. Anna missä on vuarnojen nenissä vanunuot valkiet käsipaikkaset. Pyyhi, kantajaini lapši, miun kaunehet kašvopuoluset kajon jälkimmäiset kertaset. En voi kaijoilla kalovehkätysilläni kajon ašetella, kaikki on lankieltu tai lopukšenneltu luatimien kerallisie kiukka laittosie luavun kannellešša. Etkö voi, kallehilla ilmoilla šiätelijä kantajaiseni, kaunehie karivetysie monien kuušien juurijen läpi kulkijie kuvaisvetysie kajon luajitella, missä kaššella kajon nuorikkaisie kašvopuolusie kajon jälkimmäisie kertasie? (Kyšyy pyyheliinua:) Utala hyväseni, etkö voi ušein valkeita ut'eral'nikkasie miun luajitella?
- создал(а) перевод текста