Тексты
Вернуться к просмотру | Вернуться к списку
Kacmata vuluhu säha, täs kaiken om läm’!
История изменений
04 августа 2025 в 16:12 Нина Шибанова
- создал(а) текст
- создал(а) текст: Heinkun augotišes Kaleig-posad Änižröunas vastsi adivoid. “Kalarand”-etnoparkas Änižjärven randal mäni tradicionaline vepsän rahvahan kul’turan “Kalarand”-praznik. Täl vodel se mäni jo kahesanden kerdan. Kut i kaiken, se kerazi äi adivoid susedkülišpäi, lidnoišpäi da agjoišpäi. Hüvän tradicijan mödhe praznikale tuliba erazvuiččed pajo- da kargkollektivad, “Čičiliušku”-teatr ozuti teatrozutelusen “Kalevala”-eposan motivoiden mödhe, äjan vätihe, iloiteldihe. Kacmata sihe, miše täl vodel sä oli vilu, vihmasine da päiväižeta, praznikale kerazihe äi adivoid. Hö lämbitelihe palabal čajul, magukahal lemel, vastusil sebranikoidenke da vepsläižil paginoil. Täl vodel čoman, ičeladuižen programman “Kalarand”-praznikale vaumiči Vepsän rahvahan hor, miččele udel vodel täudub jo 90 vot. Läz pol’sadad vot horan vedäi om Petroskoin konservatorijan pästnik, Karjalan da Venäman arvostadud kul’turradnik, “Venäman heng” -premijan laureat L’udmila Melentjeva. Veslil karguil ihastoiti adivoid “Gornica”-kollektiv, a heledoil änil da pajoil erazvuiččil kelil lämbitiba tulnut rahvast karjalaine “Oma pajo”-hor, kazakpajon “Karusel’”-teatr da “SOLO”-estradstudii. Vedi praznikan Karjalan rahvahaližen teatran aktris Aleksandra Aniskina. Tervehtoitiba adivoid lämil sanoil Karjalan parlamentan varapämez’ Ol’ga Šmajenik, Änižröunan administracijan pämez’ Grigorii Šemet i Rahvahaližen da regionaližen politikan ministerstvan radnik Aleksandra Anufrijeva. Kaleigen külän aktivižed eläjad saiba kitändkirjeižid da pauklahjoid. Eriližin adivoin praznikal oliba “Öhändikahad”-motokluban ezitajad, kudambad tuliba Kaleigehe surel joukul ičeze motokezroil. Pidab sanuda, miše “Kalarand” ühtenzoitab kaikid, tägä keradasoiš sebranikad, tutabad mehed, kanzad, heimolaižed. “Kalarand” süvenzoitab kaikid heid amuižehe vepsläižehe kul’turaha, vepsän rahvahan tradicijoihe. Kaiktäli kuluba vepsän paginad da eskai tundub vepsläine il’m. Täl vodel, kut i kaiken, ani scenanno radoiba Karjalan mastarid, kudambad möiba ičeze käzil tehtud tehmusid, keratud met, erazvuiččid čomitesid da bobaižid. Voib rohktas sanuda, miše “Kalarand”-praznik varastadas, miše möst tulda čomale Änižjärven randale, lebaita hengel, kulištada kodikel’t da vastatas ühtmeližiden ristituidenke. Sur’ spasib Kaleigen külän pämehele Mihail Pol’akovale da Kaleigen školan pämehele Svetlana Gotičale heiden holiš, armastuses kodimaha da lämäs adivoičetandas! Suren tugen praznikale andaba Karjalan Rahvahaližen da regionaližen politikan ministerstv, Rahvahaline kul’turkeskuz da aktivižed külän eläjad, kudambad ühtes tegeba mugomad hüväd azjad vepsän rahvahan, kelen da kul’turan kaičendan täht.