Тексты

Вернуться к просмотру | Вернуться к списку

Sit' - sarnaline jogi

История изменений

30 августа 2025 в 11:05 Ирина Сотникова

• создал(а) текст
• создал(а) текст: Nel’l’toštkümne kilometrad da völ vihmvalegen al Vas’ka astui koume časud. Ezmäi hän tuli Prokatovan akannoks i pöl’gästoiti händast ičeze irdnägol: hän meletaškanzi, miše midä-se om tehnus mužikale. No tedištades, miš om azj, käski Vas’kad joda lämäd maidošt. Pöl’gästoiti Vas’kan irdnägo hänen mamdaze Darjad-ki. – Sur’ Sünduižem, kuspäi sinä mugoine? Ed-ik pagoho lähtend Ivanannopäi. – Sanud sinä! – abidihe poig. – Näged, mitte sä om. Ei sa rahnda! – Ka midä seižud? Kacu, sinuspäi vezi jogel jokseb! A Vas’ka kacui, kut lagespäi kodihe tuleb vet. – Kacu, katuz-se reigukaz om! – hengahti Darja. – Ka vihm-se mugoine kuti valeg om! Kuni Vas’ka ruši märgäd sobad, hän sai päčilpäi kuivad noskad, valoi pezičuhu lämäd vet. – Tadan, enambad ed radaškande... – En. Ku hüvä sä oliži, ka radaižin völ. – Nu ka i hüvä om. Muga-ki oled väzunu. Školhasai jäi vaiše viž päiväd. Eglai pauk todihe, ka minä ani pöl’gästuin, varaižin sada. Meletin, miše mitte-se viga om. Ed voind sinä muga äi dengoid sada. No minei sanutihe, miše kaik om oikti. Minä ladin toižhe külähä lähtta sapkad sinei ostmaha... – Iče kävun. Ehtin völ. Vas’ka pezihe, sugi hibused i veri laučale. Amu ei olend hengel muga tün’. – Min sinä veritoi? Oled-ik terveh? – Tahtoin lebahtada laučal. Oma-k Vit’ka i Sergei kodiš? – Kodiš. Eglai Tol’ka habi ei rikond Sergejad. – Ka kutak? – Tol’kan d’ad’aze, kudamb lebul oli, joti Tol’kad vinal. A se läksi toradamha Sergejan päle. Ved’ veič eskai kädes oli! Akad ei andnugoi torata. A sid’ völ Tan’aine oli. Ka ei andnugoi Sergejad abidida. Tol’kan mam voikab, sanub, ei kundle poig nimidä! – Seregejale-se ei-ik putund? – Ei, ei! To-ške samvar-se tänna, ka minä-ki sinunke čajud jon. Muga bohatas Gusevoiden stol ei olend kattud. Mamoi sirdli Vas’kannoks se sidä, se necidä, ei tedand, midä völ antta radnikale. – Sö voileibid, jo čajud kanfetoidenke. En tedand, miše tuled, voižin midä-ni magukahamban keitta. A iknan taga valoi i valoi vet taivhaspäi.