Тексты
Вернуться к просмотру | Вернуться к списку
Ermitaši ativoiččou Petroskoissa
История изменений
24 сентября 2025 в 11:48 Нина Шибанова
- создал(а) текст
- создал(а) текст: Ermitašin Pietari I:n gallerejašta tuotu Pietarin luatimua -näyttely avautu Karjalan tašavallan taitomusejošša. Še on šijotettu musejon 65-vuotisjuhlalla, kummaista pietäh tänä vuotena. Projekti toteutettih Karjalan tašavallan ta Ermitašin välillä allakirjutetun yhteistyöšopimukšen ta muan atomitevollisuon rahakannatukšen anšijošta. Tänä vuotena Venäjän atomitevollisuš täyttäy 80 vuotta. Tämä ala alko kiinnoštuo projektista, šentäh kun tänä vuotena Pietari I:n hommien jatkaja, Rosatomin konehenrakennušdivisijonah kuuluja Petrozavodskmaš-tehaš niise täyttäy 65 vuotta, kuin Taitomusejo. Pietarin luatimua -näyttelyh kuuluu nellä esinehtä Ermitašin Pietari I:n gallerejašta. Kakši niistä ollah Pietari I:n ta Jekaterina I:n šuuret muotokuvat. Enšimmäisen tevokšen mualasi vuotena 1717 ranškalaini taitomualari Žan-Mark Natje keisarinnan tilaukšen mukah. Muasterin työ miellytti niise Pietarie ta hänellä himotti, jotta taiteilija ois mualannun hänen muotokuvan. Kohta taiteilija luati šen. Kolmaš näyttelyesineh on venäläisen muasterin Aleksei Zubovin vuotena 1712 luatima Pietari I:n hiät -kaiverruš, kumpani on omissettu šamana vuotena männyöllä tapahtumalla. Nelläš näyttelyesineh on yksi viiještä panikadilo-lakivalokoristehešta, kumpaset Pietari I luati omin käsin luušta ta muššašta puušta. On mainittava, jotta Pietari I luati ne esinehet vuotena 1724, konša keisari viime kerran kävi Dvorčašša, missä hiän oli hoijošša. Esitetyn lakivalokoristehen rekonstruoinnan aikana šen šisä ošašta löyvettih Pietari I:n kirjutuš esinehen valmissušpäivämiäräštä. Kohta keisarin kuoloman jälkeh hänen peruštamah harvinaisien esinehien musejoh, Kunstkamerah alko muuvvoštuo šen aikakauven esihehien kompleksi, kumpani šai Pietari Šuuren kabinetti. Myöhemmin šen nimi muutettih “Pietari I:n gallerejakši”. Nyt še šäilyy Ermitašissa. Netälin aikana Pietarin luatimua -näytelmän avajaisien jälkeh Taitomusejošša, šen varašton šäilöššä ta Art-Prospekt-näyttelytilašša vietettih Ermitašin päivien opaššušoša. Piiterin piämusejon spesialistit piettih luventoja Pietari I:n uuvvissukšista Venäjällä, Ermitašin meštaritevokšista. Šamoin näytettih asiepaperien mukasie filmijä niistä aiheista. Lisäkši järješšettih vanhojen ikonien entistäjien koulu. Pietarin luatimua -näytelmä rupieu toimimah šajekuun 12.^ päiväh šuaten.