Тексты

Вернуться к просмотру | Вернуться к списку

Vastuz Marii Elan mal

История изменений

29 сентября 2025 в 14:55 Нина Шибанова

• создал(а) текст
• создал(а) текст: 9.–12.^ sügüz’kud Joškar-Olas mäni III Ühthižvenälaine suomalaiž-ugrilaižiden rahvahiden forum. Sihe ühtni 250 mest meiden man 32 regionaspäi. Hö lendiba tärktoid küzundoid, miččed koskiba kodikeliden da kul’turan kaičendad, starinoičiba necin radpolen satusekahiš projektoiš. Foruman praznikavaiduz oli Marin valdkundaližen akademižen operan da baletan teatras Erik Sapajevan nimel. Sen jäl’ghe mäni plenarine ištund, miččen nimi oli “Suomalaižugrilaine norišt vajehtajas mirus”. Ištundal pagištihe suomalaiž-ugrilaižiden rahvahiden aktivižen norišton roliš kul’turan kaičendas, diskutiruitihe rahvahiden tradicionaližiden hengeližiden kal’huziden znamoičendas da nügüd’läižiden tehnologijoiden roliš tedoiden levitamižes. Forumal Karjalad eziti 11 mest. Nene oma kundaližiden sebroiden ühtnikad, opendusen da kul’turan organizacijoiden radnikad, rahvahaližiden joukvestišton ezitajad da valdmehed. Karjalan man vepsläižišpäi forumal oliba “Venäman Baltian meren suomalaižiden rahvahiden ligan” pämez’ Anna Anhimova da Šokšun školan pämez’ Nina Koren’kova. – Täl vodel delegatad lugiba ičeze rahvahan avtoroiden prozan otegid vai runoid. Minä lugin Alevtina Andrejevan “Kaičem vepsän kel’t” -runon. Nece oli lujas čoma idei! Meiden “Suomalaiž-ugrilaižed matkad” -projekt tuli mel’he Foruman ühtnikoile, se sünduti melentartust noriden mehiden keskes. Ved’ Karjalan ma tegihe ezmäižeks openduzsijaks norile ezinikoile. Om tulnu aig meletada da valita ut regionad tulijan radon täht, – sanui Anna. Nina Koren’kova eziti külän školan satusekahan radon etnokul’turižes poles. Hänen ezitust mugažo arvosteliba Foruman ekspertad. – Sekcijan moderator muga sanui Nina Nikolajevnan polhe: “Kuni školas om mugoine pämez’, ka vepsläižed ei kadogoi”, – ližazi Anna. Mugažo Foruman aigan 12.^ sügüz’kud mäni VIII “Venäman suomalaiž-ugrilaižiden rahvahiden associacijan” suim. Sen päteman oli “Suomalaiž-ugrilaižiden rahvahiden tradicionaližed hengeližed kal’huded Venäman eläjiden ühtmudes”. Suimal ezitusenke temale “Vepsän kelen kaičend Vologdan agjas projektoiden abul” ezini Borisovon školan opendai da Babajevon rajonan “Vepsän kul’tursebran” pämez’ Ol’ga Smirnova. Hän starinoiči meile: “Kaik projektad, miččed mö tegem, om oigetud vepsän kelen, kul’turan da tradicijoiden kaičendaha. Om tärged, miše mugoižil azjtegoil rahvahad voiba jagatas toine toiženke mahtištol, starinoita ičeze problemoiš da ühtes meletada midäse ut i melentartušt kodikelen hüvüdeks”. Mugažo Joškar-Ola-lidnaha Ol’ga Smirnovanke tuli Jeva Vepreva, Moskvan valdkundaližen akademijan O.^ J.^ Kutafinan nimel toižen voz’kursan üläopenik. Azjtegoihe ühtniba vepsläižed Piterin agjaspäi-ki: Vidlan Vepsän fol’klorkeskusen pämez’ Maria Lapikova, “Vepsän kondan” ühtnik Ol’ga N’uman, a mugažo Piterin agjan Sijaližiden valdkundan, rahvahidenkeskeižiden da konfessijoidenkeskeižiden kosketusiden komitetan radnik Nadežda Radkevič. Udes Ühthižvenälaine suomalaiž-ugrilaižiden rahvahiden forum mäneb päliči kahtes vodes.