Тексты
Вернуться к просмотру | Вернуться к списку
Piga-abun radnikan päiv
История изменений
29 октября 2025 в 00:05 Ирина Сотникова
- создал(а) текст
- создал(а) перевод текста
- создал(а) текст: Piga-abun radnikan päiv — tedomahtoine praznik tervhuz'erišton radnikoiden täht, kudambad ajaba da andaba piga-abud ristituile. Kaikuččen voden se pidetas 28.sulakud vodelpäi 2020. Istorii Edel ku vahvištoittihe "Piga-abun radnikan päiv", Venämal joga vodel 28.sulakud piga-abun radnikad iče praznuičiba necen päivän. Praznikan päivmär om sidotud mugoiženke azjtegonke. 28.sulakud vodel 1898 Moskvan policmeisteran Dmitrii Trepovan käskön mödhe Moskvas ozaižihe ezmäižed piga-abun keskused, a mugažo kaks' ezmäšt piga-abun mašinad, miše voiži veda läžundoid. 28.sulakud vodel 2020 Venäman prezident Vladimir Putin, valdmehišton pämez' Mihail Mišustin allekirjutiba käskön N 600 "Piga-abun radnikan päiv"-praznikan vahvištoitandas. Praznuičendan päiväks tegihe 28.sulakud. "Tedan, miše tämbei, 28.sulakud, ei oficialižesti pidetas tervhuz'piga-abun päiv Venämal. Minä tahtoin ozatelda lekarid, feršalid, medsizarid da läžujan kacujid, piga-abun mašinoiden vedäjid necen praznikanke. Kitän teid mugoižes tarbhaižes rados. Nenil jügedoil päivil da nedalil tö ozutat rohktud, ičetoi parahimid mehen taban pirdoid. Meletan, oliži oikti necil päiväl tehta professionaline praznik — Piga-abun radnikan päiv. Mö muga tegem-ki! — sanui prezident Vladimir Putin paginištundal, kus pagištihe koronavirusan levitamižen vasttegoiš Venäman agjoiš". Praznik oli tehtud oficialižeks COVID-19-pandemijan taguiči kaikes mail'mas, ved' pandemijan aigan piga-abun radnikoil oli enamba kaiked radod. Piga-abin mašin Tradicijad Praznikan päiväl kaik radaba. "Piga-abun radnikan päiväl" vedetas mugoižed azjtegod. Praznikan polhe levedas starinoitas erazvuiččiš joukvestištoiš. Tervhuz'erištoiš tehtas ozutelusid, a mugažo praznikazjtegoid. Školiš da korktoiš openduzerištoiš mäneba urokad da lekcijad. Valdkundas mäneba oficialižed pauklahjoičendan tradicijad. Pauklahjoitas kitändkirjeižil, "Venäman tervhuz'tedon arvostadud radnik"-, "Venäman arvostadud lekar'"-medalil, a mugažo pauklahjoil Venäman tervhuz'tedon ministerstvalpäi da regionaližel valdmehištolpäi. Om vero ozatelda: lekarid, feršalid, medsizarid, piga-abun mašinoiden vedäjid i läžujan kacujid. Mušt Vodel 2022 Piteriš oli azotadud ezmäine muštpacaz Piga-abin mašinale. 28.sulakud vodel 2025 Moskvan metropolitenan Arbatsko-Pokrovan raudtelinijale pästtihe tematine pojezd Piga-abun radnikan päiväks. Se oli tehtud tervhuz'mašinoiden stil'as. Südäimes oli lekariden, feršaliden da holitajiden fotokuvad da oteged, hö starinoičiba ičeze radon polhe.