Texts

Return to list | edit | delete | history | ? Help

Mintäh šiilillä ei ole kaverija

Corpus: New-writing language

New written karelian, Texts for children

Source: VLADIMIR KANNOJEV, Oma mua. № 17, (2018), p. 11

Mintäh šiilillä ei ole kaverija
(Karelian Proper)

Oli ta eli šiili. Ta hänellä ei ollun kaverija. Kerran šiili läksi niitä eččimäh. Aštuu šiili meččyä myöten. Hänellä vaštah jänis hyppiy.
Terveh, šiili, šanou jänis. Kunne šie aššut?
Ka läksin kaverija eččimäh, vaštasi šiili.
Ota miut kaveriksi!
En ota, jänöseni, šie olet liijan varačču.
Läksi šiili ielläh. Aštuu, aštuu, a hänellä vaštah repo hiivuou.
Terveh, piikkipiä! Kunne šie aššut?
Ka läksin kaverija eččimäh.
Ota miut kaveriksi!
En ota, repo-kuomaseni, šie olet liijan viekaš, vielä petät milma.
Ta läksi šiili ielläh. Aštuu, aštuu, a hänellä vaštah harmua hukka juokšou.
Terveh, piikkipiä! Kunne šie aššut?
Ka läksin kaverija eččimäh.
Ota miut kaveriksi!
En ota, hukkaseni, šie olet liijan vihani, vielä kiušuat milma.
Ta läksi šiili ielläh. Aštuu, aštuu, a hänellä vaštah kontie ryömiy. Ka kontie niise ei kelvannun šiilillä kaveriksi.
Šiitä ajašta alkuan šiili niin ni eläy yksin, ilman kaverija.