Texts
Return to list | edit | delete | Create a new | history | Statistics | ? Help
Šašina Maria . “Pajokeraine” kaičeb vepsän fol’klorad
Šašina Maria
“Pajokeraine” kaičeb vepsän fol’klorad
Veps
New written Veps
9. kül’mkud
Šoutjärves vedetihe Regionoidenkeskeine "Pajokeraine "-fol’klorfestival’ .Se oli tehtud külän školas , kuna sil päiväl kerazihe äi necen čoman praznikan navedijoid .
"Pajokeraine "-festivalin tegeba Šoutjärven školan radnikad , a abutaba heile i tugedaba praznikad Änižröunan administracijan opendusen da socialižen kehitoitusen erišt i Karjalan rahvahaližen da regionaližen politikan ministerstv .
"Pajokeraine "-festival’ tehtas sügüzel kerdan kahtes vodes . Necil vodel se mäni jo kahesanden kerdan – nece om ani hüvä , pit’k praznikan igä .
Täl vodel festivalil oli 15 kollektivad , a nece om ani äjan – läz 120 ühtnikad .Niiden keskes oli koume kollektivad Vologdan agjaspäi (Timošinon da Borisovon školad , Babajevon etnokeskuz ), kuz’ kollektivad Änižröunaspäi (Kalagen , Šokšun da Šoutjärven lapsiden päivkodid da školad ), Ladvan muzikškolan hor da kantelil vändajiden ansambl’ , "Kičči-kočči "-grupp Petroskoišpäi da "Kantele "-ansambl’an kaks’ vokal’gruppad .Tradicijan mödhe praznikan avaiži Šoutjärven Vepsän rahvahan hor .
Lapsed vaumištihe festivalikš jo sügüz’kuspäi .Ales’a Anušenkova , vepsän kelen opendai , oli praznikan pätegijan .Hän kirjuti scenarijan , kerazi kollektivad , vaumišti lahjoid lapsile .Vaumištada praznikan abutiba toižed-ki školan opendajad .Sur’ rad oli tehtud ühtel vägel , sikš satuz-ki tuli lujas hüvä .Ales’a sanub : "Kaik kollektivad eziniba vepsän kelel , kaks’ nomerad oli karjalan kelel .Festivalil pajatadihe , kargaitihe , lugetihe runoid , tehtihe teatraližid ozutesid .Jäi muštho "Kantele "-ansambl’an ezituz .Meiden külälaižed lapsed mugažo eziniba lujas čomin .Festivalin teman oli "Kanz – minun bohatuz’ ".Jäi muštho Maria Mironovan i Jelena Klimšinan lapsiden ezituz .Lapsed pajatiba kaikile mamoile omištadud pajon , miččen Maria kirjuti iče .Se kosketi minun südänt ".Festivalin ohjandajad da kacujad korktas arvostiba lapsid Vologdan-ki agjaspäi .Lapsed ozutiba čomad vepsän paginad , ihastoitiba kacujid častuškoil , pajoil da karguil .Kacmata sihe , miše matk Karjalaha om pit’k , hö oma kaikenaigaližed adivod necil festivalil .
"Pajokeraine "-festvalil ei ole vägestajid . Kaikutte laps’ sai lahjad da diploman .Fol’klorfestivalin tegijad toivoba , miše nece vepsläine praznik eläškandeb pit’kha i keradaškandeb toižil vozil völ enamba lapsid .
“Pajokeraine” kaičeb vepsän fol’klorad
Veps
New written Veps